ദീര്ഘനേരം ഇരുന്ന് ജോലി ചെയ്യുന്നവരാണോ? പണി പിന്നാലെ വരുന്നുണ്ട്, ഇക്കാര്യം ശ്രദ്ധിക്കണം
ദിവസവും ദീർഘനേരം ഇരുന്നു ജോലി ചെയ്യുന്നത് ശരീരത്തിന് വലിയ പ്രയാസമുണ്ടാക്കും. പേശികൾ നിശ്ചലമാവുകയും കണ്ണുകൾക്ക് ക്ഷീണം വരുകയും രക്തയോട്ടം കുറയുകയും ചെയ്യും. ഈ മാറ്റങ്ങൾ പലരും അവഗണിക്കുന്നു. ഡോക്ടർമാർ ഇതിനെ 'സിറ്റിംഗ് ഡിസീസ്' അഥവാ 'ഇരിപ്പ് രോഗം' എന്ന് വിശേഷിപ്പിക്കുന്നു.
മണിക്കൂറുകളോളം ഇരിക്കുമ്പോൾ തോളുകൾക്ക് കനം, നടുവേദന, നന്നായി ഉറങ്ങിയിട്ടും ഉച്ചഭക്ഷണത്തിന് ശേഷം ഉറക്കം എന്നിവ അനുഭവപ്പെടാം. ശരീരം ചലനം ആവശ്യപ്പെടുന്നു എന്നതിൻ്റെ ചെറിയ സൂചനകളാണിവ. ഇടുപ്പിലെ പേശി മുറുക്കം, കഴുത്ത് വേദന, ഇടയ്ക്കിടെയുള്ള തലവേദന, കണങ്കാലുകളിൽ വീക്കം, മാനസിക തളർച്ച എന്നിവയാണ് 'ഇരിപ്പ് രോഗത്തിൻ്റെ' പ്രധാന ലക്ഷണങ്ങൾ. ഇവ അമിത ഇരിപ്പ് മൂലമുള്ള ദീർഘകാല ആരോഗ്യപ്രശ്നങ്ങളുടെ സാധ്യതയും സൂചിപ്പിക്കുന്നു.
ദീർഘനേരം ഇരിക്കുന്നത് ഇടുപ്പിലെ പേശികൾക്ക് മുറുക്കമുണ്ടാക്കും. സ്ക്രീനിന് മുന്നിൽ കുനിഞ്ഞിരിക്കുന്നത് കഴുത്ത് വേദനയ്ക്ക് കാരണമാവാം. കണ്ണിന് പ്രയാസവും തെറ്റായ ശരീരനിലയും തലവേദന വരുത്തും. രക്തയോട്ടം മന്ദഗതിയിലാകുന്നത് കണങ്കാൽ വീക്കത്തിന് ഇടയാക്കും. വ്യായാമക്കുറവും സൂര്യപ്രകാശമില്ലായ്മയും മാനസിക തളർച്ചയ്ക്കും വഴിയൊരുക്കും.
കൂടുതൽ സമയം ഇരിക്കുമ്പോൾ കാലുകളിലെ വലിയ പേശികളുടെ പ്രവർത്തനം കുറയും. ഇത് രക്തത്തിലെ പഞ്ചസാരയുടെയും കൊഴുപ്പിന്റെയും അളവ് കുറയ്ക്കാൻ പേശികളെ സഹായിക്കുന്നില്ല. ക്രമേണ, രക്തത്തിലെ പഞ്ചസാര വർദ്ധിക്കാനും നല്ല കൊളസ്ട്രോൾ കുറയ്ക്കാനും ഹൃദയത്തിന് പ്രയാസം സൃഷ്ടിക്കാനും ഇത് ഇടയാക്കും.
ദീർഘനേരം ഇരിക്കുമ്പോൾ കാലുകളിലേക്കുള്ള രക്തയോട്ടം മന്ദഗതിയിലാകും. രക്തം മുകളിലേക്ക് തള്ളിവിടാൻ ഞരമ്പുകൾ കൂടുതൽ കഠിനാധ്വാനം ചെയ്യേണ്ടിവരുന്നു. ഇത് വൈകുന്നേരങ്ങളിൽ കാലുകളിൽ നേരിയ നീർക്കെട്ടുണ്ടാക്കാം. ദീർഘദൂര യാത്രകളിലോ മറ്റ് ആരോഗ്യ പ്രശ്നങ്ങളുള്ളവരിലോ രക്തം കട്ടപിടിക്കാൻ (ക്ലോട്ട്) ഇത് അപൂർവമായി കാരണമാവാം.
ഇരിക്കുമ്പോൾ നടുവിലെയും പ്രധാന പേശികൾക്കും നട്ടെല്ലിനെ താങ്ങാൻ കുറഞ്ഞ പ്രയത്നം മതിയാകും. മാസങ്ങൾ കഴിയുമ്പോൾ ഈ പേശികൾ ദുർബലമാകും. അപ്പോൾ നട്ടെല്ല് സന്ധികളെയും ഡിസ്കുകളെയും കൂടുതലായി ആശ്രയിക്കും. ഇത് ദൈനംദിന ജോലികളിൽ നടുവേദനയും മറ്റ് ബുദ്ധിമുട്ടുകളും വർദ്ധിപ്പിക്കും.
മണിക്കൂറുകളോളം സ്ക്രീനിലേക്ക് നോക്കിയിരിക്കുന്നത് കണ്ണുകളെ വരണ്ടതാക്കും. ജോലിയിൽ ശ്രദ്ധ കൂടുമ്പോൾ കണ്ണ് ചിമ്മുന്നതിന്റെ അളവ് കുറയും. ഇത് കണ്ണിന് ചൂട്, കാഴ്ച മങ്ങൽ, തലവേദന എന്നിവയ്ക്ക് കാരണമാവാം. സ്ക്രീനിന്റെ ഉയരം ശരിയല്ലാത്തതും കഴുത്തിനെ മുന്നോട്ട് കുനിപ്പിക്കുന്നതും കൂടുതൽ പ്രയാസമുണ്ടാക്കും.
ഓരോ 30 മിനിറ്റിലും ചെറിയ ഇടവേളകൾ എടുക്കാൻ ആരോഗ്യ വിദഗ്ധർ നിർദ്ദേശിക്കുന്നു. എഴുന്നേൽക്കുക, ശരീരം വലിച്ചുനീട്ടുക, കുറച്ച് നടക്കുക തുടങ്ങിയവ രക്തയോട്ടം കൂട്ടാൻ സഹായിക്കും. കണങ്കാലുകൾ ചലിപ്പിക്കുന്നതും തോളുകൾ വട്ടത്തിൽ തിരിച്ചും ചെയ്യുന്നത് സന്ധികൾക്ക് ആശ്വാസം നൽകും. ശരിയായ പിന്തുണയുള്ള കസേരയും സ്ക്രീനിന്റെ അനുയോജ്യമായ ഉയരവും ബുദ്ധിമുട്ടുകൾ കുറയ്ക്കാൻ അനിവാര്യമാണ്.
ഫോണുകളോ സ്മാർട്ട് വാച്ചുകളോ ഉപയോഗിച്ച് ജോലി ചെയ്യുന്നവർക്ക് ഇരിക്കുന്ന സമയം നിരീക്ഷിക്കാനാകും. എഴുന്നേൽക്കാനുള്ള ഓർമ്മപ്പെടുത്തലുകൾ ഈ ഗാഡ്ജറ്റുകൾ നൽകും. ഇന്ത്യയിലെ പല കമ്പനികളും ഇപ്പോൾ ഇരുന്ന് ജോലി ചെയ്യാതെ മീറ്റിംഗുകളും, ജോലിക്കിടയിൽ ചെറിയ വ്യായാമത്തിനുള്ള ഇടവേളകളും നൽകുന്നുണ്ട്. ഇത്തരം നടപടികൾ ദീർഘനേരം ഇരുന്നു ജോലി ചെയ്യുന്ന ജീവനക്കാരുടെ ആരോഗ്യം സംരക്ഷിക്കാൻ സഹായിക്കും.
Click it and Unblock the Notifications
Sign in with Google