വെറും 5 മാസം കൊണ്ട് 30 കിലോ കുറച്ചു; ഫിറ്റ്നസ് കോച്ചിന്റെ ആ 'രഹസ്യ പ്ലാൻ' ഇതാ!

ഭാരം കുറയ്ക്കാൻ ശ്രമിക്കുന്ന ഭൂരിഭാഗം ആളുകളും പരാജയപ്പെടുന്നത് അവർക്ക് അച്ചടക്കമില്ലാത്തത് കൊണ്ടല്ല, മറിച്ച് തുടക്കത്തിൽ തന്നെ കഠിനമായ വഴികൾ തിരഞ്ഞെടുത്ത് ശരീരം തളർന്നുപോകുന്നത് കൊണ്ടാണ്. ഫിറ്റ്‌നസ് ഇൻഡസ്ട്രി പലപ്പോഴും തുറന്നുപറയാത്ത ഈ യാഥാർത്ഥ്യം സ്വന്തം ജീവിതത്തിലൂടെ അനുഭവിച്ചറിഞ്ഞ വ്യക്തിയാണ് പ്രമുഖ ഫാറ്റ് ലോസ് കോച്ചായ അഞ്ജലി സച്ചാൻ. കഠിനമായ ഓട്ടമോ മണിക്കൂറുകളോളം നീളുന്ന ജിം വർക്കൗട്ടുകളോ ഇല്ലാതെ, കൃത്യമായ ആസൂത്രണത്തിലൂടെ വെറും 5 മാസങ്ങൾ കൊണ്ട് 84 കിലോയിൽ നിന്ന് 54 കിലോയിലേക്ക് തന്റെ ശരീരഭാരം കുറയ്ക്കാൻ അഞ്ജലിക്ക് സാധിച്ചു. താൻ നിലനിൽക്കുന്ന അവസ്ഥയെ പൂർണ്ണമായി ഉൾക്കൊണ്ടു കൊണ്ട് പടിപടിയായി മാത്രം വ്യായാമം കൂട്ടുക എന്ന തത്വമാണ് അവർ ഇതിനായി ഉപയോഗിച്ചത്.

തുടക്കം വളരെ ലളിതമായിരിക്കണം

വെയ്റ്റ് ലോസ് യാത്രയുടെ ആദ്യ ഘട്ടത്തിൽ ദിവസവും വെറും 4,000 സ്റ്റെപ്പുകൾ മാത്രമാണ് അഞ്ജലി നടന്നത്. ദിവസവും 10,000 സ്റ്റെപ്പുകൾ നടക്കണം എന്ന പൊതുധാരണയ്ക്ക് തികച്ചും വിപരീതമാണിത്. അമിതഭാരമുള്ള ഒരു ശരീരം പെട്ടെന്ന് 10,000 സ്റ്റെപ്പുകൾ നടക്കാൻ ശ്രമിക്കുമ്പോൾ സന്ധികളിലും പേശികളിലും കടുത്ത വേദനയും തളർച്ചയുമുണ്ടാകുകയും, അവർ ആ ശ്രമം പാതിവഴിയിൽ ഉപേക്ഷിക്കുകയും ചെയ്യും. അതുകൊണ്ട് ആദ്യ ഘട്ടത്തിന്റെ ലക്ഷ്യം ഫാറ്റ് ലോസ് അല്ല, മറിച്ച് ശരീരം വ്യായാമവുമായി പൊരുത്തപ്പെടുക എന്നത് മാത്രമാണ്.

പടിപടിയായി വേഗത കൂട്ടുക

ആദ്യ ഘട്ടത്തിൽ ശരീരം പാകപ്പെട്ടതിന് ശേഷം മാത്രമാണ് അടുത്ത ഘട്ടങ്ങളിലേക്ക് കടക്കേണ്ടത്.

Phase 2: ദിവസവും 8,000 സ്റ്റെപ്പുകൾ നടക്കുക. ഇതിനൊപ്പം ആഴ്ചയിൽ ഒരു ദിവസം വിയർത്തു കുളിക്കാതെ, സാധാരണ രീതിയിൽ സംസാരിച്ചുകൊണ്ട് നടക്കാൻ സാധിക്കുന്ന തരത്തിലുള്ള 'സോൺ 2 കാർഡിയോ' (Zone 2 cardio) വ്യായാമം ചെയ്യുക.

Phase 3: ദിവസേനയുള്ള നടത്തം 10,000 മുതൽ 12,000 സ്റ്റെപ്പുകൾ വരെയാക്കുക. ഒപ്പം ആഴ്ചയിൽ രണ്ട് സോൺ 2 കാർഡിയോ സെഷനുകൾ ഉൾപ്പെടുത്തുക.

Phase 4: ദിവസവും 15,000 സ്റ്റെപ്പുകളിലേക്ക് മാറുക.

Phase 5: ഏറ്റവും അവസാനത്തെ ഈ അഡ്വാൻസ്ഡ് ഘട്ടത്തിൽ ദിവസവും 20,000 സ്റ്റെപ്പുകൾ നടക്കുകയും ആഴ്ചയിൽ മൂന്ന് തവണ സോൺ 2 കാർഡിയോ വ്യായാമങ്ങൾ ചെയ്യുകയും വേണം.

ഓരോ ഘട്ടവും മുൻപത്തെ ഘട്ടം വിജയകരമായി പൂർത്തിയാക്കിയതിന് ശേഷം മാത്രം ചെയ്യുന്നതുകൊണ്ട് സന്ധികൾക്ക് കൂടുതൽ ബലമുണ്ടാകുകയും ശരീരം വേഗത്തിൽ വീണ്ടെടുക്കപ്പെടുകയും ചെയ്യും.

പലരും മറന്നുപോകുന്ന പ്രധാന കാര്യം
കാർഡിയോ വ്യായാമം ചെയ്യുന്നത് കൊണ്ട് മാത്രം ശരീരത്തിലെ കൊഴുപ്പ് കുറയില്ലെന്ന് അഞ്ജലി സച്ചാൻ വ്യക്തമാക്കുന്നുണ്ട്. ശരീരത്തിലെ കലോറി നിയന്ത്രിക്കുക വഴി മാത്രമാണ് ഫാറ്റ് ലോസ് സാധ്യമാകുന്നത്. നമ്മൾ കഴിക്കുന്ന ഭക്ഷണത്തേക്കാൾ കൂടുതൽ കലോറി ശരീരം എരിച്ചുകളയുമ്പോഴാണ് ഭാരം കുറയുന്നത്. കാർഡിയോ വ്യായാമം എന്നത് കൂടുതൽ കലോറി എരിച്ചുകളയാൻ സഹായിക്കുന്ന ഒരു ഉപകരണം മാത്രമാണ്.

വെയ്റ്റ് ലോസ് എന്നത് ഒറ്റരാത്രികൊണ്ട് സംഭവിക്കുന്ന അത്ഭുതമല്ല. കൃത്യമായ ഭക്ഷണക്രമം, നല്ല ഉറക്കം, ശരിയായ വിശ്രമം എന്നിവയോടൊപ്പം ക്ഷമയോടെയുള്ള തുടർച്ചയായ ശ്രമങ്ങളുണ്ടെങ്കിൽ ഏതൊരാൾക്കും അമിതഭാരം പൂർണ്ണമായി കുറയ്ക്കാൻ സാധിക്കുമെന്ന് അഞ്ജലി സച്ചാന്റെ ജീവിതം തെളിയിക്കുന്നു.