പുതുതായി വാങ്ങിയ വസ്ത്രങ്ങള്‍ അലക്കാറുണ്ടോ? കഴുകിയാല്‍ ഈ ഗുണങ്ങളുണ്ട്

പുതിയ വസ്ത്രങ്ങള്‍ വാങ്ങിയ ഉടന്‍ തന്നെ അവ ധരിക്കാനായിരിക്കും എല്ലാവരും ആഗ്രഹിക്കുന്നത്. പുതുമയോടെയുള്ള വസ്ത്രത്തിന് നല്ലൊരു സുഗന്ധവും ഉണ്ടാകും. എന്നാല്‍ കാണാന്‍ ഭംഗിയുള്ളതാണെങ്കിലും പുതിയ വസ്ത്രങ്ങള്‍ അത്ര ശുദ്ധമായിരിക്കണമെന്നില്ല എന്നതാണ് യാഥാര്‍ത്ഥ്യം. വസ്ത്രങ്ങള്‍ നിര്‍മ്മാണശാലകളില്‍ നിന്നും നമ്മുടെ കൈകളില്‍ എത്തുന്നതുവരെ നിരവധി ഘട്ടങ്ങളിലൂടെ കടന്നുപോകുന്നുണ്ട്. വസ്ത്രങ്ങള്‍ നിര്‍മ്മിക്കുമ്പോള്‍ അവ ചുളിയാതിരിക്കാനും ഭംഗി നിലനിര്‍ത്താനും ഫോര്‍മാല്‍ഡിഹൈഡ് റെസിനുകള്‍, സ്റ്റാര്‍ച്ച് തുടങ്ങിയ വിവിധ രാസവസ്തുക്കള്‍ ഉപയോഗിക്കാറുണ്ട്. ഇവ തുണിത്തരങ്ങളില്‍ അവശേഷിക്കുന്നത് ചര്‍മ്മത്തിന് അലര്‍ജിയുണ്ടാക്കാന്‍ കാരണമായേക്കാം.

ഇതുകൂടാതെ കടകളില്‍ പ്രദര്‍ശിപ്പിച്ചിരിക്കുന്ന വസ്ത്രങ്ങള്‍ പലരും ധരിച്ചു നോക്കാറുള്ളതിനാല്‍ ബാക്ടീരിയകളും വൈറസുകളും ഫംഗസുകളും അവയില്‍ പറ്റിപ്പിടിക്കാന്‍ സാധ്യതയുണ്ട്. വസ്ത്രങ്ങള്‍ കഴുകുന്നതിലൂടെ ഇത്തരം അണുക്കളെയും അധികമായുള്ള ഡൈ അഥവാ ചായത്തെയും നീക്കം ചെയ്യാന്‍ സാധിക്കും. ശുചിത്വത്തിന് പുറമെ വസ്ത്രത്തിന്റെ സുഖകരമായ ഫിറ്റിംഗിനും ആദ്യത്തെ കഴുകല്‍ സഹായിക്കുന്നു. നിര്‍മ്മാണ വേളയില്‍ വസ്ത്രങ്ങള്‍ വലിയ തോതില്‍ വലിച്ചു മുറുക്കി വെക്കാറുണ്ട്. ഇവ കഴുകുമ്പോള്‍ ആ മുറുക്കം മാറുകയും വസ്ത്രം അതിന്റെ സ്വാഭാവിക രൂപത്തിലേക്ക് മാറുകയും ചെയ്യുന്നു. പ്രത്യേകിച്ച് കോട്ടണ്‍ വസ്ത്രങ്ങള്‍ ആദ്യത്തെ അലക്കലില്‍ അല്‍പം ചുരുങ്ങാന്‍ സാധ്യതയുള്ളതിനാല്‍ കഴുകി ഉപയോഗിക്കുന്നതാണ് ഉചിതം.

എങ്കിലും എല്ലാ വസ്ത്രങ്ങളും ഇത്തരത്തില്‍ കഴുകേണ്ടതില്ല. ചര്‍മ്മവുമായി നേരിട്ട് സമ്പര്‍ക്കം പുലര്‍ത്താത്ത ജാക്കറ്റുകള്‍ പോലെയുള്ള പുറംവസ്ത്രങ്ങള്‍ കഴുകിയില്ലെങ്കിലും വലിയ കുഴപ്പമില്ല. അതുപോലെ 'ഡ്രൈ ക്ലീന്‍ ഒണ്‍ലി' എന്ന് രേഖപ്പെടുത്തിയ വസ്ത്രങ്ങള്‍ സാധാരണ രീതിയില്‍ കഴുകുന്നത് തുണിയുടെ ഗുണമേന്മ നശിപ്പിക്കും. കടുംനിറത്തിലുള്ള വസ്ത്രങ്ങള്‍, പ്രത്യേകിച്ച് ജീന്‍സുകള്‍ ആദ്യത്തെ തവണ ധരിക്കുമ്പോള്‍ അവയിലെ നിറം നമ്മുടെ ചര്‍മ്മത്തിലേക്കോ മറ്റ് വസ്ത്രങ്ങളിലേക്കോ പടരാന്‍ സാധ്യതയുണ്ട്.

വസ്ത്രങ്ങള്‍ സുരക്ഷിതമായി അലക്കുന്നതിനായി എപ്പോഴും അവയിലെ കെയര്‍ ലേബലുകള്‍ ശ്രദ്ധിക്കേണ്ടതാണ്. തണുത്ത വെള്ളത്തില്‍ കഴുകുന്നതും തണലത്തിട്ട് ഉണക്കുന്നതും വസ്ത്രങ്ങളുടെ നിറം മങ്ങാതിരിക്കാനും അവ നശിക്കാതെ ദീര്‍ഘകാലം നിലനില്‍ക്കാനും സഹായിക്കും. ആദ്യത്തെ കുറച്ച് തവണ കടുംനിറത്തിലുള്ള വസ്ത്രങ്ങള്‍ മറ്റ് വസ്ത്രങ്ങള്‍ക്കൊപ്പം കഴുകാതിരിക്കുന്നതാണ് നല്ലത്. വസ്ത്രങ്ങള്‍ വായുവില്‍ ഉണക്കുന്നത് വഴി അവയുടെ ഇലാസ്തികത നഷ്ടപ്പെടാതെ സൂക്ഷിക്കാം