ഭാരം കുറക്കാൻ എന്തിന് പട്ടിണി കിടക്കണം?; അധികം കഷ്ടപ്പെടാതെ തടി താനെ കുറയും..ഇതാ പോംവഴി

Updated: Sunday, December 3, 2023, 17:52 [IST]

ഭാരം കുറയ്ക്കാൻ ഓടിയും ചാടിയും പട്ടിണി കിടുന്നുമെല്ലാം കഷ്ടപ്പെടുന്നവരായിരിക്കും നമ്മളിൽ പലരും. എന്നാൽ അതൊന്നും ചിലപ്പോൾ ഫലം ചെയ്യില്ലെന്ന് മാത്രമല്ല മറ്റ് ചില ആരോഗ്യ പ്രശ്നങ്ങൾ ഉണ്ടാക്കുകയും ചെയ്യും. എന്നാൽ അധികം കഷ്ടപ്പെടാതെ തന്നെ തടികുറക്കാനുള്ള ചില വഴികൾ നോക്കിയാലോ? പരീക്ഷിച്ച് നോക്കാം ഈ സൂപ്പ്. വെറുതെ എന്തെങ്കിലുമൊരു സൂപ്പ് അല്ല കേട്ടോ. ആരോഗ്യപ്രദമാണെന്ന് മാത്രമല്ല അമിത വിശപ്പിനെ ഇത് പമ്പകടത്തും അതുവഴി ആരോഗ്യകരമായ ഭക്ഷണശീലം പിന്തുടരാനും നിങ്ങളെ സഹായിക്കും. വിശദമായി അറിയാം

ശരീരഭാരം കുറയ്ക്കാൻ സൂപ്പ് നല്ലതാണോ?

തണുത്ത് വിറച്ച് നിൽക്കുമ്പോൾ ഒരു പാത്രം സൂപ്പ് കിട്ടിയാൽ കുടിക്കാത്തവരായി ആരാണുള്ളത്. സൂപ്പുകൾ വളരെ ആരോഗ്യപ്രദമാണെന്നാണ് കണക്കാക്കപ്പെടുന്നത്. എന്നാൽ എല്ലാ സൂപ്പുകളും അങ്ങനെയല്ല കേട്ടോ. സാധാരണഗതിയിൽ എല്ലാവരും കഴിക്കുന്ന സൂപ്പാണ് തക്കാളി സൂപ്പ്. എന്നാൽ ഇതിൽ ക്രീം ചേർത്ത് കഴിച്ചാലോ? തെറ്റായ ഫലം ചെയ്യും. ക്രീം ഇല്ലാത്ത സൂപ്പുകളാകട്ടെ വളരെ ബോറും. ആരോഗ്യവും രുചിയും ഒരുപോലെ നൽകുന്ന സൂപ്പുകൾ വേണം തിരഞ്ഞെടുക്കാൻ. ഇന്ന് അത്തരത്തിലുള്ള ഒരു വെജ് കോൺ സൂപ്പ് പരിചയപ്പെടാം.

ശരീരഭാരം കുറയ്ക്കാൻ സൂപ്പ് നല്ലതാണോ എന്ന് ചോദിച്ചാൽ ഇത് നിങ്ങൾ കഴിക്കുന്ന സൂപ്പിനെ ആശ്രയിച്ചിരിക്കും എന്നതാണ് ഉത്തരം. കൃത്യമായ പോഷകങ്ങൾ നൽകുന്ന കുറഞ്ഞ കലോറിയുള്ള സൂപ്പകളാണ് ഉപയോഗിക്കുന്നതെങ്കിൽ അതാണ് ഏറ്റവും നല്ലത്. ഈ വെജ് കോൺ സൂപ്പിൽ കാർബോഹൈഡ്രേറ്റ് കുറവാണ് മാതമല്ല ഉയർന്ന പ്രോട്ടീനും ഉള്ളതിനാൽ അത്താഴത്തിനൊക്കെ മികച്ചൊരു വിഭവമാണ്. കാരറ്റ്, ബ്രോക്കോളി, കാബേജ്, കോട്ടേജ് ചീസ് തുടങ്ങിയവയാണ് ഇതിന് ഉപയോഗിക്കുന്നത്. പ്രതിരോധശേഷി വർദ്ധിപ്പിക്കാൻ സഹായിക്കുന്ന ഘടകങ്ങളാണ് ഇവ. ഓട്സ് ഉപയോഗിക്കുന്നത് കൊണ്ട് തന്നെ വയറ് നിറഞ്ഞിരിക്കാനും സഹായിക്കുന്നു.

ഇനി തയ്യാറാക്കുന്നത് എങ്ങനെയെന്ന് നോക്കാം. ഡയറ്റീഷ്യൻ പ്രീതി ഗുപ്ത തന്റെ ഇൻസ്റ്റാഗ്രാം ഹാൻഡിൽ പങ്കുവെച്ച കുറിപ്പ് ഇങ്ങനെ

ബീൻസ്, കാബേജ്, കാരറ്റ്, ബ്രൊക്കോളി, കോൺ എന്നിവ നന്നായി തിളപ്പിച്ചെടുക്കാം. അതിനുശേഷം 2 ടീസ്പൂൺ ഓട്സ് പൊടി കുറച്ച് വെള്ളത്തിൽ ചേർത്ത് യോജിപ്പിച്ചെടുത്ത് ഇതിലേക്ക് ചേർക്കുക. അതിന് ശേഷം ആവശ്യത്തിന് ഉപ്പ്, കുരുമുളക് എന്നിവ ചേർത്ത് കൊടുക്കാം. പച്ചക്കറികൾ വേവുമ്പോൾ ഇതിലേക്ക് വെളുത്തുള്ളി, പനീർ , വേവിച്ച ബ്രൊക്കോളി എന്നിവ ചേർത്ത് കൊടുത്ത് ചൂടോടെ കഴിക്കാം.