ലളിതം മനോഹരം, പക്ഷേ വില കോടികൾ, ചർച്ചയായി തൃഷയുടെ ചെന്നൈയിലെ ആഢംബര വീട്

തെന്നിന്ത്യൻ സിനിമാ ലോകത്ത് തന്റേതായ വ്യക്തിമുദ്ര പതിപ്പിച്ച നടിയാണ് തൃഷ കൃഷ്ണൻ. പതിറ്റാണ്ടുകളായി തമിഴ്, തെലുങ്ക് സിനിമകളിൽ സജീവമായ താരം സൗന്ദര്യം കൊണ്ടും മികച്ച അഭിനയം കൊണ്ടും പ്രേക്ഷകരുടെ പ്രിയങ്കരിയായി മാറി. സിനിമയിലെന്ന പോലെ തന്റെ ജീവിതത്തിലും ഏറെ ലാളിത്യവും മനോഹാരിതയും താരം കാത്തുസൂക്ഷിക്കുന്നുണ്ട്.

എന്നാൽ അടുത്തിടെയായി തൃഷയുടെ വ്യക്തിജീവിതം വലിയ രീതിയിൽ വാർത്തകളിൽ നിറഞ്ഞുനിൽക്കുകയാണ്. പ്രത്യേകിച്ച് തമിഴ് സൂപ്പർതാരവും മുഖ്യമന്ത്രിയുമായ വിജയുമായി താരത്തിനുള്ള ബന്ധത്തെക്കുറിച്ചുള്ള ഗോസിപ്പുകളും വിവാദങ്ങളുമാണ് ഇപ്പോൾ തമിഴകത്ത് ഏറ്റവും കൂടുതൽ ചർച്ച ചെയ്യപ്പെടുന്നത്.

വിജയ് മുഖ്യമന്ത്രിയായി സത്യപ്രതിജ്ഞ ചെയ്ത ചടങ്ങിൽ തൃഷ പങ്കെടുത്തത് വലിയ വിവാദങ്ങൾക്ക് വഴിവെച്ചിരുന്നു. ചടങ്ങിൽ വിജയിന്റെ കുടുംബാംഗങ്ങളുമായി തൃഷ അടുത്ത സൗഹൃദം പങ്കിടുന്നതും അതീവ വികാരാധീനയായി ചടങ്ങ് വീക്ഷിക്കുന്നതുമായ ദൃശ്യങ്ങൾ സാമൂഹിക മാധ്യമങ്ങളിൽ വൈറലായി. ചടങ്ങിൽ വിജയിന്റെ ഭാര്യയുടെയും മക്കളുടെയും അസാന്നിധ്യം ഈ ചർച്ചകളുടെ ചൂട് കൂട്ടി.

വിജയും ഭാര്യ സംഗീതയും തമ്മിലുള്ള വിവാഹമോചന വാർത്തകൾക്ക് പിന്നിൽ തൃഷയുമായുള്ള ബന്ധമാണെന്ന രീതിയിലുള്ള അഭ്യൂഹങ്ങൾ പ്രചരിക്കുന്നതിനിടയിലാണ് ഈ സംഭവങ്ങൾ അരങ്ങേറുന്നത്. സോഷ്യൽ മീഡിയയിൽ ഇതിനെച്ചൊല്ലി വലിയ തോതിലുള്ള സൈബർ ആക്രമണങ്ങളും തൃഷ നേരിടുന്നുണ്ട്. എങ്കിലും ഈ വിവാദങ്ങളെയെല്ലാം കാറ്റിൽപ്പറത്തിക്കൊണ്ട് തന്റെ പതിവ് ശൈലിയിൽ മുന്നോട്ട് പോവുകയാണ് താരം.

സിനിമയിലെ ആഡംബരങ്ങൾക്കിടയിലും തൃഷ തന്റെ വീട് ഒരുക്കിയിരിക്കുന്നത് തികച്ചും ലളിതവും മനോഹരവുമായ രീതിയിലാണ്. ചെന്നൈയിലുള്ള താരത്തിന്റെ ആഡംബര വീടിന് ഏകദേശം 10 കോടി രൂപയാണ് വിലമതിപ്പ്. പ്രകൃതിദത്തമായ നിറങ്ങളും ആകർഷകമായ അലങ്കാരങ്ങളും മനോഹരമായ പൂക്കളും ഒത്തുചേരുന്ന ഈ വീട് ഒരേസമയം വളരെ സുഖപ്രദവും ആധുനികവുമായ രീതിയിലാണ് ഡിസൈൻ ചെയ്തിരിക്കുന്നത്. ലാളിത്യത്തിലാണ് യഥാർത്ഥ ആഡംബരം എന്ന് തെളിയിക്കുന്നതാണ് ഈ വീടിന്റെ ഓരോ കോണും.

മണ്ണിന്റെ നിറങ്ങളോട് സാമ്യമുള്ള റസ്റ്റ് ഓറഞ്ച്, ബീജ്, ബ്രൗൺ, മ്യൂട്ടഡ് ഗോൾഡ് തുടങ്ങിയ നിറങ്ങളാണ് തൃഷ തന്റെ വീടിനായി തെരഞ്ഞെടുത്തിരിക്കുന്നത്. ഇവിടുത്തെ ബ്രൗൺ നിറത്തിലുള്ള കർട്ടനുകളോട് കൂടിയ ബ്രിക്ക് റെഡ് സോഫകൾ അധികം ആഡംബരം തോന്നിക്കാത്ത രീതിയിൽ മനോഹരമായി ക്രമീകരിച്ചിരിക്കുന്നു.

വീടിനുള്ളിൽ കൂടുതൽ തെളിച്ചവും ഊഷ്മളതയും നൽകാനായി പല നിറങ്ങളിലുള്ള യഥാർത്ഥ പൂക്കൾ കൊണ്ട് അലങ്കരിച്ചിട്ടുണ്ട്. പൂക്കളെ വെറുമൊരു അലങ്കാരവസ്തുവായി കാണാതെ വീടിന്റെ ജീവനുള്ള ഒരു ഭാഗമായാണ് ഇവിടെ ഉൾപ്പെടുത്തിയിരിക്കുന്നത്. കൂടാതെ ലിവിങ് റൂമിൽ സ്ഥാപിച്ചിരിക്കുന്ന വിവിധ പെയിന്റിംഗുകളും സവിശേഷമായ കലാരൂപങ്ങളും വീടിന് ഭംഗി കൂട്ടുന്നു.

തൃഷയുടെ വസ്ത്രങ്ങളും ലക്ഷ്വറി ബാഗുകളും സൂക്ഷിച്ചിരിക്കുന്ന വലിയൊരു വാക്ക്-ഇൻ ക്ലോസറ്റും ഈ വീടിന്റെ പ്രധാന പ്രത്യേകതയാണ്. തന്റെ വളർത്തുനായയായ ഇസിക്കൊപ്പമാണ് താരം ഇവിടെ താമസിക്കുന്നത്. മരത്തടികൾ പാകിയ തറയും ബീജ് കർട്ടനുകളും ഉള്ള ഒരു മുറിയിൽ തൃഷയും ഇസിയും ഒന്നിച്ച് വ്യായാമം ചെയ്യുന്നതിന്റെ ദൃശ്യങ്ങൾ മുൻപ് താരം ഇൻസ്റ്റാഗ്രാമിൽ പങ്കുവെച്ചിരുന്നു.

തന്റെ നായയുടെ ജന്മദിനം ആഘോഷിച്ച ചിത്രങ്ങളിൽ വീടിന്റെ പിന്നിലായി പച്ചപ്പുനിറഞ്ഞ മരങ്ങളും ചെറിയ ചെടികളും നിറഞ്ഞ വിശാലമായ ഒരു മുറ്റവും കാണാം. കണ്ണിന് കുളിർമയേകുന്ന തുറസ്സായ ഘടനയും വൃത്തിയുള്ള ഉൾഭാഗവും വീടിനുള്ളിലെ വെളിച്ചവും തൃഷയുടെ ഈ വീടിനെ കൂടുതൽ സുഖപ്രദമാക്കുന്നു.