പ്രീഡിഗ്രി ഒരു വര്‍ഷം കൂടി നിലനിര്‍ത്തണമെന്ന് ആന്റണി

കൊച്ചി: പ്ലസ് ടു നടപ്പാക്കുന്നതിലെ അനിശ്ചിതത്വം തുടരുന്ന സാഹചര്യത്തില്‍ ഒരു വര്‍ഷം കൂടി കോളേജുകളില്‍ പ്രീഡിഗ്രി നിലനിര്‍ത്തണമെന്ന് പ്രതിപക്ഷനേതാവ് എ.കെ.ആന്റണി ആവശ്യപ്പെട്ടു.

കൊച്ചിയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

ഏതൊക്കെ സ്കൂളുകളില്‍ പ്ലസ് ടു അനുവദിക്കുമെന്നറിയാതെ വിദ്യാര്‍ഥികളും രക്ഷാകര്‍ത്താക്കളും ആശയകുഴപ്പത്തില്‍ പെട്ടിരിക്കുകയാണ്. കോടതിയില്‍ ഇനിയും കേസുകളുണ്ട്. ഈ സാഹചര്യത്തില്‍ ഒരു വര്‍ഷത്തേക്കു കൂടി പ്രീഡിഗ്രി നിലനിര്‍ത്തുക മാത്രമാണ് പോംവഴി.

ക്രമക്കേടുകള്‍ പരിഹരിക്കാന്‍ ഇനിയും വൈകും. അതെല്ലാം പരിഹരിച്ചശേഷം പ്ലസ് ടു ആരംഭിക്കുന്നതാണ് നല്ലത്. രണ്ടോ മൂന്നോ വര്‍ഷം വൈകിയാലും പ്രശ്നമില്ല.

പിടിവാശിയും ദുരഭിമാനവും വെടിഞ്ഞ് ലക്ഷകണക്കിന് വിദ്യാര്‍ഥികളുടെ ഭാവി പന്താടുന്ന ക്രൂരവിനോദം അവസാനിപ്പിക്കാന്‍ സര്‍ക്കാര്‍ തയ്യാറാകണം. അന്തസുണ്ടെങ്കില്‍ മുഖ്യമന്ത്രിയും വിദ്യാഭ്യാസമന്ത്രിയും രാജിവെക്കണം.

പ്രീഡിഗ്രി ബോര്‍ഡിന്റെ പേരില്‍ കെ.കരുണാകരനും ടി.എം.ജേക്കബിനുമെതിരെ എല്‍.ഡി.എഫ് സര്‍ക്കാര്‍ അന്വേഷണ കമ്മീഷനെ നിയമിച്ചതാണ്. അവര്‍ക്ക് ബാധകമായ കാര്യങ്ങള്‍ നായനാര്‍ക്കും ജോസഫിനും ബാധകമല്ലേ?-ആന്റണി ചോദിച്ചു.

മറ്റു സംസ്ഥാനങ്ങളില്‍ പ്ലസ് ടു ക്ലാസുകള്‍ തുടങ്ങിയിട്ട് ആഴ്ച്ചകളായി. കേരളത്തില്‍ ഉന്നതവിദ്യാഭ്യാസരംഗത്ത് വഴിത്തിരിവായ പ്ലസ് ടുവില്‍ എന്ന് ക്ലാസുകള്‍ ആരംഭിക്കുമെന്ന് ആര്‍ക്കും പറയാനാവുന്നില്ല. ആന്റണി ചൂണ്ടികാട്ടി.