തണുപ്പത്ത് വരണ്ട ചുണ്ടുകളിലെ തൊലി പറിച്ചെടുക്കുന്ന ശീലം നിങ്ങള്‍ക്കുണ്ടോ? ഇതാണ് അതിനുള്ള പരിഹാരം

Updated: Tuesday, December 16, 2025, 14:42 [IST]

ഡിസംബറിലെ തണുപ്പു കാലത്ത് മൂടിപ്പുതച്ചുറങ്ങാന്‍ സുഖമാണെങ്കിലും ചര്‍മത്തെ സംബന്ധിച്ച് ഇതത്ര സുഖകരമായ കാലാവസ്ഥയല്ല. സൗന്ദര്യ സംരക്ഷണം ഇഷ്ടപ്പെടുന്നവരുടെ ഏറ്റവും വലിയ വെല്ലുവിളി വരണ്ട തൊലിയും ചുണ്ടുകളുമാണ്. രാവിലെ എഴുന്നേല്‍ക്കുമ്പോള്‍ തന്നെ ചുണ്ടുകളിലെ തൊലി അടരാന്‍ പാകത്തിന് വരണ്ടതായിരിക്കും. ഈ സമയത്ത് ചുണ്ടിലെ തൊലി കടിച്ചു പറിച്ചെടുക്കുന്നത് പലരുടെയും ശീലമാണ്. എന്നാല്‍ ഇതത്ര നല്ല ശീലമല്ലെന്നാണ് ആരോഗ്യ വിദഗ്ധര്‍ പറയുന്നത്.

ചുണ്ടുകളുടെ വരള്‍ച്ചയ്ക്ക് കാലാവസ്ഥയെ മാത്രം കുറ്റം പറഞ്ഞിട്ടു കാര്യമില്ല. നമ്മുടെ ദൈനംദിന ശീലങ്ങളും ഈ പ്രശ്‌നത്തിന് കാരണമാകാമെന്ന് ത്വക്‌രോഗ വിദഗ്ധര്‍ പറയുന്നു. ചുണ്ടിലെ തൊലി പറിച്ചെടുക്കുന്നത് ചുണ്ടിന്റെ ചര്‍മ്മപാളിയെ ദോഷകരമായി ബാധിക്കും.

ചുണ്ടുകള്‍ ഉമിനീര്‍ കൊണ്ടു നനയ്ക്കുമ്പോള്‍ വരള്‍ച്ചയ്ക്ക് താല്‍ക്കാലിക ആശ്വാസം മാത്രമാണ് നല്‍കുന്നത്. ഉമിനീര്‍ ബാഷ്പീകരിക്കുമ്പോള്‍ സ്വാഭാവിക എണ്ണമയം നഷ്ടപ്പെടും. ഇത് കൂടുതല്‍ വരള്‍ച്ചയ്ക്കും ചുവപ്പിനും കാരണമാകും. ഈ ശീലം ഒഴിവാക്കാന്‍ ഒരു ലിപ്ബാം കൊണ്ട് ചുണ്ടിന് ജലാംശം നല്‍കുക.

ചുണ്ടിലെ അടര്‍ന്നുപോയ ചര്‍മ്മം കടിച്ചു പറിച്ചെടുക്കുന്ന ശീലം പുതിയ ചര്‍മ്മത്തിന് കേടുവരുത്തും. ഇത് വേദന, വീക്കം, മുറിവുകള്‍ എന്നിവയ്ക്ക് കാരണമാകാം. പകരം, മൃദുവായ തുണിയും ചെറുചൂടുവെള്ളവും ഉപയോഗിച്ച് നനച്ച് പതുക്കെ തുടച്ച്, മോയിസ്ചറൈസര്‍ പുരട്ടുക.

വായിലൂടെയുള്ള ശ്വാസമെടുപ്പ് ചുണ്ടുകള്‍ വരളുന്നതിന് ഒരു പ്രധാന കാരണമാണ്. പ്രത്യേകിച്ച് ജലദോഷം അല്ലെങ്കില്‍ അലര്‍ജി പോലുള്ള അസ്വസ്ഥതകള്‍ ഉള്ളപ്പോള്‍. ചുണ്ടുകളിലൂടെയുള്ള നിരന്തരമായ വായു പ്രവാഹം ഈര്‍പ്പം പെട്ടെന്ന് ഇല്ലാതാക്കും. തണുപ്പുള്ള രാത്രിയില്‍ വായ തുറന്ന് ഉറങ്ങുന്നത് ചുണ്ടുകളെ കൂടുതല്‍ വരണ്ടതാക്കും. വരണ്ട മുറികളില്‍ ഹ്യുമിഡിഫയര്‍ ഉപയോഗിക്കുന്നത് ഈ പ്രശ്‌നത്തിന് ഒരു പരിധി വരെ ആശ്വാസം നല്‍കും. മൂക്കടപ്പ് ചികിത്സിക്കുകയും, ധാരാളം വെള്ളം കുടിക്കുകയും ചെയ്യുന്നതും വരണ്ട ചുണ്ടുകള്‍ക്ക് പരിഹാരമാണ്.

ചില ലിപ് ബാമുകളും ലിപ്സ്റ്റിക്കുകളും സെന്‍സിറ്റീവായ ചുണ്ടുകളെ വരണ്ടതാക്കാറുണ്ട്. കടുത്ത സുഗന്ധങ്ങളും രുചികളുമാണ് ഇതിന് പ്രധാന കാരണക്കാര്‍. പുതിന, കറുവാപ്പട്ട, സിട്രസ് എന്നിവ അടങ്ങിയ സൗന്ദര്യ സംരക്ഷണ ഉല്‍പന്നങ്ങള്‍ അസ്വസ്ഥതയുണ്ടാക്കാം. സുഗന്ധമോ നിറങ്ങളോ ഇല്ലാത്ത ലിപ്ബാം തിരഞ്ഞെടുക്കുക. ഇതിനായി ലേബലുകള്‍ പരിശോധിക്കുക.

ചില ചേരുവകളെക്കുറിച്ച് ത്വക്‌രോഗ വിദഗ്ദ്ധര്‍ മുന്നറിയിപ്പ് നല്‍കാറുണ്ട്. മെന്തോള്‍ തണുപ്പ് നല്‍കുമെങ്കിലും പിന്നീട് വരള്‍ച്ചയോ അസ്വസ്ഥതയോ ഉണ്ടാക്കാം. കര്‍പ്പൂരം എരിയുന്ന അനുഭവം നല്‍കും. യൂക്കാലിപ്റ്റസ് ഓയില്‍ ചുവപ്പ് നിറത്തിനും അലര്‍ജിക്കും കാരണമാവാം. ഫ്‌ളേവറിങ് ഏജന്റുകള്‍ ചിലരില്‍ ചൊറിച്ചിലിനും വീക്കത്തിനും ഇടയാക്കും.

സൂര്യപ്രകാശത്തില്‍ നിന്നുള്ള സംരക്ഷണം ഒഴിവാക്കുന്നത് ചുണ്ടുകള്‍ക്ക് ദോഷകരമാണ്. തണുപ്പുള്ള ദിവസങ്ങളിലും പോലും ചുണ്ടുകള്‍ക്ക് പൊള്ളലേല്‍ക്കാം. താഴത്തെ ചുണ്ടിനാണ് നേരിട്ടുള്ള സൂര്യപ്രകാശം കൂടുതല്‍ ലഭിക്കുന്നത്, ഇത് അപകടസാധ്യത വര്‍ദ്ധിപ്പിക്കും. എസ്പിഎഫ് 30, അതില്‍ കൂടുതലോ ഉള്ള ലിപ് ബാം ഉപയോഗിച്ച്, പുറത്ത് പോകുമ്പോള്‍ ഓരോ രണ്ട് മണിക്കൂറിലും പുരട്ടുക.

നിര്‍ജലീകരണം വിണ്ടുകീറിയ ചുണ്ടുകളെ കൂടുതല്‍ വഷളാക്കും. വരണ്ട വായുവും ഹീറ്ററുകളും ഈ അവസ്ഥയെ തീവ്രമാക്കുന്നു. ചായയും കാപ്പിയും കൂടുതലായി കുടിക്കുന്നത് ശരീരത്തിലെ ജലാംശം കുറയ്ക്കാം. ശുദ്ധജലം കുടിക്കുന്നത് ചര്‍മ്മത്തിന്റെ സന്തുലിതാവസ്ഥ നിലനിര്‍ത്താന്‍ സഹായിക്കും. വിണ്ടുകീറിയ ചുണ്ടുകള്‍ക്ക് അസ്വസ്ഥതയുണ്ടാക്കുന്ന എരിവും ഉപ്പുമുള്ള ലഘുഭക്ഷണങ്ങള്‍ ഒഴിവാക്കുക.

ശൈത്യകാലത്ത് ഈ ലളിതമായ പരിചരണങ്ങള്‍ ചുണ്ടുകളുടെ ആരോഗ്യം മെച്ചപ്പെടുത്താന്‍ സഹായിക്കും. പെട്രോളിയം ജെല്ലി അല്ലെങ്കില്‍ ഷിയ ബട്ടര്‍ അടങ്ങിയ ലിപ് ബാം ഉറങ്ങുന്നതിന് മുമ്പും പുറത്തുപോകുന്നതിന് മുമ്പും പുരട്ടുക. ചുണ്ട് നനയ്ക്കുക, തൊലി പറിച്ചെടുക്കുക, കഠിനമായ ഉല്‍പ്പന്നങ്ങള്‍ എന്നിവ ഒഴിവാക്കുക. ചുണ്ടുകളിലെ ഗുരുതരമായ വിണ്ടുകീറലുകള്‍ക്ക് വൈദ്യസഹായം തേടുക.