സിനിമ വെറും ‘സൈഡ്'! ബിസിനസ്സിലൂടെ കോടികൾ കൊയ്യുന്ന താരങ്ങൾ; ഞെട്ടിക്കുന്ന സമ്പത്ത്

ഇന്ത്യൻ സിനിമാ ലോകത്തെ പ്രമുഖ താരങ്ങളുടെ സിനിമയിലെ പ്രതിഫലവും ആഡംബര ജീവിതവുമൊക്കെ എപ്പോഴും വാർത്തകളിൽ നിറയാറുണ്ട്. ഒരു സിനിമയ്ക്കായി കോടികളാണ് പല മുൻനിര താരങ്ങളും കൈപ്പറ്റുന്നത്. എന്നാൽ, ഇന്ത്യയിലെ ഏറ്റവും ധനികരായ ചില താരങ്ങളുടെ പ്രധാന വരുമാന മാർഗ്ഗം സിനിമയല്ല എന്ന വസ്തുത പലർക്കും അറിയില്ല. അഭിനയത്തിന് പുറമെ വൻകിട ബിസിനസ്സ് സാമ്രാജ്യങ്ങൾ കെട്ടിപ്പടുത്തും, മികച്ച നിക്ഷേപങ്ങളിലൂടെയും സിനിമയേക്കാൾ വലിയ തുക അക്കൗണ്ടിലെത്തിക്കുന്ന ചില പ്രമുഖ ഇന്ത്യൻ താരങ്ങളെ പരിചയപ്പെടാം.

1. ഷാരൂഖ് ഖാൻ: ലോകത്തിലെ തന്നെ ഏറ്റവും ധനികനായ നടന്മാരിൽ ഒരാളാണ് കിംഗ് ഖാൻ എന്ന് ആരാധകർ വിളിക്കുന്ന ഷാരൂഖ് ഖാൻ. ഹുറൂൺ ഗ്ലോബൽ റിച്ച് ലിസ്റ്റ് പ്രകാരം ഏകദേശം 10,800 കോടി രൂപയാണ് (1.3 ബില്യൺ ഡോളർ) ഷാരൂഖ് ഖാന്റെ ആസ്തി. ഒരു സിനിമയ്ക്ക് 150 കോടി മുതൽ 250 കോടി രൂപ വരെ പ്രതിഫലം വാങ്ങുന്ന താരം കൂടിയാണ് അദ്ദേഹം. എങ്കിലും അദ്ദേഹത്തിന്റെ ആസ്തിയുടെ വലിയൊരു പങ്കും വരുന്നത് സ്വന്തം ബിസിനസ്സുകളിൽ നിന്നാണ്. പ്രമുഖ നിർമ്മാണ-വിഎഫ്എക്സ് കമ്പനിയായ 'റെഡ് ചില്ലീസ് എന്റർടൈൻമെന്റ്', ഐപിഎല്ലിലെ ഏറ്റവും ലാഭകരമായ ഫ്രാഞ്ചൈസികളിലൊന്നായ 'കൊൽക്കത്ത നൈറ്റ് റൈഡേഴ്സ്' (KKR) എന്നിവയുടെ ഭൂരിഭാഗം ഓഹരികളും ഷാരൂഖിന്റെ ഉടമസ്ഥതയിലാണ്.

2. ജൂഹി ചൗള: ഹുറൂൺ റിച്ച് ലിസ്റ്റ് പ്രകാരം ഇന്ത്യയിലെ ഏറ്റവും സമ്പന്നയായ നടിയാണ് ജൂഹി ചൗള. ഏകദേശം 7,790 കോടി രൂപയാണ് ഇവരുടെ ആസ്തി. സിനിമയിൽ ഇപ്പോൾ അത്ര സജീവമല്ലെങ്കിലും ബിസിനസ്സിലും ഇൻഫ്രാസ്ട്രക്ചർ മേഖലയിലുമുള്ള വൻ നിക്ഷേപങ്ങളാണ് ജൂഹിയെ ഈ നേട്ടത്തിന് അർഹയാക്കിയത്. ഷാരൂഖ് ഖാനും ഭർത്താവ് ജയ് മേത്തയ്ക്കുമൊപ്പം ഐപിഎൽ ടീമായ കൊൽക്കത്ത നൈറ്റ് റൈഡേഴ്സിൽ ഉള്ള പങ്കാളിത്തവും കൺസ്ട്രക്ഷൻ മേഖലയുമാണ് ഇവരുടെ പ്രധാന വരുമാന സ്രോതസ്സ്.

3. ഹൃത്വിക് റോഷൻ: ബോളിവുഡിലെ ഏറ്റവും പ്രതിഫലം വാങ്ങുന്ന നടന്മാരിൽ ഒരാളായ ഹൃത്വിക് റോഷന്റെ ആസ്തി ഏകദേശം 3,100 കോടി രൂപയാണ്. എന്നാൽ താരത്തിന്റെ സമ്പത്തിന്റെ പകുതിയിലധികവും വരുന്നത് സ്വന്തം ലൈഫ്സ്റ്റൈൽ, അത്ലറ്റിക്ക് ബ്രാൻഡായ 'HRX'-ൽ നിന്നാണ്. ഇന്ന് 7,000 കോടിയിലധികം ബ്രാൻഡ് മൂല്യമുള്ള വൻകിട സംരംഭമായി HRX മാറിയിട്ടുണ്ട്.

4. നാഗാർജുന അക്കിനേനി: തെക്കേ ഇന്ത്യയിലെ ഏറ്റവും ധനികരായ താരങ്ങളിൽ ഒരാളായ നാഗാർജുനയ്ക്ക് ഏകദേശം 5,000 കോടി രൂപയുടെ ആസ്തിയുണ്ട്. ഹൈദരാബാദിലെ പ്രശസ്തമായ 'അന്നപൂർണ സ്റ്റുഡിയോസ്', റിയൽ എസ്റ്റേറ്റ് നിക്ഷേപങ്ങൾ, റെസ്റ്റോറന്റുകൾ, ഹെൽത്ത് കെയർ മേഖലയിലെ ഓഹരികൾ എന്നിവയാണ് സിനിമയ്ക്ക് പുറമെ അദ്ദേഹത്തിന്റെ വരുമാനം ഇരട്ടിയാക്കുന്നത്.

5. പ്രിയങ്ക ചോപ്ര ജോനാസ്: ഗ്ലോബൽ സ്റ്റാറായ പ്രിയങ്ക ചോപ്രയുടെ ആസ്തി ഏകദേശം 620 മുതൽ 670 കോടി രൂപ വരെയാണ്. ഹോളിവുഡ്, ബോളിവുഡ് ചിത്രങ്ങൾക്ക് പുറമെ മികച്ച ബിസിനസ്സ് ബുദ്ധിയുള്ള താരം കൂടിയാണ് പ്രിയങ്ക. 'അനോമലി' (Anomaly) എന്ന ഹെയർകെയർ ബ്രാൻഡ്, ഡേറ്റിംഗ് ആപ്പായ 'ബംബിൾ' (Bumble) എന്നിവയിലെ തന്ത്രപ്രധാനമായ നിക്ഷേപങ്ങൾ പ്രിയങ്കയ്ക്ക് വലിയ ലാഭമാണ് നേടിക്കൊടുക്കുന്നത്. മുൻപ് ന്യൂയോർക്കിൽ 'സോന' എന്ന പേരിൽ ഒരു ഇന്ത്യൻ റെസ്റ്റോറന്റും താരം നടത്തിയിരുന്നു.

6. മോഹൻലാൽ: മലയാള സിനിമ വിസ്മയം മോഹൻലാലിന്റെ ആസ്തി ഏകദേശം 450 കോടി രൂപയ്ക്ക് (50 മില്യൺ ഡോളർ) മുകളിലാണ്. സിനിമകളിൽ വലിയ പ്രതിഫലം കൈപ്പറ്റുന്നതിനൊപ്പം (ബിഗ് ബജറ്റ് ചിത്രങ്ങൾക്ക് ഏകദേശം 20 കോടി രൂപ വരെ) സ്മാർട്ട് ബിസിനസ്സ് നിക്ഷേപങ്ങളിലൂടെയും വലിയൊരു സമ്പത്ത് അദ്ദേഹം കെട്ടിപ്പടുത്തിട്ടുണ്ട്. ആന്റണി പെരുമ്പാവൂരുമായി ചേർന്ന് നിർമ്മിച്ച 'ആശീർവാദ് സിനിമാസ്' എന്ന പ്രമുഖ പ്രൊഡക്ഷൻ ബാനർ, തിയേറ്റർ ശൃംഖലകൾ, 'വിസ്മയാസ് മാക്സ്' എന്ന പോസ്റ്റ്-പ്രൊഡക്ഷൻ & വിഎഫ്എക്സ് സ്റ്റുഡിയോ എന്നിവ അദ്ദേഹത്തിന്റെ പ്രധാന ബിസിനസ്സുകളാണ്.