വിജയും ഭാര്യ സംഗീതയും ഒന്നിക്കുന്നു? മകന് വേണ്ടി ഇടപെട്ട് അമ്മ?;ജൻമ ദിനത്തിൽ നിർണായക പ്രഖ്യാപനമെന്ന്

ഇക്കഴിഞ്ഞ തമിഴ്നാട് നിയമസഭ തിരഞ്ഞെടുപ്പ് സമയത്താണ് ആരാധകരെ ഞെട്ടിച്ചുകൊണ്ട് വിജയ്‌യും ഭാര്യ സംഗീത സ്വർണലിംഗവും വേർപിരിയുന്നുവെന്ന വാർത്തകൾ പുറത്തുവന്നത്. സംഗീത വിവാഹമോചനം തേടി ചെങ്കൽപ്പേട്ട് കുടുംബകോടതിയെ സമീപിക്കുകയായിരുന്നു. വിജയ്ക്ക് ഒരു നടിയുമായി ബന്ധമുണ്ടെന്ന് ആരോപിച്ചായിരുന്നു അവർ വിവാഹമോചന ഹർജി നൽകിയത്.

എന്തായാലും ഹർജിയെ കുറിച്ചോ ഇരുവരും തമ്മിലുള്ള പ്രശ്നങ്ങളെ കുറിച്ചോ വിജയിയോ സംഗീതയോ പരസ്യമായി യാതൊരു പ്രതികരണവും നടത്തിയിട്ടില്ല. ഇതിനിടയിൽ ഇപ്പോഴിതാ സംഗീതയും വിജയിയും വീണ്ടും ഒന്നിക്കുകയാണെന്ന തരത്തിലുള്ള അഭ്യൂഹങ്ങളാണ് പുറത്തുവരുന്നത്. വിശദമായി അറിയാം

വിലക്കിയിട്ടും തുടർന്നു

വിജയ്‌യുടെ സിനിമകളുടെ വിജയ ആഘോഷങ്ങളിലും കുടുംബ ചടങ്ങുകളിലും സംഗീതയുടെ അസാന്നിധ്യം ശ്രദ്ധിക്കപ്പെട്ടതോടെയായിരുന്നു ഇരുവരും തമ്മിൽ വേർപിരിഞ്ഞ് കഴിയുകയാണെന്ന തരത്തിലുള്ള അഭ്യൂഹങ്ങൾ ചൂടുപിടിച്ചത്. എന്നാൽ തിരഞ്ഞെടുപ്പ് വേളയിൽ വിജയ്ക്കെതിരെ സംഗീത കോടതിയെ സമീപിക്കുകയായിരുന്നു. തന്നെ വിജയ് വഞ്ചിച്ചുവെന്നതാണ് സംഗീത ഉയർത്തിയ പ്രധാന ആരോപണം. ഒരു നടിയുമായി താരം ബന്ധം പുലർത്തുന്നുണ്ടെന്നും പലപ്പോഴും വിലക്കിയിട്ടും നടൻ ചെവിക്കൊണ്ടില്ലെന്നും അവർ ആരോപിച്ചു. നടിയുമായി ബന്ധം തുടരില്ലെന്ന് വാക്ക് തന്നെങ്കിലും അത് പാലിച്ചില്ലെന്നും അവർ ഹർജിയിൽ പറഞ്ഞു.

തൃഷ-വിജയ് ബന്ധം

തൃഷയും വിജയും തമ്മിൽ പ്രണയമാണെന്ന തരത്തിലുള്ള അഭ്യൂഹങ്ങൾക്കിടെയായിരുന്നു വിജയിയുടെ ഭാര്യ നടനെതിരെ നിയമപരമായി നീങ്ങിയത്. വിജയും തൃഷയും ഒരുമിച്ചുള്ള ചിത്രങ്ങൾ പുറത്തുവന്നതോടെയാണ് ഇരുവരും തമ്മിലുള്ള ബന്ധത്തെ കുറിച്ചുള്ള അഭ്യൂഹങ്ങൾക്ക് ചൂട് പിടിച്ചത്. സംഗീത വിവാഹമോചന ഹർജി നൽകിയതിന് തൊട്ടടുത്ത ദിവസം ആരാധകരെ ഞെട്ടിച്ച് കൊണ്ട് ഒരു പൊതുചടങ്ങിൽ തൃഷയും വിജയിയും ഒരുമിച്ചെത്തി. വോട്ടണ്ണൽ ദിവസം തൃഷ വിജയിയുടെ വീട്ടിലെത്തി, പിന്നീട് സത്യപ്രതിജ്ഞ ചടങ്ങിലും അവർ സജീവമായി പങ്കെടുത്തു. വിജയിയുടെ കുടുംബത്തോടൊപ്പം തന്നെ വേദിയിൽ അവർ ഉണ്ടായിരുന്നു.

ഒടുവിൽ ഇടപെട്ട് അമ്മ

സംഗീതയും വിജയിയും തമ്മിൽ നിയമപരമായി വിവാഹമോചനം നേടിയാൽ തൃഷയും വിജയും വിവാഹം കഴിച്ചേക്കുമെന്ന അഭ്യൂഹങ്ങൾക്കിടെയാണ് ഇപ്പോൾ വിജയ്-സംഗീത വിഷയത്തിൽ വിജയിയുടെ അമ്മ ശോഭ ചന്ദ്രശേഖർ ഇടപെട്ടുവെന്ന തരത്തിൽ വാർത്തകൾ വരുന്നത്. അമ്മ ഇടപെട്ടതോടെ ലണ്ടനിൽ താമസിച്ചിരുന്ന സംഗീത അടുത്തിടെ ചെന്നൈയിലെ നീലാംകരെയിലുള്ള വിജയിയുടെ വീട്ടിലേക്ക് മടങ്ങിയെത്തിയതായും വിജയ്‌ക്കൊപ്പമാണ് ഇപ്പോൾ സമയം ചെലവഴിക്കുന്നതെന്നും ചില തമിഴ് മാധ്യമങ്ങൾ റിപ്പോർട്ട് ചെയ്യുന്നു.

ജൻമദിനത്തിൽ പ്രഖ്യാപനം?

ജൂൺ 22-ന് വിജയ്‌യുടെ ജൻമദിനത്തിൽ ദമ്പതികൾ ഒരുമിച്ചുള്ള ഒരു പ്രഖ്യാപനം നടത്തിയേക്കുമെന്ന അഭ്യൂഹവും സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. ആരാധക കൂട്ടായ്മകളിലും ഫാൻസ് പേജുകളിലും ഈ സാധ്യതയെക്കുറിച്ചുള്ള ചർച്ചകൾ സജീവമാണ്. നേരത്തേ വിജയിയും പിതാവും തമ്മിലുള്ള പ്രശ്നത്തിൽ ഇടപെട്ട് പരിഹരിച്ചത് അമ്മ ശോഭയായിരുന്നു. അതുകൊണ്ട് തന്നെ ഇത്തവണയും അമ്മ ഇടപെട്ട് കാര്യങ്ങൾ ഭംഗിയായി പരിഹരിച്ചെന്ന തരത്തിലാണ് വാർത്തകൾ. അതേസമയം വിജയോ സംഗീതയോ അവരുടെ കുടുംബാംഗങ്ങളോ ഇത്തരം വാർത്തകളെക്കുറിച്ച് പ്രതികരിച്ചിട്ടില്ല.