കുടിവെള്ളപദ്ധതി: പുതിയ ടെണ്ടറുകള്‍ ക്ഷണിക്കുന്നു

തിരുവനന്തപുരം: കേരളത്തില്‍ നടപ്പിലാക്കാനുദ്ദേശിക്കുന്ന കുടിവെള്ള പദ്ധതിക്ക് കേരള സര്‍ക്കാര്‍ പുതിയ ടെണ്ടറുകള്‍ ക്ഷണിക്കുന്നു. സപ്തംബര്‍ ആറിന് ബുധനാഴ്ച മന്ത്രിസഭാ യോഗത്തിനു ശേഷം മുഖ്യമന്ത്രി ഇ.കെ. നായനാര്‍ വാര്‍ത്താലേഖകരെ അറിയിച്ചതാണ് ഇക്കാര്യം.

പദ്ധതിക്കായി ജപ്പാന്‍ ബാങ്ക് ഫോര്‍ ഇന്റര്‍നാഷണല്‍ കോ-ഓപ്പറേഷനുമായി 97 ഫെബ്രുവരി 25-ന് കേരള സര്‍ക്കാര്‍ കരാറിലെത്തിയിരുന്നെങ്കിലും അഴിമതി ആരോപണങ്ങളെത്തുടര്‍ന്ന് ഇത് വിവാദമായിരുന്നു.

പദ്ധതിയുടെ കണ്‍സള്‍ട്ടന്റായി ജപ്പാന്‍ കമ്പനിയായ പി.സി.ഐയെ നിയമിച്ചത് വ്യാപകമായ പ്രതിഷേധങ്ങള്‍ക്കിടയാക്കിയ കാര്യം നായനാര്‍ ചൂണ്ടിക്കാട്ടി. ഇപ്പോള്‍ പ്രതിപക്ഷ നേതാവ് എ.കെ. ആന്‍റണിയും മറ്റും ആവശ്യപ്പെട്ട പോലെ പുതിയ ടെണ്ടര്‍ ക്ഷണിച്ചിരിക്കുകയാണെന്നും പദ്ധതി വൈകുകയാണെങ്കില്‍ സര്‍ക്കാരിനെ കുറ്റം പറയരുതെന്നും നായനാര്‍ പറഞ്ഞു.

പ്രതിഷേധങ്ങളെത്തുടര്‍ന്ന് മുതിര്‍ന്ന ഉദ്യോഗസ്ഥയായ മിനി മാത്യുവിന്റെ നേതൃത്വത്തില്‍ അന്വേഷണത്തിന് ഉത്തരവിട്ടു. 99 മാര്‍ച്ച് 16-നു ചേര്‍ന്ന മന്ത്രി സഭായോഗം മിനി മാത്യു നല്‍കിയ റിപ്പോര്‍ട്ട് പരിശോധിക്കുകയും പി.സി.ഐയെ കണ്‍സള്‍ട്ടന്‍റ് പട്ടികയില്‍ നിന്ന് നീക്കാന്‍ തീരുമാനിക്കുകയും ചെയ്തു. പിന്നീട് ഇക്കാര്യം ജപ്പാന്‍ ബാങ്കിനെ അറിയിച്ചു, നായനാര്‍ വ്യക്തമാക്കി.

പി.സി.ഐയെ കണ്‍സള്‍ട്ടന്റ് പട്ടികയില്‍ നിന്ന് നീക്കിയാല്‍ ജപ്പാന്‍ ബാങ്ക് പണം വായ്പ തരില്ലെന്ന് വ്യക്തമാക്കിയ കാര്യം ധനമന്ത്രി ടി. ശിവദാസമേനോന്‍ ചൂണ്ടിക്കാട്ടി. ഇക്കാര്യം കേന്ദ്ര ധനകാര്യ സെക്രട്ടറി കേരള ചീഫ് സെക്രട്ടറിയെ അറിയിച്ചപ്പോള്‍ 99 ജൂലൈ ഒമ്പതിനു ചേര്‍ന്ന മന്ത്രി സഭായോഗം പി.സി.ഐയെ വീണ്ടും പട്ടികയില്‍ ഉള്‍പ്പെടുത്താന്‍ തീരുമാനിച്ചപ്പോള്‍ സര്‍ക്കാരിനെതിരെ അഴിമതി ആരോപണമുയര്‍ന്നു. സര്‍ക്കാരിന്റെ പ്രതിഛായ തകര്‍ക്കുന്നതിനേക്കാള്‍ നല്ലത് പുതിയ ടെണ്ടറുകള്‍ ക്ഷണിക്കുന്നതാണ് നല്ലതെന്ന പിന്നീട് മന്ത്രിസഭായോഗം തീരുമാനിച്ചു, ശിവദാസമേനോന്‍ പറഞ്ഞു.

പുതിയ ടെണ്ടറുകള്‍ ക്ഷണിച്ചതിനെക്കുറിച്ച് പ്രതിപക്ഷ നേതാവ് ഇതുവരെ പ്രസ്താവനയിറക്കിയിട്ടില്ല.