അന്സിബയ്ക്കും ലക്ഷ്മി പ്രിയക്കും ഷോക്കോസ് നോട്ടീസ് നല്കും; 5 അംഗ സമിതി രൂപീകരിക്കാന് അമ്മ
കൊച്ചി: താരങ്ങള്ക്കിടയിലെ പ്രശ്നങ്ങള് പരിഹരിക്കാന് അമ്മ എക്സിക്യൂട്ടീവ് തീരുമാനം. ലഭിച്ച പരാതികള് അന്വേഷിക്കാന് അഞ്ചംഗ സമിതിയെ നിയോഗിക്കും. പ്രസിഡന്റ് ശ്വേത മേനോന്, ജനറല് സെക്രട്ടറി കുക്കു പരമേശ്വരന് എന്നിവര്ക്ക് പുറമെ മൂന്ന് അംഗങ്ങള് കൂടി സമിതിയിലുണ്ടാകും. അന്സിബ ഹസന്, ടിനി ടോം, നീന കുറുപ്പ്, ലക്ഷ്മി പ്രിയ എന്നിവര് ഉള്പ്പെട്ട വിവാദങ്ങളാണ് സമിതി അന്വേഷിക്കുക.
കൂടാതെ തര്ക്ക വിഷയങ്ങള് മാധ്യമങ്ങള്ക്ക് മുമ്പില് പരസ്യമാക്കിയവര്ക്കെതിരെ നടപടി എടുക്കാനും അമ്മ തീരുമാനിച്ചു. ആര്ക്കെതിരെയാണ് നടപടി എന്ന് ശ്വേത മേനോന് വ്യക്തമാക്കിയില്ല. അന്സിബ ഹസന്, ലക്ഷ്മി പ്രിയ, നീന കുറുപ്പ് എന്നിവരാണ് മാധ്യമങ്ങള്ക്ക് മുമ്പില് സംസാരിച്ചത്. ഇവര്ക്ക് ഷോക്കോസ് നോട്ടീസ് നല്കുമെന്നാണ് മനസിലാകുന്നത്. മാധ്യമങ്ങളോട് വിഷയത്തില് പ്രതികരിച്ച മാലാ പാര്വതിക്കും നോട്ടീസ് നല്കുമോ എന്ന് വ്യക്തമല്ല.
മൂന്ന് ദിവസത്തിനകം കാരണം കാണിക്കല് നോട്ടീസ് നല്കും. അഞ്ച് പ്രവൃത്തി ദിവസങ്ങള്ക്കകം മറുപടി നല്കണം. ഇക്കാര്യങ്ങളില് കൂടി അന്തിമ പരിഹാരം കാണും. ശേഷമാകും അമ്മയുടെ ജനറല് ബോഡി യോഗം ചേരുക. 18 ദിവസം കഴിഞ്ഞാലാണ് ജനറല് ബോഡി യോഗം നടക്കുക. അതുമായി ബന്ധപ്പെട്ട അണിയറ പ്രവര്ത്തനങ്ങളും ഇന്നത്തെ എക്സിക്യൂട്ടീവ് യോഗം ചര്ച്ച ചെയ്തുവെന്ന് ശ്വേത മേനോന് പറഞ്ഞു.
മാധ്യമങ്ങളില് എല്ലാ വിവരങ്ങളും വരുന്നില്ല. ഏകപക്ഷീയമായ വിവരങ്ങളാണ് വരുന്നത്. ജനറല് ബോഡിയില് എല്ലാം ചര്ച്ച ചെയ്യും. കുക്കു പരമേശ്വരനും വാച്ച്മാനും തമ്മിലുള്ള ഓഡിയോ പുറത്തായിരുന്നു. കുക്കുവിന്റെ മൊബൈലില് നിന്നാണ് ഇത് പുറത്തുപോയത്. ഇക്കാര്യം അവര് സമ്മതിച്ചു എന്ന് ശ്വേത മേനോന് പറഞ്ഞു. കുക്കു ഓഡിയോ മാലാ പാര്വതിക്ക് അയച്ചു നല്കിയിരുന്നു എന്നും അവര് കൂട്ടിച്ചേര്ത്തു.
അന്സിബ ആവശ്യപ്പെട്ട പോലെ സമിതിയെ നിയോഗിക്കാന് സാധിക്കില്ല. ഇതൊരു ചാരിറ്റി സംഘടനയാണ്. അംഗങ്ങള് അത്തരം കാര്യങ്ങള് മുന്നോട്ട് വച്ചാല് ചെയ്യാന് സാധിക്കില്ലെന്നും പ്രസിഡന്റ്, ജനറല് സെക്രട്ടറി എന്നിവര്ക്ക് പുറമെ മൂന്ന് പേര് കൂടി സമിതിയില് ഉണ്ടാകുമെന്നും ശ്വേത മേനോന് പറഞ്ഞു. വിവാദത്തിന്റെ ഭാഗമായവര് ഉള്പ്പെടുന്ന സമിതിയില് വിശ്വാസമില്ലെന്ന് അന്സിബ പറഞ്ഞിരുന്നു. രമേശ് പിഷാരടി ഉള്പ്പെടെയുള്ള സമിതിയാണ് അന്സിബ ആവശ്യപ്പെടുന്നത്.
അതേസമയം, അന്സിബയും ലക്ഷ്മി പ്രിയയും ഉള്പ്പെട്ട വിവാദം പോലീസ് കേസായിട്ടുണ്ട്. അന്സിബയില് നിന്ന് പോലീസ് മൊഴിയെടുത്തു. ലക്ഷ്മി പ്രിയയെയും പോലീസ് വിളിപ്പിച്ചിരുന്നു. അമ്മയില് തന്നെ പരിഹാരം കണ്ട ശേഷം അന്സിബയോട് പരാതി പിന്വലിക്കാന് ആവശ്യപ്പെട്ടേക്കും. ഇക്കാര്യങ്ങളില് വരും ദിവസങ്ങളില് വ്യക്തത വരും.
Click it and Unblock the Notifications
Sign in with Google