എല്‍.ടി.എഫ് പ്ലസ് ടൂ ഉപസമിതി യോഗം അലസി പിരിഞ്ഞു

തിരുവനന്തപുരം: പ്ലസ് - ടൂവിനെക്കറിച്ച് തീരുമാനം കൈക്കൊള്ളാന്‍ എല്‍.ഡി.എഫ് നിയോഗിച്ച കമ്മറ്റിയുടെ യോഗം അഭിപ്രായവ്യത്യാസങ്ങളെ തുടര്‍ന്ന് അലസി പിരിഞ്ഞു. കമ്മറ്റി വീണ്ടും 17-ാം തീയതി യോഗം ചേരും.

പ്ലസ് - ടൂ അനുവദിക്കേണ്ട 300 ഓളം സ്കൂളുകളുടെ ലിസ്റുമായാണ് മന്ത്രി പി.ജെ ജോസഫ് യോഗത്തിനെത്തിയത്. ഇതില്‍ അണ്‍ എയിഡഡ് സ്കൂളുകളും ഉള്‍പ്പെടും. എന്നാല്‍ അണ്‍ എയിഡഡ് സ്കൂളുകള്‍ക്ക് പ്ലസ്-ടൂ അനുവദിക്കുന്നതിനെക്കുറിച്ച് എല്‍.ഡി.എഫ് തീരുമാനം കൈക്കൊണ്ടില്ലായെന്ന് മറ്റു കക്ഷികള്‍ വാദിച്ചു. അതോടെ ഇന്നലെ വൈകുന്നേരം ആരംഭിച്ച യോഗം രാത്രി 12.30 ഓടെ അലസി പിരിഞ്ഞു. ഇന്ന് നടന്ന എല്‍.ഡി.എഫ് യോഗത്തിന്റെ തീരുമാനത്തിനായി റിപ്പോര്‍ട്ട് സമര്‍പ്പിക്കാന്‍ ഉദ്ദേശിച്ചായിരുന്നു ഇന്നലെ പ്ലസ്-ടൂ ഉപസമിതി യോഗം ചേര്‍ന്നത്. എന്നാല്‍ ഇന്നലത്തെ യോഗം അലസി പിരിഞ്ഞതോടെ ഇന്നത്തെ എല്‍.ഡി.എഫ് യോഗത്തിലും പ്ലസ് - ടൂവിനെക്കുറിച്ച് തീരുമാനം കൈക്കൊള്ളാനായില്ല.

ഇതോടെ പ്ലസ് - ടൂ പ്രശ്നത്തില്‍ മന്ത്രി പി.ജെ ജോസഫും അദ്ദേഹത്തിന്റെ പാര്‍ട്ടിയും മറ്റു ഘടകകക്ഷികളില്‍ നിന്നും തീര്‍ത്തും ഒറ്റപ്പെട്ടു. ഇത് ആര്‍.എസ്.പി - ബി മുന്നണി വിടുകയും ജനതാദള്‍ കുറുപ്പ് വിഭാഗം പിണങ്ങി നില്‍ക്കുകയും ചെയ്യുന്ന സാഹചര്യത്തില്‍ മുന്നണിക്ക് കൂടൂതല്‍ പ്രശ്നങ്ങള്‍ സൃഷ്ടിക്കും.

പ്ലസ്-ടൂ അനുവദിക്കുന്നതിനു പിന്നില്‍ വ്യാപകമായ ക്രമക്കേട് നടക്കുന്നുവെന്ന പരാതിയെ തുടര്‍ന്നാണ് കഴിഞ്ഞ എല്‍.ഡി.എഫ് സംസഥാന കമ്മറ്റി എല്ലാ ഘടകകക്ഷികളിലേയും അംഗങ്ങളെ ഉള്‍പ്പെടുത്തി ഉപസമിതി രൂപീകരിച്ചത്. എന്നാല്‍ ഉപസമിതിയെ നിയമിച്ചതിനെക്കുറിച്ചുതന്നെ കേരളാ കോണ്‍ഗ്രസ്സ് (ജെ) യ്ക്ക് പരാതി ഉണ്ടായിരുന്നു.