കര്‍ണാടകയില്‍ തമിഴ് രണ്ടാം ഭാഷയാക്കാനാവില്ലെന്ന് കൃഷ്ണ

ബാംഗ്ലൂര്‍: കര്‍ണാടകയില്‍ തമിഴ് രണ്ടാം ഔദ്യോഗിക ഭാഷയാക്കണമെന്ന വീരപ്പന്റെ ആവശ്യം അംഗീകരിക്കാനാവില്ലെന്ന് കര്‍ണാടക മുഖ്യമന്ത്രി എസ്.എം.കൃഷ്ണ പറഞ്ഞു.

വീരപ്പന്‍ ഉന്നയിച്ചിരിക്കുന്ന പല ആവശ്യങ്ങളും നടപ്പിലാക്കാനാവാത്തതാണ്. തമിഴ്നാട്ടില്‍ കന്നട രണ്ടാം ഔദ്യോഗിക ഭാഷയാക്കാനാവില്ല എന്നതു പോലെ തന്നെ കര്‍ണാടകയില്‍ തമിഴ് രണ്ടാം ഔദ്യോഗിക ഭാഷയാക്കുന്നതും അസാധ്യമാണ്. കൃഷ്ണ വ്യക്തമാക്കി.

വീരപ്പന്റെ ആവശ്യങ്ങളുമായി ബന്ധപ്പെട്ട ചില ഉത്തരവുകളുടെ പകര്‍പ്പുകള്‍ നക്കീരന്‍ ഗോപാലന്‍ വഴി വീരപ്പനെത്തിച്ചുകൊടുക്കാന്‍ സര്‍ക്കാര്‍ തീരുമാനിച്ചിട്ടുണ്ട്. കര്‍ണാടകയിലെ കോലാര്‍ ജില്ലയില്‍ കൂട്ടക്കൊലചെയ്യപ്പെട്ട ഏഴ് ദളിതര്‍ക്കും 1991ലും 92ലും നടന്ന കാവേരി കലാപത്തില്‍ ഗോപിചെട്ടി പാളയത്തിലും കൊള്ളാത്തൂരിലും കൊല്ലപ്പെട്ട ദളിതര്‍ക്കും നഷ്ടപരിഹാരം നല്‍കാനുള്ള ഉത്തരവിന്റെ പകര്‍പ്പാണ് വീരപ്പന് അയച്ചുകൊടുക്കുന്നത്.

കൊള്ളയില്‍ പങ്കുണ്ടെന്ന് ആരോപിച്ച് ടാഡ കേസ് പ്രകാരം അറസ്റ് ചെയ്ത 51 പേരെ മോചിപ്പിക്കാന്‍ വേണ്ടിയുള്ള ഉത്തരവിന്റെ പകര്‍പ്പും വീരപ്പന് അയച്ചുകൊടുക്കും.

ആഗസ്ത് 19നുളളില്‍ തന്റെ ആവശ്യങ്ങള്‍ അംഗീകരിക്കണമെന്ന് വീരപ്പന്‍ ഉപാധിവെച്ചിട്ടുണ്ടെന്ന കാര്യം കൃഷ്ണ തള്ളി. 19നുള്ളില്‍ ആവശ്യങ്ങളിന്മേലുള്ള പ്രതികരണം തന്നെ അറിയിക്കണമെന്ന് മാത്രമേ വീരപ്പന്‍ ഉദ്ദേശിക്കുന്നുള്ളൂ.

കാവേരി പ്രശ്നം അന്തര്‍ദേശീയ നീതിന്യായ കോടതിക്ക് വിടണമെന്ന ആവശ്യം പ്രാവര്‍ത്തികമാക്കാനാവില്ലെന്ന് തമിഴ്നാട് മുഖ്യമന്ത്രി കരുണാനിധി നേരത്തെ വ്യക്തമാക്കിയിട്ടുണ്ടെന്ന് കൃഷ്ണ പറഞ്ഞു.

രാജ്കുമാറിന്റെ മോചനത്തെക്കുറിച്ച് ജനങ്ങള്‍ ആശങ്കപ്പെടേണ്ടതില്ലെന്നും അദ്ദേഹം പറഞ്ഞു.