വിണ്ടുകീറിയ കാല്പാദങ്ങള് കാരണം വിഷമിക്കുകയാണോ? രാത്രി ഈ എണ്ണ തേച്ചുകിടക്കൂ
മലയാളികളുടെ ഭക്ഷണ ക്രമത്തില് അത്ര പരിചിതമല്ലാത്ത ഒരു എണ്ണയാണ് കടുകെണ്ണ. വടക്കേ ഇന്ത്യയില് വ്യാപകമായി ഭക്ഷ്യവിഭവങ്ങളില് ചേര്ക്കുന്ന കടുകെണ്ണയുടെ രുചി പലപ്പോഴും മലയാളികള്ക്ക് പിടിക്കാറില്ല. എന്നാല് കടുകെണ്ണയെ അത്ര നിസാരമായി തള്ളിക്കളയേണ്ട. ഒരുപാട് സൗന്ദര്യ പ്രശ്നങ്ങള്ക്ക് പ്രകൃതിദത്തമായ പരിഹാരമുണ്ടാക്കാന് കടുകെണ്ണയ്ക്കു കഴിയും. അതിനാല് ഒരു കുപ്പി വാങ്ങി അലമായ്ക്കുള്ളില് സൂക്ഷിച്ചാലും നഷ്ടമുണ്ടാകില്ല.
കടുക് ചെടിയുടെ വിത്തുകളില് നിന്ന് വേര്തിരിക്കുന്ന കടുകെണ്ണ നൂറ്റാണ്ടുകളായി ഉത്തരേന്ത്യന് വീടുകളിലെ പാചകത്തില് ഒരു പ്രധാന ഘടകമാണ്. ഉത്തരേന്ത്യന് വിഭവങ്ങളില് മികച്ച സുഗന്ധവും രുചിയും നല്കുന്ന ഈ എണ്ണയ്ക്ക് നിരവധി ആരോഗ്യ ഗുണങ്ങളുമുണ്ട്.
കടുകെണ്ണയുടെ ശ്രദ്ധേയമായ ഉപയോഗങ്ങളിലൊന്ന് വിണ്ടുകീറിയ കാല്പാദങ്ങള്ക്കും പരുക്കനായ കാല്മുട്ടുകള്ക്കും കൈമുട്ടുകള്ക്കും പരിഹാരമുണ്ടാക്കാനുള്ള അതിന്റെ കഴിവാണ്. കടുകെണ്ണയുടെ കട്ടിയുള്ള ഘടനയും അതില് അടങ്ങിയിട്ടുള്ള വിറ്റാമിന് ഇയും കാലുകള്ക്കും കൈമുട്ടുകള്ക്കും ആഴത്തിലുള്ള ഈര്പ്പം നല്കുന്നു, ഇത് വരണ്ടതും കേടായതുമായ ചര്മ്മത്തെ നന്നാക്കാന് സഹായിക്കുന്നു. പതിവായി പുരട്ടുന്നതിലൂടെ ചര്മ്മത്തില് മികച്ച പുരോഗതിയുണ്ടാകുന്നത് അനുഭവിച്ച് അറിയാന് കഴിയും.
കടുകെണ്ണയില് അടങ്ങിയിട്ടുള്ള ആന്റി-ഇന്ഫ്ളമേറ്ററി, മോയ്സ്ചറൈസിങ്, ആന്റിമൈക്രോബയല് ഗുണങ്ങളാണ് പാദങ്ങളിലെ വിണ്ടുകീറല് തടയുന്നത്. അതിനാല് പാദ സംരക്ഷണ ദിനചര്യയില് ഒഴിച്ചുകൂടാനാവാത്ത ഒന്നാണ് കടുകെണ്ണ.
മികച്ച ഗുണം ലഭിക്കാന് കടുകെണ്ണ രാത്രിയില് പുരട്ടുന്നതാണ് നല്ലത്. ഉറങ്ങുന്നതിനു മുമ്പ് കാല്പാദങ്ങളിലെ വിണ്ടുകീറിയ ഭാഗങ്ങളില് അല്പം കടുക് എണ്ണ പുരട്ടി മസാജ് ചെയ്യുക. ഈര്പ്പം നിലനിര്ത്താന് കോട്ടണ് സോക്സ് ധരിച്ച് ആ ഭാഗം മൂടുക. ഈ രീതി രാത്രി മുഴുവന് ചര്മ്മത്തെ മൃദുവാക്കാനും വിള്ളലുകളും വരള്ച്ചയും കുറയ്ക്കാനും സഹായിക്കും.
വരണ്ട ചര്മ്മം പരിഹരിക്കുന്നതിനു പുറമേ, കടുകെണ്ണ അതിന്റെ ആന്റിഫംഗല് ഗുണങ്ങള്ക്കും പേരുകേട്ടതാണ്. ചര്മ്മത്തിലെ അണുബാധകള് തടയാന് കടുകെണ്ണ ഉപയോഗിക്കാറുണ്ട്. ഇതുകൂടാതെ മുടി സംരക്ഷണത്തിനും കടുകെണ്ണ ഉപയോഗിക്കാറുണ്ട്. ഇത് തലയോട്ടിയുടെ ആരോഗ്യം മെച്ചപ്പെടുത്തുകയും താരന് കുറയ്ക്കുകയും ചെയ്യുന്നു.
ഹൃദയാരോഗ്യത്തിന് ഗുണം ചെയ്യുന്ന മോണോസാച്ചുറേറ്റഡ്, പോളിഅണ്സാച്ചുറേറ്റഡ് കൊഴുപ്പുകള് കടുകെണ്ണയില് ധാരാളമായി അടങ്ങിയിട്ടുണ്ട്. ഇതില് ഒമേഗ-3, ഒമേഗ-6 ഫാറ്റി ആസിഡുകളും അടങ്ങിയിട്ടുണ്ട്. ആരോഗ്യകരമായ ചര്മ്മവും മുടിയും നിലനിര്ത്തുന്നതിന് ഈ ഘടകങ്ങള് അത്യന്താപേക്ഷിതമാണ്.
കടുകെണ്ണ ഗുണകരമാണെങ്കിലും, ഉപയോഗിക്കുന്നതിനു മുമ്പ് ചര്മത്തില് ഒരു ടെസ്റ്റ് നടത്തേണ്ടത് അത്യാവശ്യമാണ്. ചില വ്യക്തികള്ക്ക് അലര്ജി ഉണ്ടാകാന് സാധ്യതയുണ്ട്. ഈ സാഹചര്യത്തില് ഒരു ഡെര്മറ്റോളജിസ്റ്റിന്റെ മാര്ഗനിര്ദേശം തേടുന്നത് നല്ലതാണ്. ചര്മ്മസംരക്ഷണ ദിനചര്യയില് കടുകെണ്ണ ഉള്പ്പെടുത്തുന്നത് ഫലപ്രദമായ ഫലങ്ങള് നല്കുമെന്ന കാര്യത്തില് സംശയമില്ല.
Click it and Unblock the Notifications
Sign in with Google