ഫ്‌ളാറ്റിന്റെ ബാല്‍ക്കണിയില്‍ ബീറ്റ്റൂട്ട് എളുപ്പത്തില്‍ വളര്‍ത്താം; ചട്ടിയില്‍ ഇങ്ങനെ ചെയ്താല്‍ മതി

വീടിന്റെയോ ഫ്‌ളാറ്റിന്റെയോ ബാല്‍ക്കണിയിലെ പരിമിതമായ സൗകര്യത്തിലും നന്നായി വളര്‍ത്താന്‍ അനുയോജ്യമായ സസ്യമാണ് ബീറ്റ്‌റൂട്ട്. മികച്ച ആരോഗ്യ ഗുണങ്ങളും സൗന്ദര്യ ഗുണങ്ങളുമുള്ള ബീറ്റ്‌റൂട്ട് തണുത്ത കാലാവസ്ഥയില്‍ നടുന്നത് മികച്ച ഫലം നല്‍കും. വലിയ ബുദ്ധിമുട്ടുകള്‍ ഇല്ലാതെ തന്നെ ബാല്‍ക്കണിയില്‍ ബീറ്റ്‌റൂട്ട് വളര്‍ത്താന്‍ കഴിയും. ഇതിന് അധികം സ്ഥലമൊന്നും ആവശ്യമില്ല.

നഗരങ്ങളിലെ സാഹചര്യങ്ങളില്‍ പോലും ബീറ്റ്‌റൂട്ട് തഴച്ചുവളരും. കീടനാശിനികളൊന്നും ചേര്‍ക്കാതെ ബാല്‍ക്കണിയില്‍ വളര്‍ത്തുന്ന ബീറ്റ്‌റൂട്ട് ഫ്രഷായി പറിച്ചെടുത്ത് ഭക്ഷണത്തില്‍ ഉള്‍പ്പെടുത്തുകയും ചെയ്യാം.

ബീറ്റ്‌റൂട്ട് വേരുകള്‍ക്ക് വളരാന്‍ കുറഞ്ഞത് 10-12 ഇഞ്ച് ആഴമുള്ള ഒരു ചട്ടി തിരഞ്ഞെടുക്കുക. ടെറാക്കോട്ട ചട്ടികള്‍, അല്ലെങ്കില്‍ തുണി കൊണ്ടുള്ള ഗ്രോ ബാഗുകള്‍ എന്നിവയാണ് ഏറ്റവും അനുയോജ്യം. കാരണം അവ മണ്ണിന് നല്ല വായുസഞ്ചാരം ഉറപ്പാക്കുന്നു. വെള്ളം കെട്ടിനിന്ന് വേരുകള്‍ ചീയുന്നത് തടയാന്‍ ചട്ടിയുടെ അടിയില്‍ ആവശ്യത്തിന് ഡ്രെയിനേജ് ദ്വാരങ്ങള്‍ ഉണ്ടെന്ന് ഉറപ്പാക്കുക.

അയഞ്ഞതും നനവുള്ളതുമായ മണ്ണിലാണ് ബീറ്റ്‌റൂട്ട് ഏറ്റവും നന്നായി വളരുന്നത്. പൂന്തോട്ടത്തില്‍ നിന്നുള്ള മണ്ണ്, കമ്പോസ്റ്റ്, കൊക്കോപീറ്റ് എന്നിവയുടെ മിശ്രിതം ചട്ടിയില്‍ നിറയ്ക്കുക. ഇത് ചെടിക്ക് നല്ല പോഷകങ്ങളും ഈര്‍പ്പവും നല്‍കുന്നു. ഏതാനും ആഴ്ചകള്‍ കൂടുമ്പോള്‍ കമ്പോസ്റ്റ് വീണ്ടും ചേര്‍ക്കണം.

ബീറ്റ്‌റൂട്ട് വിത്തുകള്‍ ഒരു ഇഞ്ച് ആഴത്തിലും 3-4 ഇഞ്ച് അകലത്തിലും നടുക. വിത്തുകള്‍ നേരിട്ട് ചട്ടിയില്‍ നടുന്നതാണ് നല്ലത്. വിത്ത് മുളയ്ക്കുന്നതു വരെ മണ്ണ് ഈര്‍പ്പമുള്ളതായി നിലനിര്‍ത്തുക. തണുത്ത കാലാവസ്ഥയില്‍ നടുന്നതാണ് ഏറ്റവും നല്ലത്. വിത്ത് മുളയ്ക്കാന്‍ സാധാരണയായി 5 മുതല്‍ 10 ദിവസം വരെ എടുക്കും.

ചെടി നന്നായി വളരാന്‍ ദിവസവും 4-6 മണിക്കൂര്‍ സൂര്യപ്രകാശം ആവശ്യമാണ്. ബാല്‍ക്കണിയില്‍ സൂര്യപ്രകാശം ലഭിക്കുന്ന സ്ഥലത്തു വേണം ചട്ടി വയ്ക്കാന്‍. ചട്ടിയിലെ മണ്ണിന്റെ ഈര്‍പ്പം നിലനിര്‍ത്തേണ്ടത് അത്യാവശ്യമാണെങ്കിലും വെള്ളം കെട്ടിനില്‍ക്കാന്‍ അനുവദിക്കരുത്. ചട്ടി അമിതമായി നനയ്ക്കുന്നത് വേരുകള്‍ ചീയാനും ഫംഗസ് പ്രശ്‌നങ്ങള്‍ക്കും കാരണമാകും. മണ്ണിന്റെ മുകള്‍ ഭാഗം ഉണങ്ങുമ്പോള്‍ മാത്രം ചട്ടി വീണ്ടും നനയ്ക്കണം.

ചൂടുള്ള ദിവസങ്ങളില്‍ ചട്ടികള്‍ ദിവസവും നനയ്‌ക്കേണ്ടി വന്നേക്കാം. എന്നാല്‍ തണുത്ത കാലാവസ്ഥയില്‍ മണ്ണ് നനയ്ക്കുന്നത് ഈര്‍പ്പം നോക്കിയിട്ടു മതി. ഉണങ്ങിയ ഇലകള്‍ ഉപയോഗിച്ച് പുതയിടുന്നത് ഈര്‍പ്പം നിലനിര്‍ത്തും. ചെടി ഉണങ്ങുന്നത് തടയുകയും ചെയ്യും.

ഇളം ബീറ്റ്‌റൂട്ട് പച്ചിലകള്‍ ഉയര്‍ന്ന പോഷകഗുണമുള്ളതാണ്. ഇത് കഴിക്കുന്നത് ആരോഗ്യത്തിന് നല്ലതാണ്. ഏകദേശം 45-60 ദിവസങ്ങള്‍ കൊണ്ട് ബീറ്റ്‌റൂട്ട് വിളവെടുപ്പിന് തയ്യാറാകും. ഒരു ടെന്നീസ് ബോളിന്റെ വലുപ്പം വയ്ക്കുമ്പോള്‍ വിളവെടുക്കണം. ഈ വലുപ്പത്തിലുള്ള ബീറ്റ്‌റൂട്ടുകള്‍ മൃദുവായിരിക്കും. മണ്ണ് പതുക്കെ മാറ്റി തണ്ടിന്റെ അറ്റത്തുള്ള ചെടി ശ്രദ്ധാപൂര്‍വ്വം മാറ്റുക. പറിച്ചെടുക്കുന്ന ബീറ്റ്‌റൂട്ടിന് വാങ്ങുന്നവയെ അപേക്ഷിച്ച് മധുരവും മൃദുവും കൂടുതല്‍ ആയിരിക്കും.