വസ്ത്രത്തിലെ മഞ്ഞ വിയർപ്പ് കറ എത്ര കഴുകിയിട്ടും മായുന്നില്ലേ? ഈ ചെറിയ ട്രിക്ക് നിങ്ങളെ സഹായിക്കും
സാധാരണ ഡിറ്റർജന്റുകൾ ഉപയോഗിച്ച് എത്രയധികം തിരുമ്മി കഴുകിയാലും വസ്ത്രങ്ങളിലെ വിയർപ്പ് പാടുകൾ പൂർണ്ണമായി മാറിക്കൊള്ളണമെന്നില്ല. ഇതിനായി സവിശേഷമായ ഒരു വഴി തന്നെയുണ്ട്; 'എൻസൈം അടങ്ങിയ ഡിറ്റർജന്റുകൾ' ഉപയോഗിക്കുക എന്നത്.
വസ്ത്രങ്ങളിൽ നിറവ്യത്യാസവും ദുർഗന്ധവും ഉണ്ടാക്കുന്ന വിയർപ്പ്, ശരീരത്തിലെ എണ്ണമയം, ഡിയോഡറന്റ് അവശിഷ്ടങ്ങൾ എന്നിവയെ എളുപ്പത്തിൽ ഇല്ലാതാക്കാൻ ഇത് സഹായിക്കും. യഥാർത്ഥത്തിൽ വിയർപ്പിന് നിറമില്ല. എന്നാൽ കാലക്രമേണ വിയർപ്പിലുള്ള പ്രോട്ടീനുകളും ഉപ്പും എണ്ണമയവും നമ്മൾ ഉപയോഗിക്കുന്ന ഡിയോഡറന്റുകളുമായി രാസപ്രവർത്തനത്തിൽ ഏർപ്പെടുമ്പോഴാണ് വസ്ത്രങ്ങളിൽ മഞ്ഞപ്പാടുകൾ രൂപപ്പെടുന്നത്.
എൻസൈം അടങ്ങിയ ഡിറ്റർജന്റുകൾ ഒരു ജൈവ ഉൽപ്രേരകമായി പ്രവർത്തിക്കുകയും ഈ പ്രോട്ടീൻ, കൊഴുപ്പ് സംയുക്തങ്ങളെ തകർക്കുകയും ചെയ്യുന്നു. സാധാരണ സോപ്പുകൾ വസ്ത്രത്തിന് മുകളിലൂടെ മാത്രം വൃത്തിയാക്കുമ്പോൾ, ഇവ തുണിയുടെ നാരുകളിലേക്ക് ഇറങ്ങിച്ചെന്ന് കഠിനമായ പാടുകളെ രാസപരമായി ഇല്ലാതാക്കുന്നു. ജിം വസ്ത്രങ്ങളിലോ സ്പോർട്സ് വസ്ത്രങ്ങളിലോ ആണ് പാടുകളെങ്കിൽ ഒരു 'സ്പോർട്സ് ഡിറ്റർജന്റ്' തിരഞ്ഞെടുക്കുന്നതാവും നല്ലത്. കാരണം ഇത്തരം തുണിത്തരങ്ങളിൽ കോട്ടൺ വസ്ത്രങ്ങളേക്കാൾ കൂടുതൽ ദുർഗന്ധം തങ്ങിനിൽക്കാറുണ്ട്.
മഞ്ഞപ്പാടുകൾ എങ്ങനെ കഴുകിക്കളയാം?
തുണികൾ വാഷിംഗ് മെഷീനിലേക്ക് ഇടുന്നതിന് മുൻപ് ചെയ്യുന്ന കാര്യങ്ങളും വളരെ പ്രധാനമാണ്. വെറുതെ കഴുകിയതുകൊണ്ട് മാത്രം ഈ കഠിനമായ പാടുകൾ മാറില്ല. അതിനായി താഴെ പറയുന്ന കാര്യങ്ങൾ ചെയ്യുക:
നേരത്തെ പുരട്ടി വെക്കുക
പാടുള്ള ഭാഗത്ത് നേരിട്ട് അല്പം ലിക്വിഡ് ഡിറ്റർജന്റോ എൻസൈം അടങ്ങിയ സ്റ്റെയിൻ റിമൂവറോ കൈവിരലുകൾ ഉപയോഗിച്ചോ മൃദുവായ ബ്രഷ് ഉപയോഗിച്ചോ തേച്ചുപിടിപ്പിക്കുക. നിർദ്ദേശങ്ങളിൽ പറഞ്ഞിരിക്കുന്ന അത്രയും സമയം ഇത് വെയ്ക്കുക.
കുതിർത്തു വെക്കുക
വളരെ പഴക്കമുള്ളതോ കഠിനമായതോ ആയ പാടുകളാണെങ്കിൽ കൂടുതൽ സമയം കുതിർത്തു വെക്കണം. ചെറുചൂടുവെള്ളത്തിൽ കുറച്ച് ഡിറ്റർജന്റ് കലക്കി, തുണി കഴുകുന്നതിന് മുൻപ് 30 മുതൽ 60 മിനിറ്റ് വരെ അതിൽ മുക്കിവെക്കുക.
വെള്ളത്തിന്റെ ചൂട് ക്രമീകരിക്കുക
വസ്ത്രത്തിന്റെ ലേബലിൽ പറഞ്ഞിരിക്കുന്നതനുസരിച്ച്, ആ തുണിക്ക് താങ്ങാൻ കഴിയുന്ന ഏറ്റവും ഉയർന്ന ചൂടുവെള്ളത്തിൽ കഴുകുക. കഠിനമായ പാടുകൾ ഇളകിപ്പോകാൻ ചൂടുവെള്ളം സഹായിക്കും.
ഉണക്കുന്നതിന് മുൻപ് പരിശോധിക്കുക
തുണികൾ ഡ്രയറിലിട്ട് ഉണക്കുന്നതിന് മുൻപ് നല്ല വെളിച്ചത്തിൽ പരിശോധിച്ച് പാടുകൾ മാറിയിട്ടുണ്ടെന്ന് ഉറപ്പുവരുത്തുക. പാടുകൾ പൂർണ്ണമായി മാറുന്നതിന് മുൻപ് ഡ്രയറിലെ ചൂടേറ്റാൽ ആ മഞ്ഞപ്പാട് വസ്ത്രത്തിൽ സ്ഥിരമായി നിലനിൽക്കും. പാടുകൾ ബാക്കിയുണ്ടെങ്കിൽ ഉണക്കാൻ വെക്കാതെ വീണ്ടും മുകളിൽ പറഞ്ഞ രീതിയിൽ കഴുകുക.
ശരിയായ രീതിയിൽ നേരത്തെ കറ കളയാൻ ശ്രമിക്കുകയും ശ്രദ്ധയോടെ കഴുകുകയും ചെയ്താൽ വസ്ത്രങ്ങളുടെ ഭംഗിയും ആയുസ്സും ദീർഘകാലം നിലനിർത്താൻ സാധിക്കും.
Click it and Unblock the Notifications
Sign in with Google