വൈദികന്‍െറ കൊല: ഒരാള്‍ അറസ്റില്‍

ഗുണ്ടൂര്‍: ആന്ധ്രാപ്രദേശില്‍ മലയാളി വൈദികന്‍ ജി. ഇമാനുവലിനെ കൊലപ്പെടുത്തിയ കേസില്‍ ഒരു കോണ്‍ഗ്രസ് നേതാവിന്റെ മകനെ പോലീസ് അറസ്റ് ചെയ്തു.

എസ്. വിപ്ലവ അംബേദ്കറി (31)നെയാണ് പോലീസ് അറസ്റ് ചെയ്തത്. മറ്റ് നാല് പേരോടൊപ്പം ചേര്‍ന്നാണ് ഇയാള്‍ കൊല നടത്തിയതെന്ന് പോലീസ് പറഞ്ഞു. ഇവരില്‍ മൂന്ന് പേരെ തിരിച്ചറിഞ്ഞിട്ടുണ്ട്.

ശനിയാഴ്ച്ച ക്രിസ്ത്യന്‍ പുരോഹിതനെ പള്ളിയില്‍ മരിച്ച നിലയില്‍ കാണുകയായിരുന്നു.

ആന്ധ്രാ ഇവാഞ്ചലിക്കല്‍ ലുതേറാന്‍ ചര്‍ച്ചിന്റെ പ്രസിഡണ്ടായിരുന്നു ഇമാനുവല്‍. പള്ളിയുടെ അധീനതയിലുള്ള ഒരു ആശുപത്രി വിദേശഇന്ത്യക്കാരനായ ഒരാള്‍ക്ക് ലീസിനു കൊടുക്കാന്‍ ഇമാനുവല്‍ തീരുമാനിച്ചിരുന്നു. ഇതിനെ വിപ്ലവ അംബദ്കറും മറ്റും ശക്തിയായി എതിര്‍ത്തിരുന്നു. ഈ സംഭവമാണ് കൊലപാതകികളെ കൃത്യത്തിന് പ്രേരിപ്പിച്ചതെന്ന് പോലീസ് പറഞ്ഞു.

ഇമാനുവലിന്റെ തീരുമാനത്തിനെതിരെ അംബേദ്കറും മറ്റും കോടതിയില്‍ കേസ് കൊടുത്തിരുന്നു. ആ കേസ് ഇപ്പോഴും നിലനില്‍ക്കുകയാണ്.