ഇന്ത്യക്കെതിരായ എല്ലാ ഉപരോധവും അമേരിക്ക പിന്‍വലിച്ചേക്കും

വാഷിങ്ടണ്‍: ഇന്ത്യ അണുസ്ഫോടനം നടത്തിയതിനെ തുടര്‍ന്ന് അമേരിക്ക ഏര്‍പ്പെടുത്തിയ ഉപരോധങ്ങളില്‍ അവശേഷിക്കുന്നവയും പിന്‍വലിച്ചേക്കും. ഇന്ത്യന്‍ അമേരിക്കക്കാരുടെ ഒരു സമ്മേളനത്തില്‍ വെച്ച് അമേരിക്കന്‍ ഉദ്യോഗസ്ഥരാണ് ഇക്കാര്യം വെളിപ്പെടുത്തിയത്.

ഇനി അണുപരീക്ഷണം നടത്തില്ലെന്ന ഇന്ത്യയുടെ പ്രഖ്യാപനത്തെ തുടര്‍ന്ന് ചില ഉപരോധങ്ങള്‍ നേരത്തെ പിന്‍വലിച്ചിരുന്നുവെന്ന് ഉദ്യോഗസ്ഥര്‍ സമ്മേളനത്തില്‍ പറഞ്ഞു. സെപ്തംബര്‍, ഒക്ടോബര്‍ മാസങ്ങളില്‍ ഇന്ത്യന്‍ പ്രധാനമന്ത്രി എ.ബി.വാജ്പേയി നടത്തുന്ന അമേരിക്കന്‍ സന്ദര്‍ശനം ഇന്ത്യാ-അമേരിക്കാ ബന്ധത്തെ ശക്തിപ്പെടുത്താന്‍ സഹായിക്കുമെന്ന് അവര്‍ പറഞ്ഞു.

ഐക്യരാഷ്ട്ര സഭാ സെക്യൂരിറ്റി കൗണ്‍സിലില്‍ ഇന്ത്യക്ക് സ്ഥിരാംഗത്വം നല്‍കുന്നതിലുള്ള പിന്തുണ പരസ്യമായി പ്രഖ്യാപിക്കണമെന്ന് ഇന്ത്യന്‍ അമേരിക്കക്കാര്‍ സമ്മേളനത്തില്‍ ആവശ്യപ്പെട്ടു. പാക്കിസ്ഥാന്റെ പ്രോത്സാഹനത്തോടെ നടക്കുന്ന ഭീകരവാദത്തിലേക്കും അവര്‍ അമേരിക്കന്‍ ഉദ്യോഗസ്ഥരുടെ ശ്രദ്ധ ക്ഷണിച്ചു.