പരമേശ്വരന് മുങ്ങിമരിച്ചതാണെന്ന് നിഗമനം
കൊച്ചി: നിയുക്ത ഹൈക്കോടതി ജഡ്ജി എം.ആര്.പരമേശ്വരന് മുങ്ങിമരിച്ചതാണെന്ന് പോസ്റ്റ്മോര്ട്ടം നടത്തിയ ഡോക്ടര്മാര് പ്രാഥമിക നിഗമനത്തിലെത്തി.
ആലപ്പുഴ മെഡിക്കല് കോളേജിലാണ് മൃതദേഹം പോസ്റ്റ്മോര്ട്ടം ചെയ്തത്.
കഴിഞ്ഞ തിങ്കളാഴ്ച്ച കാണാതായ പരമേശ്വരന്റെ മൃതദേഹം വെള്ളിയാഴ്ച്ച വൈകീട്ടാണ് പെരിയാറിന്റെ തീരത്ത് കണ്ടെത്തിയത്. ആലുവക്കടുത്ത് കടങ്ങല്ലൂരില് മുല്ലേപ്പള്ളി കടവിനടുത്താണ് മൃതദേഹം കണ്ടത്.
ജഡം തിരിച്ചറിയാനാവാത്ത വിധം അഴുകിയിരുന്നു. ശരീരത്തിലുള്ള പൂണൂലും മറ്റും കണ്ട് സംശയം തോന്നിയ പോലീസ് ഉദ്യോഗസ്ഥന്മാര് പരമേശ്വരന്റെ ബന്ധുക്കളെ വിവരമറിയിക്കുകയായിരുന്നു.
പരമേശ്വരന്റെ മകന് അഴുകിയനിലയില് കിടക്കുകയായിരുന്ന മുഖം തിരിച്ചറിയാന് കഴിഞ്ഞിരുന്നില്ല. കൈയിലെ മോതിരങ്ങളും കൈത്തണ്ടയിലെ കറുത്ത ചരടും മറ്റുമാണ് തിരിച്ചറിയാന് സഹായിച്ചത്.
എറണാകുളത്ത് കുടുംബത്തോടൊപ്പം താമസിച്ചിരുന്ന പരമേശ്വരന് ഹൈക്കോടതി ജഡ്ജിമാരായി ശുപാര്ശ ചെയ്യപ്പെട്ടവരുടെ പാനലിലുണ്ടായിരുന്നു.