യൂസേഴ്സ് ഫീ: കരിപ്പൂര്‍ വിമാനത്താവളത്തില്‍ ധര്‍ണ നടന്നു

കോഴിക്കോട്: യുസേഴ്സ് ഫീ ഏര്‍പ്പെടുത്തിയതിനെതിരെ യാത്രക്കാരും വിവിധ സംഘടനകളുടെ പ്രതിനിധികളും കരിപ്പൂര്‍ വിമാനത്താവളത്തിനു മുന്നില്‍ ധര്‍ണ നടത്തി.

വിമാനത്താവളത്തിലേക്ക് കടക്കാന്‍ സമരക്കാര്‍ ശ്രമിച്ച പ്പോള്‍ പോലീസ് തടഞ്ഞു. പിന്നീട് വിമാനത്താവള ഡയറക്ടറെ കാണാന്‍ സമരക്കാരെ അനുവദിച്ചു. ലെവി കൊടുക്കാതെ വിമാനത്താവളത്തിന്റെ കെട്ടിടത്തിനകത്തേക്ക് കടക്കാന്‍ ബുധനാഴ്ച്ച യാത്രക്കാരെ അനുവദിക്കില്ലെന്ന് ഡയറക്ടര്‍ സി.ആര്‍.വിജയകുമാര്‍ സമരക്കാരോട് വ്യക്തമാക്കി.

കെ.പി.സി.സി. പ്രസിഡന്റ് കെ. മുരളീധരന്‍, കേരള ബി.ജെ.പി വൈസ് പ്രസിഡന്റ് പി.എസ്.ശ്രീധരന്‍പിള്ള, മുസ്ലിം ലീഗ് നേതാവ് അബ്ദുസമദ് സമദാനി എന്നിവര്‍ ധര്‍ണയില്‍ പങ്കെടുത്തു.

ഒരു പാര്‍ലമെന്റ് അംഗത്തെ പോലീസ് തടഞ്ഞ നടപടിയെ കെ.മുരളീധരന്‍ വിമര്‍ശിച്ചു. കേന്ദ്ര വ്യോമയാന സഹമന്ത്രി ചമന്‍ ലാല്‍ ഷായെ കണ്ട് ഈ പ്രശ്നത്തെ കുറിച്ച് താന്‍ വിശദീകരിച്ചിരുന്നെന്നും കരിപ്പൂര്‍ സന്ദര്‍ശിക്കാമെന്ന് മന്ത്രി പറഞ്ഞിട്ടുണ്ടെന്നും ശ്രീധരന്‍പിള്ള പറഞ്ഞു.