ഹൃദയസ്തംഭനത്തിന് മിനിറ്റുകൾക്ക് മുൻപുള്ള ലക്ഷണങ്ങൾ! മനസ്സിലാക്കാം ജീവൻ രക്ഷിക്കാം

പെട്ടെന്നുണ്ടാകുന്ന ഹൃദയസ്തംഭനം (Sudden Cardiac Arrest) ഇന്നത്തെ കാലത്ത് വലിയൊരു ആരോഗ്യ ഭീഷണിയായി മാറിക്കൊണ്ടിരിക്കുകയാണ്. പലപ്പോഴും യാതൊരു മുന്നറിയിപ്പുമില്ലാതെയാണ് ഇത് സംഭവിക്കുന്നതെന്ന് കരുതാറുണ്ടെങ്കിലും, മിക്കവാറും സന്ദർഭങ്ങളിൽ ശരീരം മുൻകൂട്ടി ചില സൂചനകൾ നൽകാറുണ്ട്. ഈ ലക്ഷണങ്ങൾ കൃത്യസമയത്ത് തിരിച്ചറിയുന്നത് ഒരാളുടെ ജീവൻ രക്ഷിക്കാൻ സഹായിക്കും. മിനിറ്റുകൾക്കോ മണിക്കൂറുകൾക്കോ അല്ലെങ്കിൽ ദിവസങ്ങൾക്കോ ​​മുമ്പ് തന്നെ ശരീരം നൽകുന്ന ഈ മുന്നറിയിപ്പുകളെക്കുറിച്ച് വിദഗ്ധർ നൽകുന്ന നിർദ്ദേശങ്ങൾ ശ്രദ്ധേയമാണ്.

ശ്രദ്ധിക്കേണ്ട പ്രധാന ലക്ഷണങ്ങൾ

ഹൃദയസ്തംഭനം സംഭവിക്കുന്നതിന് മിനിറ്റുകൾക്ക് മുൻപ് ചിലർക്ക് അസാധാരണമായ നെഞ്ചുവേദനയോ അസ്വസ്ഥതയോ അനുഭവപ്പെടാം. ഇത് കേവലം അസിഡിറ്റിയാണെന്ന് കരുതി പലരും തള്ളിക്കളയാറുണ്ട്. കാരണമില്ലാത്ത ശ്വാസംമുട്ടൽ, ഹൃദയമിടിപ്പ് അമിതമായി കൂടുകയോ ക്രമം തെറ്റുകയോ ചെയ്യുക, പെട്ടെന്നുണ്ടാകുന്ന തലകറക്കം, ബോധക്ഷയം എന്നിവ ഗൗരവമായി കാണണം. അമിതമായ ക്ഷീണം, അകാരണമായി വിയർക്കുക, ഓക്കാനം, നെഞ്ചിന് മുകളിൽ വലിയൊരു ഭാരം അനുഭവപ്പെടുക എന്നിവയും ഹൃദയസ്തംഭനത്തിന്റെ മുന്നോടിയാകാം. ഉത്കണ്ഠയോ ക്ഷീണമോ ആണെന്ന് കരുതി ഇത്തരം ലക്ഷണങ്ങളെ അവഗണിക്കുന്നത് വലിയ അപകടത്തിന് കാരണമാകും.

ഒറ്റയ്ക്കാണെങ്കിൽ എന്ത് ചെയ്യണം?

ഹൃദയസ്തംഭനം സംഭവിക്കുമ്പോൾ ഒരാൾ തനിച്ചാണെങ്കിൽ സഹായത്തിനായി വിളിക്കാൻ വളരെ ചുരുങ്ങിയ സമയം മാത്രമേ ലഭിക്കുകയുള്ളൂ. നെഞ്ചിൽ കടുത്ത വേദനയോ ശ്വാസംമുട്ടലോ അനുഭവപ്പെട്ടാൽ ഒട്ടും വൈകാതെ എമർജൻസി സർവീസിനെയോ സുഹൃത്തുക്കളെയോ വിളിക്കണം. ബോധരഹിതനാകുന്നതിന് മുൻപുള്ള ആ നിമിഷങ്ങൾ നിർണ്ണായകമാണ്. സാധിക്കുമെങ്കിൽ വീടിന്റെ പ്രധാന വാതിൽ തുറന്നിടാൻ ശ്രദ്ധിക്കണം, ഇത് സഹായത്തിനെത്തുന്നവർക്ക് പ്രവേശനം എളുപ്പമാക്കും. രക്തയോട്ടം നിലച്ചാൽ 4 മുതൽ 6 മിനിറ്റിനുള്ളിൽ മസ്തിഷ്കത്തിന് ക്ഷതം സംഭവിക്കാൻ സാധ്യതയുള്ളതിനാൽ ഓരോ സെക്കൻഡും പ്രധാനമാണ്.

ഹൃദ്രോഗം, പ്രമേഹം, ഉയർന്ന രക്തസമ്മർദ്ദം എന്നിവയുള്ളവർക്ക് ഹൃദയസ്തംഭന സാധ്യത കൂടുതലാണ്. കൂടാതെ കുടുംബത്തിൽ ആർക്കെങ്കിലും പെട്ടെന്നുള്ള ഹൃദയസ്തംഭനം ഉണ്ടായ ചരിത്രമുണ്ടെങ്കിൽ കൂടുതൽ ജാഗ്രത പാലിക്കണം. കൃത്യമായ ഇടവേളകളിൽ ഹൃദയപരിശോധന നടത്തുന്നത് രോഗസാധ്യത മുൻകൂട്ടി അറിയാൻ സഹായിക്കും. ലക്ഷണങ്ങൾ നിസാരമെന്ന് തോന്നിയാലും ഉടൻ വൈദ്യസഹായം തേടുക എന്നത് മാത്രമാണ് ജീവൻ നിലനിർത്താനുള്ള ഏക പോംവഴി. ആരോഗ്യകരമായ ജീവിതശൈലിയും വ്യായാമവും ഹൃദയാരോഗ്യം മെച്ചപ്പെടുത്താൻ സഹായിക്കും.