തപാല് മേഖലയില് മൂന്നാം ദിവസവും സ്തംഭനം തുടരുന്നു
തിരുവനന്തപുരം: തപാല് ജീവനക്കാരുടെ അനിശ്ചിതകാലത്തെ പണിമുടക്കിനെ തുടര്ന്ന് കേരളത്തില് തുടര്ച്ചയായ മൂന്നാം ദിവസവും തപാല് മേഖല സ്തംഭിച്ചു.
തപാല് ഉരുപ്പടികള് മൂന്നാം ദിവസവും കെട്ടികിടന്നു. സംസ്ഥാനത്തെ 5000 പോസ്റ് ഓഫീസുകളും 51 ഹെഡ് പോസ്റ് ഓഫീസുകളും പ്രവര്ത്തിച്ചില്ല.
ഇതിനിടെ സമരം അവസാനിപ്പിക്കാനായി ദില്ലിയില് ചര്ച്ച ആരംഭിച്ചു. തപാല് വകുപ്പ് ഡയറക്ടര് ജനറല് ബി.എം.സോമാണ് സമരക്കാരുമായി ചര്ച്ച നടത്തുന്നത്.
തിരുവനന്തപുരത്തെ പോസ്റ് മാസ്റര് ജനറല് ഓഫീസിനു മുന്നില് സമരം നടത്തുന്ന ജീവനക്കാര് വ്യാഴാഴ്ച്ച ധര്ണ നടത്തി. തിരുവനന്തപുരത്തെയും കൊച്ചിയിലെയും കോഴിക്കോട്ടെയും പി.എം.ജി ഓഫീസ് ജീവനക്കാര് അടുത്ത ആഴ്ച്ച സമരത്തില് ചേരുമെന്ന് യൂണിയന് നേതാക്കള് പറഞ്ഞു.
ഗ്രൂപ്പ് ഡി ജീവനക്കാരുടെ 300 ഒഴിവുകള് നികത്തുക എന്നതാണ് സമരം നടത്തുന്ന യൂനിയനുകളുടെ പ്രധാന ആവശ്യം.
പി.എസ്.സി പരീക്ഷകള്ക്കായുള്ള കത്തുകളടക്കമുള്ള പ്രധാന തപാല് ഉരുപ്പടികള് കെട്ടികിടക്കുന്നത് ഒഴിവാക്കാന് കേന്ദ്രസര്ക്കാര് ഇടപെടണമെന്ന് കൊടിക്കുന്നില് സുരേഷ് എം.പി ആവശ്യപ്പെട്ടു.