ആയുധ ഉപരോധം നീക്കിയെന്ന റിപ്പോര്‍ട്ട് ബ്രിട്ടന്‍ നിഷേധിച്ചു

ലണ്ടന്‍: കഴിഞ്ഞ വര്‍ഷത്തെ പട്ടാള അട്ടിമറിക്ക് ശേഷം പാകിസ്ഥാനെതിരെ ബ്രിട്ടന്‍ ഏര്‍പ്പെടുത്തിയ ആയുധ ഉപരോധം നീക്കിയെന്ന് വന്ന റിപ്പോര്‍ട്ടുകള്‍ ബ്രിട്ടിന്‍ നിഷേധിച്ചു. ഗാര്‍ഡിയന്‍ ദിനപത്രത്തില്‍ വന്ന റിപ്പോര്‍ട്ടുകള്‍ പാര്‍ലമെന്റില്‍ രേഖാമൂലം കൊടുത്ത മറുപടിയുടെ തെറ്റായ വ്യാഖ്യാനമാണെന്ന് ബ്രിട്ടിഷ് വിദേശ കാര്യ ഓഫീസ് വക്താവ് അറിയിച്ചു.

ഉപരോധം പല പ്രാവശ്യം പുന:പരിശോധിച്ചിട്ടുണ്ട് എന്നും വക്താവ് പറഞ്ഞു. പട്ടികയിലുള്ള പല ആയുധങ്ങളും ആയുധഭാഗങ്ങളും ഇപ്പോഴും ഉപരോധത്തിന്റെ കീഴിലാണ്. സര്‍ക്കാര്‍ തീരുമാനം യൂറോപ്യന്‍ യൂണിയന്‍ മാര്‍ഗനിര്‍ദ്ദേശങ്ങളനുസരിച്ചാണ്. ആക്രമണത്തിന് ഉപയോഗിക്കാന്‍ സാധിക്കാത്ത സാധനങ്ങള്‍ക്ക് മാത്രമേ ഇപ്പോള്‍ കയറ്റുമതി അനുമതി കൊടുത്തിട്ടുള്ളു.

പാകിസ്ഥാനിലെ സൈനിക സര്‍ക്കാരിനെ ഒറ്റപ്പെടുത്തുന്നതിനേക്കാല്‍ അവരെ കൂടി ഉള്‍പ്പടെത്തുണമെന്നുള്ള വിശ്വാസത്തില്‍ നിന്നാണ് ബ്രിട്ടന്റെ പാകിസ്ഥാനോടുള്ള നയത്തില്‍ മാറ്റം വന്നത് എന്നും പത്ര റിപ്പോര്‍ട്ടിലുണ്ടായിരുന്നു. മുഷ്റാഫിന് പകരം വന്നേക്കാവുന്നത് ഇസ്ലാമിക മത മൗലികവാദ സര്‍ക്കാരായിരിക്കും എന്ന ഭീതിയും ചൂണ്ടിക്കാണിക്കപ്പെട്ടിരുന്നു. അങ്ങനെ സംഭിവിച്ചാല്‍ ഒരു ആണവ യുദ്ധത്തിനുള്ള സാദ്ധ്യതയും തള്ളിക്കളയാനാവില്ല.