ഗോപാല് വീണ്ടും കാട്ടിലേക്ക്
ബാംഗ്ളൂര് : ആഗസ്ത് 16 ബുധനാഴ്ചയോ 17 വ്യാഴാഴ്ചയോ നക്കീരന് ഗോപാല് വീണ്ടും കാട്ടിലേക്ക് പോകും. വീരപ്പന് മുന്നോട്ട് വെച്ച പുതിയ ഉപാധികള്ക്കുള്ള കര്ണാടക-തമിഴ്നാട് സര്ക്കാരുകളുടെ മറുപടികളുമായാണ് ഇത്തവണ ഗോപാലിന്റെ യാത്ര.
ആഗസ്ത് 14 തിങ്കളാഴ്ച പോകാനാണ് ആദ്യം തീരുമാനിച്ചത്. തമിഴ്നാട് മുഖ്യമന്ത്രി കരുണാനിധിയാണ് പുതിയ തീയതി വാര്ത്താസമ്മേളനത്തില് അറിയിച്ചത്. വീരപ്പന്റെ പുതിയ ഉപാധികള്ക്കുള്ള മറുപടി രേഖകള് കര്ണാടക മുഖ്യമന്ത്രി കൃഷ്ണ ഗോപാലിന് ആഗസ്ത് 14 തിങ്കളാഴ്ച കൈമാറും.
ഗോപാലിന്റെ സന്ദര്ശനത്തോടെ മോചനം സംബന്ധിച്ച് വീരപ്പന്റെ തീരുമാനമുണ്ടാവുമെന്നാണ് പ്രതീക്ഷിക്കുന്നത്. തമിഴ്നാട്ടില് തമിഴ് ഭരണഭാഷയാക്കുന്നതിലും മറ്റും എതിര്പ്പുണ്ടാവാനിടയില്ലാത്തതിനാല് മോചനം ഉടന് സാധ്യമാകുമെന്നാണ് കരുതുന്നതെന്ന് കര്ണാടക മുഖ്യമന്ത്രി എസ്.എം.കൃഷ്ണ പറഞ്ഞു.
എന്നാല് കാവേരി നദീജല തര്ക്കത്തില് അന്താരാഷ്ട്ര നീതിന്യായ കോടതി പരിഹാരമുണ്ടാക്കമെന്നുള്ള ആവശ്യം കര്ണാടകം അംഗീകരിക്കില്ല. കാവേരി നദീജല അതോറിറ്റിയാണ് പ്രശ്നത്തില് തീര്പ്പുണ്ടാക്കേണ്ടത് എന്നാണ് കര്ണാടകത്തിന്റെ നിലപാട്.
ഇതിനിടെ തമിഴ് തീവ്രവാദികളുടെ ആക്രമണം ഭയന്ന് കര്ണാടകത്തിന്റെ അതിര്ത്തിപ്രദേശങ്ങളില് സുരക്ഷാസംവിധാനങ്ങള് ശക്തമാക്കിയിട്ടുണ്ട്. രാജ്കുമാറിനെ തട്ടിക്കൊണ്ടുപോയതില് തമിഴ് തീവ്രവാദികള്ക്കും പങ്കുണ്ടെന്ന് വ്യക്തമായിട്ടുണ്ട്.