തടിച്ചി വിളി ഇനി കേൾക്കേണ്ടി വരില്ല; ശരീര ഭാരം കുറക്കാൻ ഇതാ എളുപ്പ വഴി, പട്ടിണി കിടക്കേണ്ട കാര്യമേ ഇല്ല

Updated: Tuesday, February 6, 2024, 16:17 [IST]

കഷ്ടപ്പെട്ട് പട്ടിണി കിടന്ന് തടി കുറക്കാനുള്ള തീവ്ര ശ്രമത്തിലാണെങ്കിൽ ഇപ്പോൾ തന്നെ അത് അവസാനിപ്പിച്ചേക്ക്, കാരണം നിങ്ങളെ കാത്തിരിക്കുന്നത് വലിയ ആരോഗ്യ പ്രശ്നങ്ങളായിരിക്കും. ആരോഗ്യകരമായ ഭക്ഷണം ഉൾപ്പെടുത്തിയുള്ള ഡയറ്റുകളാണ് ഡയറ്റീഷ്യൻമാരും നിർദ്ദേശക്കുന്നത്. കൊഴുപ്പടങ്ങിയ ഭക്ഷണങ്ങൾ മിതമായി കഴിച്ചാൽ അത് ഭാരം കുറക്കാനുള്ള നിങ്ങളുടെ യാത്രയെ ഏറെ സുഗമമാക്കും. അത്തരത്തിലുള്ള ചില ഭക്ഷണങ്ങൾ പരിചയപ്പെടാം.

അവക്കാഡോ

വലിയ മധുരമോ മറ്റ് രുചികളോ ഇല്ലാത്തത് കൊണ്ട് തന്നെ അവക്കാഡോ പൊതുവെ ആളുകൾക്ക് പ്രിയമല്ല. എന്നാൽ ശരീരഭാരം നിയന്ത്രിക്കാൻ വളരെ അധികം സഹായിക്കുന്ന ഭക്ഷണമാണ് അവക്കാഡോ. ആരോഗ്യകരമായ കൊഴുപ്പ് കൂടുതലാണെങ്കിലും, അവോക്കാഡോയിൽ നാരുകളും കുറഞ്ഞ കാർബോഹൈഡ്രേറ്റുകളും അടങ്ങിയിട്ടുണ്ട്. ഇത് വയർ നിറഞ്ഞിരിക്കുന്നതായി തോന്നാൻ നമ്മളെ സഹായിക്കും. സാലഡിനൊപ്പമോ ടോസ്റ്റുകളിലോ സ്മൂത്തികളിലോ അവക്കാഡോ ചേർത്ത് കഴിക്കാം.

ചിയ വിത്തുകൾ

ചിയ വിത്തുകൾ ഒമേഗ -3 കൊഴുപ്പുകൾ, നാരുകൾ, പ്രോട്ടീൻ എന്നിവയാൽ സമ്പന്നമാണ്. കഴിക്കുമ്പോൾ, അവ ദ്രാവകം ആഗിരണം ചെയ്യുകയും ആമാശയത്തിൽ വികസിക്കുകയും ചെയ്യുന്നു. ഇത് വിശപ്പ് ഇല്ലാതാക്കുന്നു.തൈര്, ഓട്ട്മീൽ എന്നിവയിൽ ചിയ വിത്തുകൾ ചേർത്ത് കഴിക്കാം.

വിത്തുകൾ

ഫ്ളാക്സ് സീഡുകൾ, മത്തൻ വിത്തുകൾ, സൂര്യകാന്തി വിത്തുകൾ എന്നിവ ആരോഗ്യകരമായ കൊഴുപ്പുകൾ, നാരുകൾ, ആൻ്റിഓക്‌സിഡൻ്റുകൾ എന്നിവയാൽ സമ്പന്നമാണ്. ഈ വിത്തുകൾ കഴിക്കുമ്പോൾ അത് പൂർണ്ണത നൽകുന്നു. സലാഡുകൾ, തൈര്, അല്ലെങ്കിൽ സ്മൂത്തികളിൽ ചേർത്ത് കഴിക്കാം.

കൊഴുപ്പ് അടങ്ങിയ മീനുകൾ

സാൽമൺ, മത്തി, ട്രൗട്ട്, അയല എന്നിവ ഒമേഗ -3 ഫാറ്റി ആസിഡുകളുടെ മികച്ച ഉറവിടങ്ങളാണ്. ഈ കൊഴുപ്പുകൾ വിശപ്പ് നിയന്ത്രിക്കാനും കൊഴുപ്പ് കത്തുന്നത് പ്രോത്സാഹിപ്പിക്കുകയും ചെയ്യുന്നു. എന്ന് വെച്ച് എണ്ണയിൽ പൊരിച്ച് കഴിക്കരുത് കേട്ടോ. ഗ്രിൽ ചെയ്തോ അല്ലെങ്കിൽ ആവിയിൽ വേവിച്ചോ കഴിക്കുന്നതാണ് ഉചിതം.

ഫുൾ ഫാറ്റ് യോഗേർട്ട്

കൊഴുപ്പ് കുറഞ്ഞ പാലുൽപ്പന്നങ്ങൾ ശരീരഭാരം കുറയ്ക്കാൻ വളരെയധികം സഹായിക്കും. അതേസമയം കൊഴുപ്പ് കൂടിയ തൈര് പോലുള്ളവ കഴിക്കുമ്പോൾ അത് വയറ് നിറഞ്ഞിരിക്കാൻ സഹായിക്കുകയും അതുവഴി കലോറി ഉപഭോഗം കുറയ്ക്കുകയും ചെയ്യുമെന്ന് പഠനങ്ങൾ സൂചിപ്പിക്കുന്നു. പഴങ്ങളും പച്ചക്കറികളും ചേർത്ത് തൈര് കഴിക്കുന്നത് ആരോഗ്യകരമാണ്. ലഘുഭക്ഷണമായി ഇത് ഉൾപ്പെടുത്താം.

നട്സ്

ബദാം, വാൽനട്ട്, പിസ്ത, അണ്ടിപ്പരിപ്പ് എന്നിവ ആരോഗ്യകരമായ കൊഴുപ്പും പ്രോട്ടീനും നാരുകളും അടങ്ങിയ ഭക്ഷണങ്ങളാണ്. അതേസമയം അണ്ടിപ്പരിപ്പിൽ താരതമ്യേന കൊഴുപ്പ് കൂടുതലാണെന്നതിനാൽ മിതമായി കഴിക്കുന്നതായിരിക്കും ഉചിതം.