ലോക്സഭ തിരഞ്ഞെടുപ്പ് 2019

ലോക്‌സഭാ തിരഞ്ഞെടുപ്പ് ഫലം ഇതാ പടിവാതില്‍ക്കല്‍ എത്തി. കേരളത്തിലും ദേശീയ തലത്തിലും ഒരുപോലെ ആവേശം നിറയുകയാണ്. ദേശീയ തലത്തില്‍ കോണ്‍ഗ്രസും ബിജെപിയും തമ്മില്‍ പോരാട്ടം നടക്കുമ്പോള്‍ കേരളത്തില്‍ അത് സിപിഎം നേതൃത്വം നല്‍കുന്ന എല്‍ഡിഎഫും കോണ്‍ഗ്രസ് നേതൃത്വം നല്‍കുന്ന യുഡിഎഫും തമ്മിലാണ്. ഇത്തവണ വിജയം ആര്‍ക്കായിരിക്കുമെന്ന കാര്യം പ്രവചനാതീതമാണ്. പ്രാദേശിക കക്ഷികള്‍ ഏറ്റവും സ്വാധീനം ഉണ്ടാക്കുന്ന തിരഞ്ഞെടുപ്പാണ് നടക്കാന്‍ ഒരുങ്ങുന്നത്. 2014ല്‍ ഏകപക്ഷീയ വിജയമാണ് ബിജെപിയുടെ നേതൃത്വത്തിലുള്ള എന്‍ഡിഎ നേടിയത്. 543ല്‍ 282 സീറ്റുകള്‍ അവര്‍ തൂത്തുവാരി. കഴിഞ്ഞ അഞ്ച് വര്‍ഷത്തിനിടയില്‍ വലിയ മാറ്റമാണ് ദേശീയ രാഷ്ട്രീയത്തില്‍ ഉണ്ടായിരിക്കുന്നത്. ബിജെപി വിരുദ്ധ മുന്നണിയെന്ന പേരില്‍ മഹാസഖ്യം രൂപപ്പെട്ടിരിക്കുകയാണ്. സമാജ് വാദി പാര്‍ട്ടി, ബിഎസ്പി, ആര്‍എല്‍ഡി, എന്നിവര്‍ക്കൊപ്പം കോണ്‍ഗ്രസ് കൂടി ചേര്‍ന്നാണ് പോരാട്ടം. നിരവധി പാര്‍ട്ടികള്‍ പ്രതിപക്ഷ ഐക്യത്തിന്റെ ഭാഗമായിട്ടുണ്ട്. ജയം അതുകൊണ്ട് ആര്‍ക്കൊപ്പം നില്‍ക്കുമെന്ന് പറയാനാവില്ല. മുന്‍തൂക്കം രണ്ട് മുന്നണികള്‍ക്കും ഒരുപോലെയാണ്. അതേസമയം കേരളത്തില്‍ കഴിഞ്ഞ തവണ യുഡിഎഫ് 12 സീറ്റും എല്‍ഡിഎഫ് എട്ട് സീറ്റുമാണ് നേടിയത്. ഇത്തവണ ജയം ഉറപ്പിക്കാനായി ഏറ്റവും മികച്ച സ്ഥാനാര്‍ത്ഥികളെയാണ് ഇരു മുന്നണികളും രംഗത്തിറക്കുന്നത്. കേരളത്തില്‍ ഭരണം ഉള്ളതിന്റെ നേട്ടം എല്‍ഡിഎഫിനൊപ്പമുണ്ട്. ഇവര്‍ക്കൊപ്പം ബിജെപിയും നേട്ടത്തിനായി ശ്രമിക്കുന്നുണ്ട്. പക്ഷേ പോരാട്ടത്തിന്റെ വ്യക്തമായ ചിത്രം ഇപ്പോഴും ലഭ്യമല്ല. വിധി പറയുന്ന ദിവസം വന്നു. രാഷ്ട്രീയ പട്ടികയുടെ തലപ്പത്ത് ആര് ഇരിക്കും എന്ന് നമുക്ക് ഇന്ന് അറിയാം