രാവിലെ ഈ ഇത്തിരി കുഞ്ഞനെ കഴിച്ച് നോക്കിക്കെ; ചർമ്മം ഏപ്പോഴും ഫ്രഷായിരിക്കും..!

ചുളിവുകളും പാടുകളുമില്ലാത്ത തെളിച്ചമുള്ള ചർമ്മം സ്വന്തമാക്കാൻ ആഗ്രഹമില്ലാത്ത ആരും തന്നെ ഉണ്ടാവില്ല ഭൂമിയിൽ. ജീവിത രീതിയിലും ഭക്ഷണത്തിലുമൊക്കെ അൽപം മാറ്റം വരുത്തിയാൽ തന്നെ അത് പ്രകടമാകും. അത്തരത്തിൽ ഒന്നാണ് ഇവിടെ ഈ ലേഖനത്തിൽ പങ്കുവെക്കുന്നത്.

ഉണക്കമുന്തിരി അഥവാ കിസ്മിസ് ആണ് ഇവിടെ താരം. ആരോഗ്യത്തിന് മാത്രമല്ല, ചർമ്മസംരക്ഷണത്തിനും ഒരു അത്ഭുത മരുന്നാണ് ഉണക്കമുന്തിരി. പോഷകങ്ങളുടെ കലവറയായ ഈ കുഞ്ഞൻ ഉണക്കഫലം ചർമ്മത്തിന് നൽകുന്ന ഗുണങ്ങൾ നിരവധിയാണ്. തിളക്കമുള്ളതും ആരോഗ്യവുമുള്ള ചർമ്മം ആഗ്രഹിക്കുന്നവർക്ക് ഡയറ്റിലും ചർമ്മസംരക്ഷണത്തിലും ഒരുപോലെ ഉൾപ്പെടുത്താവുന്ന ഒന്നാണ് ഉണക്കമുന്തിരി. ഇതിന്റെ പ്രധാനപ്പെട്ട ഗുണങ്ങൾ താഴെ പറയുന്നവയാണ്.

ചർമ്മത്തിലെ വിഷാംശങ്ങൾ നീക്കം ചെയ്യുന്നു
രക്തം ശുദ്ധീകരിക്കാനുള്ള ഉണക്കമുന്തിരിയുടെ കഴിവ് ചർമ്മത്തെ ഉള്ളിൽ നിന്ന് തിളക്കമുള്ളതാക്കുന്നു. ഇതിലടങ്ങിയിരിക്കുന്ന ആന്റിഓക്‌സിഡന്റുകൾ ശരീരത്തിലെ വിഷാംശങ്ങളെ എല്ലാം പുറന്തള്ളാൻ സഹായിക്കുന്നു. ഇത് മുഖക്കുരു, മുഖത്തെ കലകൾ, മറ്റ് ചർമ്മപ്രശ്നങ്ങളും കുറയ്ക്കാൻ ഉത്തമമാണ്.

പ്രായം കുറഞ്ഞ ചർമ്മം
ഉണക്കമുന്തിരിയിൽ ധാരാളമായി അടങ്ങിയിരിക്കുന്ന ഫൈറ്റോകെമിക്കലുകളും ആന്റിഓക്‌സിഡന്റുകളും ചർമ്മത്തിലെ കോശങ്ങൾ നശിക്കുന്നത് തടയുന്നു. ഇത് ചർമ്മത്തിലെ ചുളിവുകൾ, പാടുകൾ എന്നിവ കുറയ്ക്കാനും പ്രായം കുറഞ്ഞ ചർമ്മം നിലനിർത്താനും നിങ്ങളെ സഹായിക്കുന്നു.

ചർമ്മത്തിന് ഈർപ്പം നൽകുന്നു
ഉണക്കമുന്തിരി കുതിർത്ത വെള്ളം കുടിക്കുന്നത് ചർമ്മത്തെ എപ്പോഴും ഹൈഡ്രേറ്റഡ് ആയി നിലനിർത്താൻ സഹായിക്കും. വിറ്റാമിൻ എ, വിറ്റാമിൻ ഇ എന്നിവ ചർമ്മത്തെ ഉള്ളിൽ നിന്ന് പോഷിപ്പിക്കുകയും ചർമ്മത്തിന് മൃദുത്വം നൽകുകയും ചെയ്യുന്നു.

ചർമ്മ സംരക്ഷണം മാത്രമല്ല മറ്റ് ആരോഗ്യ ഗുണങ്ങളുമുണ്ട്. ദഹനപ്രക്രിയ മെച്ചപ്പെടുത്തുന്നു: ഇതിലടങ്ങിയിരിക്കുന്ന നാരുകൾ (Fiber) മലബന്ധം അകറ്റാനും ദഹനം സുഗമമാക്കാനും സഹായിക്കുന്നു. ഇരുമ്പ്, ബി കോംപ്ലക്സ് വിറ്റാമിനുകൾ എന്നിവ ധാരാളമായി അടങ്ങിയിട്ടുള്ളതിനാൽ വിളർച്ച (Anemia) തടയാൻ ഇത് ഉത്തമമാണ്. ആന്റിഓക്‌സിഡന്റുകൾ ധാരാളമുള്ളതിനാൽ ശരീരത്തിന്റെ പ്രതിരോധശേഷി വർദ്ധിപ്പിക്കുന്നു. പ്രകൃതിദത്തമായ പഞ്ചസാര അടങ്ങിയിരിക്കുന്നതിനാൽ രാവിലെ ഇത് കഴിക്കുന്നത് ദിവസം മുഴുവൻ ഉന്മേഷം നൽകാൻ സഹായിക്കും.

കഴിക്കേണ്ടത് ഇപ്രകാരം
ഏകദേശം 8 മുതൽ 10 വരെ ഉണക്കമുന്തിരി എടുക്കുക. അത് നന്നായി കഴുകിയ ശേഷം ഒരു ഗ്ലാസ് വെള്ളത്തിൽ രാത്രി കുതിർത്ത് വെക്കുക. അടുത്ത ദിവസം രാവിലെ വെറും വയറ്റിൽ മുന്തിരി കഴിക്കുകയും ആ വെള്ളം കുടിക്കുകയും ചെയ്യുക.

(ശ്രദ്ധിക്കുക: പ്രമേഹമുള്ളവർ (Diabetes) ഉണക്കമുന്തിരി ഉപയോഗിക്കുന്നതിന് മുൻപ് ഡോക്ടറുടെ നിർദ്ദേശം തേടുന്നത് നന്നായിരിക്കും, കാരണം ഇതിൽ പഞ്ചസാരയുടെ അളവ് കൂടുതലാണ്.)