ജിമ്മും, ഡയറ്റും വേണ്ട! ഒരു വർഷം കൊണ്ട് യുവതി കുറചത് 35 കിലോ; അത്ഭുത ശീലങ്ങൾ അറിയാം

ശരീരഭാരം കുറയ്ക്കാൻ ആഗ്രഹിക്കുന്നവർ ഇന്ന് സോഷ്യൽ മീഡിയയിൽ തിരയുന്നത് പലപ്പോഴും ചെലവേറിയ ഡയറ്റ് പ്ലാനുകളോ കഠിനമായ വ്യായാമമുറകളോ അല്ലെങ്കിൽ വിലകൂടിയ ഹെൽത്ത് ഫുഡുകളോ ആണ്. എന്നാൽ യഥാർത്ഥത്തിൽ വണ്ണം കുറയ്ക്കാൻ സഹായിക്കുന്നത് ഇത്തരം അത്ഭുത വിദ്യകളല്ല, മറിച്ച് നമ്മുടെ നിത്യജീവിതത്തിൽ വരുത്തുന്ന വളരെ ലളിതവും എന്നാൽ ചിലർക്കെങ്കിലും 'ബോറിങ്' ആയി തോന്നിയേക്കാവുന്നതുമായ ചില ചെറിയ മാറ്റങ്ങളാണ്. വെറും ഒരു വർഷം കൊണ്ട് 35 കിലോ ശരീരഭാരം കുറച്ച ഇൻസ്റ്റാഗ്രാം കണ്ടന്റ് ക്രിയേറ്ററായ യുവതി പങ്കുവെച്ച ചില പ്രായോഗിക ശീലങ്ങൾ ഇപ്പോൾ സോഷ്യൽ മീഡിയയിൽ വലിയ ചർച്ചയാവുകയാണ്. പെട്ടെന്ന് വണ്ണം കുറയ്ക്കാനുള്ള കുറുക്കുവഴികൾക്ക് പിന്നാലെ പോകാതെ, സ്ഥിരമായി കൊണ്ടുനടക്കാൻ സാധിക്കുന്ന 6 ലളിതമായ ജീവിതശൈലീ മാറ്റങ്ങളാണ് ശാവി തന്റെ വെയിറ്റ് ലോസ് ജേർണിയിലൂടെ പരിചയപ്പെടുത്തുന്നത്.

വണ്ണം കുറച്ച ആറ് ശീലങ്ങൾ

1. കുടുംബത്തോടൊപ്പമുള്ള അത്താഴം താൽക്കാലികമായി ഒഴിവാക്കി

തന്റെ വണ്ണക്കുറയ്ക്കൽ യാത്രയിൽ ശാവി എടുത്ത താൽക്കാലികമായ ഒരു തീരുമാനമായിരുന്നു ഇത്. ഫിറ്റ്നസ് ലക്ഷ്യങ്ങൾ ഇല്ലാത്ത കുടുംബാംഗങ്ങൾ തന്റെ ഡയറ്റ് ഭക്ഷണങ്ങളെക്കുറിച്ച് നിരന്തരം കമന്റുകൾ പറയുന്നത് ഒഴിവാക്കാനും, ഭക്ഷണത്തിലുള്ള ശ്രദ്ധ തിരിയാതിരിക്കാനും വേണ്ടിയാണ് ശാവി ആ ഘട്ടത്തിൽ തനിച്ച് ഭക്ഷണം കഴിക്കാൻ തിരഞ്ഞെടുത്തത്.

2. അത്താഴത്തിന് ശേഷം ഉടൻ തന്നെ പല്ല് തേക്കും

അന്നത്തെ ദിവസത്തെ ഭക്ഷണം കഴിക്കൽ അവസാനിച്ചു എന്ന് തലച്ചോറിന് നൽകുന്ന ഔദ്യോഗികമായ ഒരു സിഗ്നലായിരുന്നു ഈ പല്ല് തേക്കൽ. രാത്രിയിൽ പിന്നീട് എന്തെങ്കിലും കഴിക്കാൻ തോന്നിയാൽ വീണ്ടും പല്ല് തേക്കേണ്ടി വരും എന്ന മടി കാരണം അനാവശ്യമായ ലഘുഭക്ഷണങ്ങൾ കഴിക്കുന്ന ശീലം പൂർണ്ണമായും ഇല്ലാതാക്കാൻ ഇതിലൂടെ സാധിച്ചു.

3. സ്ക്രീൻ നോക്കിക്കൊണ്ട് ഭക്ഷണം കഴിക്കില്ല

ടിവിയോ ഫോണോ ലാപ്‌ടോപ്പോ നോക്കിക്കൊണ്ട് ഭക്ഷണം കഴിക്കുമ്പോഴാണ് പലരും അമിതമായി ആഹാരം കഴിക്കുന്നത് എന്ന് ശാവി കണ്ടെത്തി. അതുകൊണ്ട് ഫോൺ ഉപയോഗിക്കാതെ മാത്രമേ ലഘുഭക്ഷണങ്ങൾ കഴിക്കാവൂ എന്നൊരു നിയമം അവർ സ്വയം ഉണ്ടാക്കി. സ്ക്രീൻ ഇല്ലെങ്കിൽ പലപ്പോഴും ലഘുഭക്ഷണങ്ങളോടുള്ള താല്പര്യം തനിയെ നഷ്ടപ്പെടുമെന്ന് ശാവി പറയുന്നു.

4. ഭക്ഷണത്തോടുള്ള കൊതി അടിച്ചമർത്തിയില്ല, മാറ്റിവെച്ചു

ഇഷ്ടപ്പെട്ട ഏതെങ്കിലും ഭക്ഷണം കണ്ടാൽ "ഇത് ഇനി ജീവിതത്തിൽ കഴിക്കില്ല" എന്ന് സ്വയം പറഞ്ഞു വിലക്കുന്നതിന് പകരം, "എനിക്ക് ഇത് നാളെ കഴിക്കാം" എന്ന് മനസ്സിനെ പറഞ്ഞ് പഠിപ്പിച്ചു. ഈ ഒരു ചെറിയ ചിന്താഗതി ഡയറ്റിങ് മൂലമുണ്ടാകുന്ന മാനസിക സമ്മർദ്ദം കുറയ്ക്കാനും ഭക്ഷണത്തോടുള്ള അമിതമായ ആർത്തി നിയന്ത്രിക്കാനും സഹായിച്ചു.

5. പ്രോട്ടീൻ അടങ്ങിയ ലഘുഭക്ഷണങ്ങൾ എപ്പോഴും തയ്യാറാക്കി വെച്ചു

വിശപ്പ് തോന്നുമ്പോൾ പെട്ടെന്ന് വറുത്തതോ പൊരിച്ചതോ ആയ ആഹാരങ്ങളിലേക്ക് പോകാതിരിക്കാൻ ആരോഗ്യകരമായ പ്രോട്ടീൻ ഭക്ഷണങ്ങൾ ശാവി എപ്പോഴും ഫ്രിഡ്ജിൽ കരുതിയിരുന്നു. വറുത്ത കടല, സോയ ചങ്ക്സ്, പനീർ, ചീസ്, പുഴുങ്ങിയ മുട്ടകൾ എന്നിവ എപ്പോഴും കൈയെത്തും ദൂരത്ത് വെച്ചതോടെ ഹെൽത്തി ചോയ്സുകൾ തിരഞ്ഞെടുക്കുന്നത് എളുപ്പമായി മാറി.

6. സോഷ്യൽ മീഡിയയിലെ ഭക്ഷണ വീഡിയോകൾക്ക് 'നോട്ട് ഇൻട്രസ്റ്റഡ്' നൽകി

തന്റെ ഇൻസ്റ്റാഗ്രാം, യൂട്യൂബ് ഫീഡുകളിൽ വന്നിരുന്ന ഭക്ഷണ വീഡിയോകളും ഫുഡ് വ്ലോഗുകളും ശാവി പൂർണ്ണമായും ഒഴിവാക്കി. ഇത്തരം വീഡിയോകൾ കാണുമ്പോൾ 'Not Interested' ഓപ്ഷൻ നൽകി. ഭക്ഷണവുമായി ബന്ധപ്പെട്ട ദൃശ്യങ്ങൾ കാണുന്നത് കുറഞ്ഞതോടെ അനാവശ്യമായി ഭക്ഷണം കഴിക്കാനുള്ള തോന്നലുകളും ഗണ്യമായി കുറഞ്ഞു.

നമ്മുടെ ദൈനംദിന ജീവിത സാഹചര്യങ്ങളിലും ശീലങ്ങളിലും വരുത്തുന്ന ഇത്തരം ചെറിയ മാറ്റങ്ങൾ സ്ഥിരമായി കൊണ്ടുനടന്നാൽ വലിയ രീതിയിൽ ശരീരഭാരം കുറയ്ക്കാൻ സാധിക്കുമെന്നാണ് ശാവിയുടെ ഈ വിജയം തെളിയിക്കുന്നത്.