ഓരോ വീട്ടിലും ഫൂലന്‍ദേവിയുണ്ടാകണമെന്ന് ഫൂലന്‍ദേവി

തിരുവനന്തപുരം: ദളിതര്‍ക്കും സ്ത്രീകള്‍ക്കുമെതിരെയുള്ള ആക്രമണവും ചൂഷണവും തടയണമെങ്കില്‍ ഓരോ വീട്ടിലും ഫൂലന്‍ദേവിമാര്‍ ഉണ്ടാകണമെന്ന് ഫൂലന്‍ദേവി.

ഒരു ഫൂലന് ഒറ്റയ്ക്ക് എന്തു ചെയ്യാന്‍ സാധിക്കും? അക്രമത്തിനും അനീതിക്കും എതിരെ പോരാടാന്‍ ഓരോ വീട്ടില്‍ നിന്നും ഓരോ ഫൂലന്‍ദേവികള്‍ ജന്മമെടുക്കണം, തിരുവനന്തപുരത്ത് മീറ്റ് ദ പ്രസ് പരിപാടിയില്‍ അവര്‍ പറഞ്ഞു.

എന്നാല്‍ ആദ്യകാലങ്ങളിലെപ്പോലെ താന്‍ ഇനിയും തോക്കും ഗ്രനേഡുകളും എടുത്ത് രംഗത്തിറങ്ങില്ലെന്ന് അവര്‍ വ്യക്തമാക്കി. ഇപ്പോഴെനിക്ക് ജനങ്ങളുടെ ശക്തിയുണ്ട്. അതിനാല്‍ എനിക്കിനി ആയുധം വേണ്ട ആവശ്യമില്ല, ഫൂലന്‍ പറഞ്ഞു. ഇപ്പോഴത്തെ ജീവിതത്തില്‍ സംതൃപ്തയാണെന്നും അവര്‍ കൂട്ടിച്ചേര്‍ത്തു.

ചമ്പല്‍ക്കാടുകളുടെ രാജ്ഞിയായിരുന്ന കാലത്ത് കുറച്ചുകൂടെ മാന്യതയോടെ പെരുമാറാന്‍ മാത്രം താന്‍ വിദ്യാസമ്പന്നയായിരുന്നില്ല. പോലീസുകാരും തന്റെ ആവശ്യങ്ങള്‍ കേട്ടതായി ഭാവിച്ചില്ല, താന്‍ ആയുധമെടുക്കേണ്ടിവന്ന സാഹചര്യത്തെക്കുറിച്ച് ഫൂലന്‍ പറഞ്ഞു.

ജാതിയുടെ അടിസ്ഥാനത്തില്‍ നിയമസഭയിലും മറ്റു സ്ഥാപനങ്ങളില്‍ സ്ത്രീകള്‍ക്ക് 50 ശതമാനം സംവരണം നല്‍കാതെ സ്ത്രീ സംവരണ ബില്‍ പാസ്സാക്കാന്‍ തന്റെ പാര്‍ട്ടി അനുവദിക്കില്ലെന്ന് ഫൂലന്‍ വ്യക്തമാക്കി.

പാവപ്പെട്ടവര്‍ക്കെതിരെ ഒരേ പോലെ അക്രമം കാണിക്കുന്ന ബി.ജെ.പിയും കോണ്‍ഗ്രസും തമ്മില്‍ തനിക്കൊരു വ്യത്യാസവുമില്ലെന്ന് അവര്‍ പറഞ്ഞു. കേരളത്തിലെ സാക്ഷരതയെയും വികസനത്തെയും പ്രശംസിച്ച അവര്‍ മറ്റു സംസ്ഥാനങ്ങളില്‍ ജനങ്ങളെ സാക്ഷരരാക്കാന്‍ ഭരണാധികാരികള്‍ സന്നദ്ധരല്ലെന്ന് ആരോപിച്ചു.