വെള്ളുത്തുള്ളി ഇത്ര വലിയ ഉപകാരിയോ? അതും ഈ കൊടുംവേദനയ്ക്ക്

അടുക്കളയിലെ ഏറ്റവും നല്ല മരുന്നാണ് വെളുത്തുള്ളി. വിഭവങ്ങള്‍ക്ക് രുചി കൂട്ടാന്‍ വെളുത്തുള്ളി നല്ലൊരു ചേരുവയാണ്. അതോടൊപ്പം നിരവധി ആരോഗ്യ ഗുണങ്ങളും വെളുത്തുള്ളിക്കുണ്ട്. രോഗപ്രതിരോധ ശേഷി വര്‍ധിപ്പിക്കാനും രക്തസമ്മര്‍ദം കുറയ്ക്കാനും ഒക്കെ വെളുത്തുള്ളി സഹായിക്കും എന്ന് പഠനങ്ങളില്‍ കണ്ടെത്തിയിട്ടുണ്ട്. വെളുത്തുള്ളിയില്‍ ആന്റി ഓക്‌സിഡന്റുകളും വിറ്റാമിന്‍ സിയും ധാരാളം അടങ്ങിയിട്ടുണ്ട്. ഇത് രോഗപ്രതിരോധശേഷി വര്‍ധിപ്പിക്കാന്‍ സഹായിക്കും. ദഹന സംബന്ധമായ പ്രശ്‌നങ്ങള്‍ക്കും വെളുത്തുള്ളി മികച്ച പരിഹാരമാണ്. ബാക്ടീരിയ, ഫംഗസ് പോലുള്ള രോഗാണുക്കളെ നേരിടാനും വെളുത്തുള്ളി നല്ലൊരു പോരാളിയാണ്.

വേദനകളില്‍ ഏറ്റവും കടുപ്പമേറിയതാണ് പല്ലുവേദന. മോണയിലെ വീക്കം, അണുബാധ, പല്ലിലെ ദ്വാരങ്ങള്‍ എന്നിവയൊക്കെ പല്ലുവേദനയ്ക്ക് കാരണങ്ങളാണ്. ഇന്നത്തെ കാലത്ത് ജീവിതരീതിയിലുണ്ടായ താളപ്പിഴകള്‍ മൂലം ദന്താരോഗ്യ പ്രശ്‌നങ്ങള്‍ നേരിടുന്നവര്‍ നിരവധിയാണ്. അതിനു നിരവധി കാരണങ്ങളുമുണ്ട്. പല്ലുകളുടെ ശുചിത്വമില്ലായ്മ, വായിലെ അണുബാധ, മധുര പലഹാരങ്ങളുടെ അമിത ഉപഭോഗം, മറ്റ് ആരോഗ്യ പ്രശ്‌നങ്ങള്‍ എന്നിവയൊക്കെ ദന്താരോഗ്യ പ്രശ്‌നങ്ങള്‍ വര്‍ധിക്കാന്‍ കാരണമായിട്ടുണ്ട്. എപ്പോഴും മിഠായിയും പലഹാരങ്ങളും കഴിക്കുന്നതു മൂലം ഏറ്റവും വേഗത്തില്‍ കേടാകുന്നത് പല്ലുകളാണ്.

പല്ലുവേദന കൂടിയാന്‍ ദന്ത ഡോക്ടറെ കാണുന്നതാണ് ഏറ്റവും അഭികാമ്യം. എങ്കിലും അടിയന്തര സാഹചര്യങ്ങളില്‍ സഹായിക്കുന്ന വീട്ടുവൈദ്യങ്ങളുണ്ട്. അതില്‍ ആശ്രയിക്കാന്‍ പറ്റിയ ഏറ്റവും മികച്ച മാര്‍ഗമാണ് വെളുത്തുള്ളി. പല്ലുവേദനയ്ക്ക് കുറവുണ്ടാകാനും ദന്താരോഗ്യ പ്രശ്‌നങ്ങള്‍ വര്‍ധിക്കാതിരിക്കാനും വെളുത്തുള്ളി ഉപകരിക്കും.

വെളുത്തുള്ളിക്ക് ആന്റി ബാക്ടീരിയല്‍, ആന്റിമൈക്രോബയല്‍ ഗുണങ്ങളുണ്ട്. പല്ലുവേദനയ്ക്ക് കാരണമാകുന്ന അണുക്കളെ നശിപ്പിക്കാന്‍ ഇവയ്ക്കു കഴിയും. വേദനയുണ്ടാക്കുന്ന ബാക്ടീരിയകളെ കൊല്ലുന്നതിനൊപ്പം പ്രകൃതിദത്ത വേദനസംഹാരിയായി പ്രവര്‍ത്തിക്കുകയും ചെയ്യുന്നു.

കേടായ പല്ലില്‍ തൊലികളഞ്ഞ വെളുത്തുള്ളി അല്ലി വച്ച് നന്നായി ചവയ്ക്കുക. വെളുത്തുള്ളിയില്‍ അലിസിന്‍ എന്ന സംയുക്തം അടങ്ങിയിട്ടുണ്ട്. ഇത് വേദനയ്ക്ക് കാരണമാകുന്ന ബാക്ടീരിയകളെ നശിപ്പിക്കുന്നു.

വെളുത്തുള്ളി അല്ലികള്‍ ഒരു മിക്‌സി ഉപയോഗിച്ചോ അല്ലെങ്കില്‍ ഒരു സ്പൂണിന്റെ പിന്‍ഭാഗം ഉപയോഗിച്ചോ നന്നായി ചതയ്ക്കുക. അല്‍പം ഉപ്പ് കൂടി ചേര്‍ത്ത് പേസ്റ്റ് രൂപത്തിലാക്കാം. ഇനി ഈ പേസ്റ്റ് നേരിട്ട് വേദനയുള്ള പല്ലില്‍ വയ്ക്കാം. ഇത് ദീര്‍ഘനേരം പ്രയോഗിക്കാന്‍ കഴിയുന്നില്ലെങ്കില്‍, വിരല്‍ത്തുമ്പോ പഞ്ഞിയോ ഉപയോഗിച്ച് കേടു ബാധിച്ച പല്ലില്‍ വെളുത്തുള്ളി പേസ്റ്റ് പുരട്ടുക. ഇതില്‍ ആന്റിമൈക്രോബയല്‍ ഗുണങ്ങള്‍ ഉണ്ട്. അത് അണുബാധയെ ചെറുക്കുകയും മോണ വീക്കം ഒഴിവാക്കുകയും ചെയ്യുന്നു.