റവന്യു കാര്‍ഡ് സമയപരിധി നീട്ടുമെന്ന് മന്ത്രി ഇസ്മയില്‍

പാലക്കാട്: എല്ലാവര്‍ക്കും അപേക്ഷിക്കാന്‍ സമയം കിട്ടുന്നില്ലെങ്കില്‍ റവന്യു കാര്‍ഡിന് അപേക്ഷ നല്‍കാനുള്ള സമയപരിധി ഇനിയും നീട്ടുമെന്ന് റവന്യു മന്ത്രി കെ ഇ ഇസ്മയില്‍. ഇപ്പോഴുള്ള കാലാവധി ജൂണ്‍ 15ന് അവസാനിക്കും.

എഴുപത്തിരണ്ട് ലക്ഷം കുടുംബങ്ങള്‍ക്ക് വേണ്ടി ഒരു കോടി അപേക്ഷകള്‍ അച്ചടിച്ചു കഴിഞ്ഞുവെന്ന് മന്ത്രി അറിയിച്ചു. ആവശ്യമെങ്കില്‍ ഇനിയും അപേക്ഷകള്‍ അച്ചടിക്കും. പെട്ടിക്കടകള്‍ മുഖാന്തരം അഞ്ചു രൂപയ്ക്ക് അപേക്ഷകള്‍ വിതരണം നടത്തുന്നതായി പരാതി ലഭിച്ചിട്ടുണ്ടെന്ന് മന്ത്രി പറഞ്ഞു.

കാസര്‍കോഡ് ജില്ലയില്‍ വാര്‍ഡ് മെമ്പര്‍മാര്‍ അപേക്ഷാഫോറം ഉപയോഗിച്ച് വിലപേശുന്ന സംഭവം ഉണ്ടായതിന്റെ അടിസ്ഥാനത്തില്‍ ആവശ്യമായ നടപടി സ്വീകരിക്കാന്‍ അധികൃതര്‍ നിര്‍ദ്ദേശം നല്‍കിയിട്ടുണ്ടെന്ന് മന്ത്രി അറിയിച്ചു. ഇത്തരത്തില്‍ പൊതുപ്രവര്‍ത്തകര്‍ റവന്യുകാര്‍ഡിനെതിരെ മോശമായ പ്രചരണത്തിന് വേദിയൊരുക്കുന്നത് ഒഴിവാക്കേണ്ടിയിരിക്കുന്നു.