മിസ് കേരള 2000 ഫൈനല്‍ റൗണ്ട് ജൂലൈ 22-ന്

കൊച്ചി: മിസ് കേരള 2000 സൗന്ദര്യമത്സരത്തിന്റെ ഫൈനല്‍ റൗണ്ട് ജൂലൈ 22-ന് ശനിയാഴ്ച ഗള്‍ഫാര്‍ ഇന്‍റര്‍നാഷണല്‍ കണ്‍വെന്‍ഷന്‍ സെന്ററില്‍ നടക്കും. 21 പെണ്‍കുട്ടികളാണ് അവസാനറൗണ്ടില്‍ മത്സരത്തിനെത്തുന്നത്. വൈകീട്ട് 5.30-നാണ് മത്സരം.

കേരളത്തിന്റെ വിവിധഭാഗങ്ങളില്‍ നിന്നും ആദ്യഘട്ട മത്സരങ്ങളില്‍ പങ്കെടുത്ത 193 പേരില്‍ നിന്നാണ് 21 പേരെ തിരഞ്ഞെടുത്തിട്ടുള്ളത്. 21 പേരും ഇപ്പോള്‍ കൊച്ചിയിലെ വൈറ്റ് ഫോര്‍ട്ട് ഹോട്ടലില്‍ പ്രത്യേക പരിശീലനപരിപാടിയില്‍ പങ്കെടുത്തുവരികയാണ്.

പാശ്ചാത്യ-പൗരസ്ത്യ കാഴ്ചപ്പാടുകളുടെ സംഗമമാണ് മിസ് കേരള സൗന്ദര്യമത്സരമെന്ന് സംഘാടകര്‍ അവകാശപ്പെട്ടു. സിനിമാതാരങ്ങളായ സുരേഷ് ഗോപിയും ദിവ്യാ ഉണ്ണിയും പരിശീലനപരിപാടിയില്‍ സംസാരിക്കാനെത്തിയിരുന്നു. പ്രശസ്ത മോഡലും സിനിമാതാരവുമായ ശ്വേതാ മേനോനാണ് മത്സരത്തിന്റെ കോറിയോഗ്രാഫര്‍.

സൗന്ദര്യമത്സരത്തില്‍ വിധികര്‍ത്താക്കളായി മലയാളി മോഡലുകളായ ദിവ്യ പാലാട്ട്, ജോണ്‍ എബ്രഹാം, ഫാഷന്‍ ഡിസൈനര്‍ സംഗീത ദേശായി, എം.ടി.വി. ചീഫ് അലക്സ് കുരുവിള, ഹൈപവര്‍ ഗ്രൂപ്പ് ഡയറക്ടര്‍ പി.എം. ഹാരിസ് എന്നിവരുള്‍പ്പെടെ പ്രമുഖര്‍ പങ്കെടുക്കും. മത്സരം ഏഷ്യാനെറ്റില്‍ സംപ്രേഷണം ചെയ്യുന്നുണ്ട്.

അതിനിടെ മത്സരത്തിനെതിരെ വിവിധ വനിതാസംഘടനകള്‍ രംഗത്തെത്തിയിട്ടുണ്ട്. കൊച്ചി നഗരത്തില്‍ പോസ്ററുകളും ചുവരെഴുത്തുകളും വ്യാപകമായി. പ്രതിഷേധം ഭയന്ന് രഹസ്യമായാണ് മത്സരത്തില്‍ ഒരുക്കങ്ങള്‍ പുരോഗമിക്കുന്നത്.