ശ്വേത മേനോന് മൊഴി നല്കി; ടിനി ടോം വര്ഗീയ അധിക്ഷേപം നടത്തിയോ എന്ന് ചോദ്യം, അടുത്ത നീക്കം
കൊച്ചി: നടന് ടിനി ടോം വര്ഗീയ അധിക്ഷേപം നടത്തിയെന്ന നടി അന്സിബ ഹസന്റെ പരാതിയില് പോലീസ് നടപടി തുടരുന്നു. താരസംഘടനയായ അമ്മയുടെ പ്രസിഡന്റ് ശ്വേത മേനോന്റെ മൊഴി എടുത്തു. അന്സിബ ഹസന്, നീന കുറുപ്പ്, പ്രൊഡക്ഷന് കണ്ട്രോളറുടെ മകന് എന്നിവരുടെ മൊഴി എടുത്ത ശേഷമാണ് ശ്വേതയെ കടവന്ത്ര പോലീസ് വിളിപ്പിച്ചത്.
ടിനി ടോം വര്ഗീയ അധിക്ഷേപം നടത്തിയോ, അന്സിബ ഹസനെ ജിഹാദി എന്ന് വിളിച്ചോ, ഇസ്ലാമിലേക്ക് മതംമാറ്റത്തിന് ശ്രമിച്ചുവെന്ന് ടിനി ടോം പറഞ്ഞിരുന്നോ തുടങ്ങിയ കാര്യങ്ങളില് വ്യക്തത തേടാനാണ് ശ്വേതയെ വിളിപ്പിച്ചത്. അന്സിബ ഹസന്റെ പരാതിക്ക് ബലമേകുന്ന മറുപടി ശ്വേതയില് നിന്ന് ലഭിച്ചില്ല എന്നാണ് വിവരം. ശ്വേത മേനോന് നേരത്തെ തനിക്കെതിരായ നിലപാട് എടുത്തുവെന്ന് അന്സിബ സൂചന നല്കിയിരുന്നു.
ടിനി ടോം വളരെ മോശമായി തന്നെ കുറിച്ചു പറഞ്ഞു എന്ന് നീന കുറുപ്പ് വഴി അറിഞ്ഞു എന്നാണ് അന്സിബ പറയുന്നത്. അമ്മയുടെ വാട്സാപ്പ് ഗ്രൂപ്പിലും ടിനി മോശമായി സംസാരിച്ചുവെന്നും മറ്റു അംഗങ്ങള് പ്രതികരിച്ചില്ലെന്നുമായിരുന്നു അന്സിബ പറഞ്ഞത്. മതംമാറ്റത്തിന് ശ്രമിച്ചുവെന്ന് ഉള്പ്പെടെയുള്ള ഇല്ലാക്കഥകള് പറയുന്ന സാഹചര്യത്തിലാണ് പോലീസിനെ സമീപിച്ചത് എന്നും അന്സിബ പറഞ്ഞിരുന്നു.
ടിനി ടോമിനെ പോലീസ് വിളിപ്പിക്കും
വര്ഗീയ അധിക്ഷേപം നടത്തുന്നത് ശ്രദ്ധയില്പ്പെട്ടിട്ടില്ല, ജിഹാദി എന്ന് വിളിച്ചതായി അറിയില്ല തുടങ്ങിയ കാര്യങ്ങളാണ് ശ്വേത മേനോന് പോലീസിന് മൊഴി നല്കിയത്. ശ്വേത മേനോന് ക്ഷേത്രത്തിന്റെ സ്പോണ്സറിങ് കൊണ്ടുവന്നപ്പോള് അന്സിബ എതിര്ത്തിരുന്നു. താന് കൂടുതല് പണം ആവശ്യപ്പെട്ടാല് ക്ഷേത്ര കമ്മിറ്റിക്കാര് തരുമായിരുന്നു എന്ന് ശ്വേത പറഞ്ഞു എന്നും അന്സിബ വെളിപ്പെടുത്തിയിരുന്നു.
അന്സിബയും ലക്ഷ്മിപ്രിയയും തമ്മിലുള്ള വിവാദത്തില് ഇടപെടാന് സാധിക്കില്ല എന്ന നിലപാടായിരുന്നു ശ്വേത മേനോന്. വ്യക്തികള് തമ്മിലുള്ള വിഷയമാണ് എന്നും അതില് അമ്മയ്ക്ക് റോളില്ലെന്നുമായിരുന്നുവത്രെ ശ്വേതയുടെ പ്രതികരണം. പോലീസ് അടുത്ത നീക്കത്തിന് ഒരുങ്ങുകയാണ്. പ്രതിസ്ഥാനത്ത് നില്ക്കുന്ന ടിനി ടോമിനെ അടുത്ത ദിവസം വിളിപ്പിക്കും.
നീന കുറുപ്പ് പോലീസില് നല്കിയ മൊഴി ടിനി ടോമിന് എതിരാണ് എന്നാണ് വിവരം. എന്നാല് ശ്വേത മേനോന്റെ കാര്യം മറിച്ചാണ്. എല്ലാ മൊഴികളും പരിശോധിച്ച് പോലീസ് റിപ്പോര്ട്ട് തയ്യാറാക്കി എസിപിക്ക് സമര്പ്പിക്കും. പരാതിയില് കേസെടുക്കണോ വേണ്ടയോ എന്ന് പിന്നീട് തീരുമാനിക്കും. അന്സിബയും ലക്ഷ്മിപ്രിയയും തമ്മിലുള്ള പരാതിയില് കഴമ്പില്ല എന്ന് നേരത്തെ പോലീസ് റിപ്പോര്ട്ട് നല്കിയിരുന്നു. തുടര്ന്ന് ലക്ഷ്മിപ്രിയക്കെതിരെ നടപടി ആവശ്യപ്പെട്ട് കോടതിയെ സമീപിച്ചിരിക്കുകയാണ് അന്സിബ.
Click it and Unblock the Notifications
Sign in with Google