ഇന്റര്‍നെറ്റ് ഉപയോഗിച്ചില്ലെങ്കില്‍ ടെലഫോണ്‍ ബൂത്തുകള്‍ പൂട്ടേണ്ടിവരും

ദില്ലി: ഇന്‍റര്‍നെറ്റ് സാധ്യതകള്‍ ഉപയോഗിച്ചില്ലെങ്കില്‍ രാജ്യത്തെ ഏഴുലക്ഷം വരുന്ന ടെലഫോണ്‍ ബൂത്തുകളില്‍ പകുതിയും രണ്ടുവര്‍ഷത്തിനകം പൂട്ടേണ്ടിവരുമെന്ന് ഒരു പഠനം കണ്ടെത്തി.

അസോചാമിന്‍െറ ടെലഫോണ്‍ കമ്മിറ്റിയും ടെലികോം ഇന്‍ഡസ്ട്രി സര്‍വീസ് അസോസിയേഷനും ചേര്‍ന്നാണ് പഠനം നടത്തിയത്.

ഇന്റര്‍നെറ്റ് വഴി കുറഞ്ഞ നിരക്കില്‍ ഐ.എസ്.ഡി കോളുകള്‍ വിളിക്കാവുന്ന സംവിധാനം വ്യാപകമായാല്‍ ടെലഫോണ്‍ ബൂത്തുകാര്‍ പ്രതിസന്ധിയിലാകും. ടെലഫോണ്‍ ഓപ്പറേറ്റര്‍മാരുടെ പ്രധാനവരുമാനം എസ്.ടി.ഡി. ,ഐ.എസ്.ഡി കോളുകളാണ്. ഇന്റര്‍നെറ്റിലൂടെ ഐ.എസ്.ഡി കോളുകള്‍ ചെയ്യാവുന്ന സംവിധാനം ഇപ്പോള്‍ തന്നെ ചില സൈബര്‍ കഫേകളിലുണ്ട്. ഇതിന് കുറഞ്ഞ നിരക്ക് മതി.

പ്രതിസന്ധിയില്‍ നിന്ന് രക്ഷപ്പെടാന്‍ ടെലഫോണ്‍ ഓപ്പറേറ്റര്‍മാര്‍ സൈബര്‍ കഫേയുടെ സാധ്യതകള്‍ ഉപയോഗപ്പെടുത്തുകയേ രക്ഷയുള്ളൂ. ഇതിനായി ടെലികോം ഇന്‍ഡസ്ട്രി സര്‍വീസ് അസോസിയേഷന്‍ (ടിസ) ടെലഫോണ്‍ ബൂത്ത് ഓപ്പറേറ്റര്‍മാര്‍ക്ക് പരിശീലനം നല്‍കാനുള്ള പദ്ധതി രൂപീകരിച്ചിട്ടുണ്ട്. ഇന്റര്‍നെറ്റിന്റെ സാങ്കേതികവിദ്യയെക്കുറിച്ച് ആവശ്യമായ വിവരങ്ങള്‍ നല്‍കുകയും ഇന്റര്‍നെറ്റ് വഴിയുള്ള സംവിധാനങ്ങള്‍ ഉപഭോക്താക്കള്‍ക്ക് എങ്ങനെ നല്‍കാമെന്നതിനെ ക്കുറിച്ച് പരിശീലനം നല്‍കുകയുമാ ണ് ചെയ്യുന്നത്. കമ്പ്യൂട്ടര്‍ കൈകാര്യം ചെയ്യുന്നതിനെക്കുറിച്ചും ഇ-മെയില്‍, ബ്രൗസിങ്, ചാറ്റിങ് എന്നിവയെക്കുറിച്ചും ബൂത്ത് ഓപ്പറേറ്റര്‍മാരില്‍ ധാരണയുണ്ടാക്കും.