അടുക്കളയിൽ കാണുന്നതെല്ലാം മുഖത്ത് തേക്കാനുളളതല്ല? ഇവ നിങ്ങൾക്ക് പണി പാലുംവെള്ളത്തിൽ തരും

ഇൻസ്റ്റഗ്രാമിൽ എവിടെ തിരിഞ്ഞാലും ബ്യൂട്ടി വ്ളോഗർമാർ മുഖസൌന്ദര്യത്തിന് പ്രകൃതിദത്തമായ മാർഗങ്ങൾ ഉപദേശിക്കുന്നത് കാണാം. മുഖത്തിന് തിളക്കം കൂട്ടാൻ അടുക്കളയിലെ പല സാധനങ്ങളും സഹായിക്കുമെന്നാണ് അവർ അവകാശപ്പെടുന്നത്. അതിൽ ഉലുവ മുതൽ ചെറുനാരങ്ങ വരെ പലതുമുണ്ട്.

മുഖത്തും ശരീരത്തിലും പ്രകൃതിദത്തമായ എന്തും ഉപയോഗിക്കുന്നത് സുരക്ഷിതമാണെന്നുള്ള തെറ്റിദ്ധാരണ സോഷ്യൽ മീഡിയയിൽ സാധാരണമാണ്. എന്നാൽ ഈ പറയുന്ന സാധനങ്ങൾ ഉപയോഗിച്ചാൽ ഫലം വിപരീതമായിരിക്കും.

മരുന്നുകൾ തിരഞ്ഞെടുക്കുമ്പോൾ നാം കൃത്യമായ ശാസ്ത്രീയ പരിശോധനകൾ ഉണ്ടോയെന്ന് നോക്കും. എന്നാൽ 15 സെക്കൻഡ് ദൈർഘ്യമുള്ള ഒരു റീൽ കണ്ടാൽ മാത്രം മതി അടുക്കളയിലെ സാധനങ്ങൾ മുഖത്ത് പരീക്ഷിക്കാൻ. "രാസവസ്തുക്കൾ" മോശമാണെന്നും "പ്രകൃതിദത്തം" സുരക്ഷിതമാണെന്നും ഇന്റർനെറ്റ് നമ്മെ തെറ്റിദ്ധരിപ്പിച്ചിരിക്കുന്നു. എന്നാൽ പല ലൈഫ്‌സ്‌റ്റൈൽ ഇൻഫ്ലുവൻസർമാരും പറയാത്ത ഒരു അപ്രിയ സത്യം, പ്രകൃതിദത്തമായ എല്ലാം സുരക്ഷിതമല്ല എന്നതാണ്. രാത്രി വൈകിയുള്ള നിങ്ങളുടെ DIY ചർമ്മസംരക്ഷണ രീതികളാകാം ഒരുപക്ഷേ നിങ്ങളുടെ ചർമ്മത്തിന്റെ സ്വാഭാവികമായ പ്രതിരോധ ശേഷിയെ തകർക്കുന്നത്.

ചർമ്മത്തിൽ നാരങ്ങാനീര് പുരട്ടുന്നത് സാധാരണമായ ഒരു പ്രവണതയാണ്. ഇത് മുഖത്തെ കറുത്ത പാടുകൾ മാറ്റി തിളക്കം നൽകുമെന്നാണ് പലരുടെയും ധാരണ. എന്നാൽ ചർമ്മത്തിന് ഏകദേശം 5 pH ലെവൽ ആകുമ്പോളാണ് അതിന് സ്വാഭാവികമായി നിലനിൽക്കാൻ കഴിയുന്നത്. നാരങ്ങയുടെ pH ഏകദേശം 2 ആണ്, ഇത് വളരെ ഉയർന്ന ആസിഡ് സ്വഭാവമുള്ളതാണ്. നാരങ്ങാനീര് മുഖത്ത് പുരട്ടുന്നത് കെമിക്കൽ ബേൺ ഉണ്ടാക്കാനും ചർമ്മത്തിന്റെ കോശങ്ങളെ നശിപ്പിക്കാനും കാരണമാകും.

കൂടാതെ, നാരങ്ങയിൽ അടങ്ങിയിരിക്കുന്ന "പ്‌സോറലെൻസ്" എന്നറിയപ്പെടുന്ന സംയുക്തങ്ങൾ സൂര്യപ്രകാശവുമായി സമ്പർക്കത്തിൽ വരുമ്പോൾ അപകടരമായ ഫൈറ്റോഫോട്ടോഡെർമറ്റൈറ്റിസിന് കാരണമാകും. ഇത് ചർമ്മത്തിൽ കുമിളകളും കടുത്ത വീക്കവും ഉണ്ടാക്കുന്നു. ഇന്ത്യൻ ചർമ്മത്തിൽ ഇത് മങ്ങാൻ മാസങ്ങളെടുക്കുന്ന കടുത്ത കറുത്ത പാടുകൾ അവശേഷിപ്പിക്കാൻ സാധ്യതയുണ്ട്.

നാരങ്ങ ആസിഡ് ദോഷമാകുമ്പോൾ, ബേക്കിംഗ് സോഡ ഒരു ആൽക്കലൈൻ ഭീഷണിയാണ്. ഇതിന്റെ pH ഏകദേശം 9 ആണ്, ഇത് ചർമ്മത്തിന് വളരെ ദോഷകരമാണ്. ഒരു അത്ഭുതകരമായ എക്സ്ഫോളിയേറ്ററായി പലരും ഇതിനെ വീക്ഷിക്കുന്നുണ്ടെങ്കിലും, ഇത് ചർമ്മത്തിന്റെ ആസിഡ് മാന്റിലിനെ നശിപ്പിക്കുന്നു. ചർമ്മത്തിന്റെ pH ബലംപ്രയോഗിച്ച് വർദ്ധിപ്പിക്കുമ്പോൾ, ചർമ്മത്തിന് സ്വയം പ്രതിരോധിക്കാൻ ആവശ്യമായ അവശ്യ കൊഴുപ്പുകൾ ഇല്ലാതാകുന്നു. ഇത് മുഖക്കുരുവിനും അമിത വരൾച്ചയ്ക്കും എണ്ണമയത്തിനും വഴിതെളിയിക്കും.

ചില ആളുകൾ ടീ ട്രീ ഓയിലും ലാവെൻഡർ വെള്ളവും മുഖത്ത് നേരിട്ട് ഉപയോഗിക്കാറുണ്ട്. സുരക്ഷിതമെന്ന് തോന്നാമെങ്കിലും, അവ വളരെ സാന്ദ്രീകരിച്ച സസ്യ രാസവസ്തുക്കളാണ്. ചർമ്മത്തിൽ നേരിട്ട് ഉപയോഗിക്കുമ്പോൾ അലർജിക് കോൺടാക്റ്റ് ഡെർമറ്റൈറ്റിസ് ഉണ്ടാകാൻ സാധ്യതയുണ്ട്. ലിനാലൂൾ പോലുള്ള സംയുക്തങ്ങൾ കടുത്ത സെൻസിറ്റൈസേഷൻ ഉണ്ടാക്കാം. വിഷാധി ഒരു പ്രകൃതിദത്ത സസ്യമാണെങ്കിലും അത് ശരീരത്തിന് ദോഷകരമാകുന്നത് പോലെതന്നെയാണ് ഈ രാസവസ്തുക്കളുടെയും പ്രവർത്തനം.

അതുപോലെ, പഞ്ചസാരയും കാപ്പിപ്പൊടിയും ഉപയോഗിച്ചുള്ള സ്ക്രബ്ബുകൾ ചർമ്മത്തിന് ദോഷകരമാണ്. മുഖത്തെ ചർമ്മം വളരെ ലോലമായതിനാൽ, മൈക്രോസ്കോപ്പിന് കീഴിൽ പഞ്ചസാരയുടെയും കാപ്പിപ്പൊടിയുടെയും കണികകൾ മൂർച്ചയുള്ള ഗ്ലാസ് കഷണങ്ങൾ പോലെയാണ് കാണപ്പെടുന്നത്. ഇവ മുഖത്ത് ഉരയ്ക്കുന്നത് സൂക്ഷ്മമായ മുറിവുകൾക്ക് കാരണമാകും. ഇത് ചർമ്മത്തിലെ ജലാംശം നഷ്ടപ്പെടുത്തുകയും അകാല വാർദ്ധക്യത്തിന് കാരണമാകുകയും ചെയ്യും. ഈ സ്ക്രബ്ബുകൾ കൈമുട്ടുകൾ പോലുള്ള ശരീരഭാഗങ്ങളിൽ മാത്രം ഉപയോഗിക്കുന്നതാണ് ഉചിതം.

മുട്ടയുടെ വെള്ള, ഓട്‌സ് പേസ്റ്റുകൾ തുടങ്ങിയ ഫ്രഷ് ചേരുവകൾ ഉപയോഗിക്കുന്നതിലും അപകടമുണ്ട്. വാണിജ്യപരമായ ചർമ്മസംരക്ഷണ ഉൽപ്പന്നങ്ങളിൽ സൂക്ഷ്മജീവികളുടെ വളർച്ച തടയാൻ പ്രിസർവേറ്റീവുകൾ ചേർക്കുന്നു. എന്നാൽ വീട്ടിൽ ഉണ്ടാക്കുന്ന മിശ്രിതങ്ങളിൽ ഇത് ഇല്ലാത്തതിനാൽ സാൽമൊണെല്ല പോലുള്ള അണുബാധകൾക്ക് സാധ്യതയുണ്ട്. 48 മണിക്കൂറിനുള്ളിൽ ഈ മിശ്രിതങ്ങൾ ബാക്ടീരിയയുടെ വിളനിലമായി മാറും. കേടുവന്ന ഭക്ഷണ പദാർത്ഥങ്ങൾ ചർമ്മത്തിൽ പുരട്ടുന്നത് ഫംഗസ് അണുബാധകൾക്കും കുരുക്കൾക്കും വഴിവെക്കും. നിങ്ങളുടെ അടുക്കള പാചകത്തിനുള്ളതാണ്, അല്ലാതെ ചർമ്മസംരക്ഷണ പരീക്ഷണങ്ങൾക്കുള്ളതല്ലെന്ന് മറക്കരുത്.

English summary

The article examines why using kitchen ingredients for skin care can be unsafe, debunking myths about natural products. It highlights risks from lemon juice, baking soda, essential oils, and DIY scrubs, and advises safer, evidence-based approaches.