വാലന്റൈൻ ദിനത്തിൽ 'റൊമാന്റിക്' ഈ സമ്മാനമാണ്! 86% ഇന്ത്യക്കാരും ആഗ്രഹിക്കുന്നത് ഇതാണ്

പ്രണയദിനത്തിൽ പ്രിയപ്പെട്ടവർക്ക് നൽകാൻ പൂക്കളും ചോക്ലേറ്റുകളും സമ്മാനങ്ങളും തേടി അലയുന്നവർ ഒന്നറിയുക, ഇന്ത്യൻ സഞ്ചാരികളുടെ മുൻഗണനകൾ മാറുകയാണ്. പുതിയ പഠനങ്ങൾ പ്രകാരം, 86 ശതമാനം ഇന്ത്യക്കാരും തങ്ങളുടെ പങ്കാളി ഒരു യാത്ര സർപ്രൈസായി പ്ലാൻ ചെയ്യുന്നതിനെയാണ് ഏറ്റവും ആകർഷകമായ അല്ലെങ്കിൽ 'സെക്സി'യായ കാര്യമായി കാണുന്നത്. Booking.com പുറത്തുവിട്ട പുതിയ സർവ്വേ റിപ്പോർട്ടിലാണ് വിചിത്രവും എന്നാൽ രസകരവുമായ ഈ വിവരങ്ങളുള്ളത്.

യാത്ര പ്ലാൻ ചെയ്യുന്ന പങ്കാളിയാണ് 'താരം'

പങ്കാളി മുൻകൈ എടുത്ത് ടിക്കറ്റുകളും താമസസൗകര്യങ്ങളും ബുക്ക് ചെയ്ത് ഒരു പൂർണ്ണമായ യാത്ര ഒരുക്കുന്നത് പ്രണയബന്ധങ്ങളെ കൂടുതൽ ദൃഢമാക്കുമെന്നാണ് ഭൂരിഭാഗം ആളുകളും വിശ്വസിക്കുന്നത്. പ്രത്യേകിച്ച് സ്ത്രീകളാണ് ഇത്തരമൊരു 'ഇനിഷ്യേറ്റീവ്' പങ്കാളിയിൽ നിന്നും ആഗ്രഹിക്കുന്നത്. സർവ്വേയിൽ പങ്കെടുത്ത 76 ശതമാനം ഇന്ത്യൻ സ്ത്രീകളും വിശ്വസിക്കുന്നത് വിനോദയാത്രകൾ പ്ലാൻ ചെയ്യുന്നതിന്റെ ചുമതല പുരുഷന്മാർ ഏറ്റെടുക്കണമെന്നാണ്. പങ്കാളി എല്ലാം പ്ലാൻ ചെയ്യുമ്പോൾ തങ്ങൾ കൂടുതൽ സ്നേഹിക്കപ്പെടുന്നതായും സുരക്ഷിതരായും അനുഭവപ്പെടുന്നുവെന്ന് 92 ശതമാനം സ്ത്രീകളും അഭിപ്രായപ്പെട്ടു.

എന്തുകൊണ്ട് യാത്രകൾ പ്രിയപ്പെട്ടതാകുന്നു?

ഹണിമൂൺ വരെ കാത്തിരിക്കാതെ, പ്രണയകാലത്ത് തന്നെ ഒരുമിച്ച് യാത്ര ചെയ്യുന്നത് പരസ്പരം കൂടുതൽ മനസ്സിലാക്കാൻ സഹായിക്കുമെന്ന് വിദഗ്ധർ ചൂണ്ടിക്കാട്ടുന്നു. പങ്കാളിയുടെ താൽപ്പര്യങ്ങൾ തിരിച്ചറിയാനും ഒരുമിച്ചുള്ള നിമിഷങ്ങൾ ആഘോഷിക്കാനും യാത്രകൾ മികച്ച അവസരമാണ് നൽകുന്നത്. എന്നാൽ യാത്രകൾ പ്ലാൻ ചെയ്യുന്നതിലെ പിഴവുകളെക്കുറിച്ചുള്ള ആശങ്ക കാരണം പലരും ഇതിന് മടിക്കുന്നുണ്ട്.

പ്രിയപ്പെട്ട വിനോദസഞ്ചാര കേന്ദ്രങ്ങൾ

ഈ വാലന്റൈൻ സീസണിൽ ഹോട്ടൽ ബുക്കിംഗുകളിൽ 175 ശതമാനത്തിന്റെ വർദ്ധനവാണ് രേഖപ്പെടുത്തിയിരിക്കുന്നത്. ഇന്ത്യയ്ക്കകത്തും പുറത്തുമായി നിരവധി ഇടങ്ങളാണ് സഞ്ചാരികൾ തിരഞ്ഞെടുക്കുന്നത്.

പോണ്ടിച്ചേരി: കടൽതീരവും ഫ്രഞ്ച് ശൈലിയിലുള്ള തെരുവുകളും കൊണ്ട് പോണ്ടിച്ചേരിയാണ് ലിസ്റ്റിൽ ഒന്നാമത്. ഇവിടെ താമസസൗകര്യങ്ങൾക്കായുള്ള തിരച്ചിലിൽ 48 ശതമാനത്തിന്റെ വർദ്ധനവുണ്ടായി.

വർക്കല: കേരളത്തിലെ വർക്കലയിലേക്കും സഞ്ചാരികളുടെ ഒഴുക്കുണ്ട്. കടൽതീരത്തെ ക്ലിഫ് കഫേകളും പ്രകൃതിഭംഗിയും വർക്കലയെ റൊമാന്റിക് ഇടമാക്കി മാറ്റുന്നു (41% വർദ്ധനവ്).

ഉദയ്പൂർ: കൊട്ടാരങ്ങളുടെയും തടാകങ്ങളുടെയും നഗരമായ ഉദയ്പൂർ ഇന്നും പ്രണയിതാക്കളുടെ പ്രിയപ്പെട്ട കേന്ദ്രമാണ്.

അന്താരാഷ്ട്ര തലത്തിൽ ദുബായ്, ഹോങ്കോംഗ് എന്നിവയ്ക്കൊപ്പം കൊളംബോയും പുതിയ ട്രെൻഡായി മാറിക്കൊണ്ടിരിക്കുകയാണ്. പരമ്പരാഗത ഡിന്നർ ഡേറ്റുകളെക്കാൾ പ്രിയപ്പെട്ടവർക്കൊപ്പം പുതിയ ഇടങ്ങൾ തേടിപ്പോകാനാണ് ആധുനിക ഇന്ത്യ ആഗ്രഹിക്കുന്നത്. ചുരുക്കത്തിൽ, ഈ പ്രണയദിനത്തിൽ പങ്കാളിയുടെ ഹൃദയം കീഴടക്കാൻ ഒരു ലളിതമായ യാത്ര പ്ലാൻ ചെയ്യുന്നതിനേക്കാൾ വലിയൊരു സമ്മാനമില്ലെന്ന് സാരം.