പൂവിളികളുമായി അത്തമെത്തി

പൂവുകളെ തുയിലുണര്‍ത്തുന്ന അത്തം ഇന്ന്. തിരുവോണപ്പുലരിയിലേക്ക് ഇനി ഒമ്പതു ദിവസം മാത്രം. പൂക്കൂടയുമായി പൂവുകള്‍ തേടി തൊടികള്‍ തോറും അലയുന്ന കുട്ടികളുടെ പൂവിളികള്‍ ഗ്രാമങ്ങളില്‍ ഉയരുകയായി.

തൃക്കാക്കരയപ്പനെ ചാണകം മെഴുകിയ മുറ്റത്ത് കുടിയിരുത്തിയാണ് അത്തക്കളം ഇടാന്‍ തുടങ്ങുന്നത്. സപ്തംബര്‍ ഒന്ന് വെള്ളിയാഴ്ച മുതല്‍ പത്ത് ദിവസവും പത്ത് തരം പൂവുകള്‍ കൊണ്ടാണ് പൂക്കളം തീര്‍ക്കേണ്ടത്. പൂവുകളുടെ ദൗര്‍ലഭ്യം നാട്ടിന്‍ പുറങ്ങളില്‍ പോലും അനുഭവപ്പെടുന്നുണ്ട്.

ക്ഷേത്രങ്ങളിലും പൂക്കളം ഒരുക്കാറുണ്ട്. വിവിധ കലാസാംസ്കാരിക സംഘടനകളും കവലകളിലും മറ്റും അത്തക്കളം ഒരുക്കുന്നു.

തൃപ്പൂണിത്തുറ അത്തച്ചമയം ഇന്ന്

തൃപ്പൂണിത്തുറ ശ്രീപൂര്‍ണ്ണത്രയീശ ക്ഷേത്രത്തില്‍ അത്തച്ചമയ ആഘോഷങ്ങള്‍ക്ക് ഇന്ന് തുടക്കമാവും. രാവിലെ ആരംഭിക്കുന്ന ഘോഷയാത്രയില്‍ കാവടിയാട്ടവും പഞ്ചവാദ്യവും കോല്‍ക്കളിയുമെല്ലാം ഉണ്ടാവും.

സപ്തംബര്‍ ഒന്ന് വൈകുന്നേരം ആറ് മണി മുതല്‍ കലാപരിപാടികള്‍ ആരംഭിക്കും. തിരുവാതിര, ലയലഹരി, നാടകം, നാടന്‍പാട്ട്, ഒപ്പന, നാടോടിനൃത്തം , മോഹിനിയാട്ട മത്സരം എന്നിവ കലാപരിപാടികളില്‍ ഉള്‍പ്പെടുത്തിയിട്ടുണ്ട്.