കശ്മീര്‍ ചര്‍ച്ചകളില്‍ പാകിസ്ഥാനെ ഉള്‍പ്പെടുത്തണമെന്ന് ചൈന

ബീജിംഗ്: കശ്മീര്‍ പ്രശ്നം പരിഹരിക്കുന്നതിനുള്ള ചര്‍ച്ചകളില്‍ പാകിസ്ഥാനെയും ഉള്‍പ്പെടുത്തണമെന്ന് ചൈന നിര്‍ദ്ദേശിച്ചു. സപ്തംബര്‍ 11 തിങ്കളാഴ്ച ചൈനീസ് വിദേശകാര്യ അസിസ്റ്റന്റ് സെക്രട്ടറി വാംഗ് യീ ആണ് ഈ നിര്‍ദ്ദേശം വച്ചത്.

കശ്മീര്‍ പ്രശ്നപരിഹാര ശ്രമങ്ങളുടെ ഭാഗമായി അടുത്തിടെ ഇന്ത്യയും കശ്മീര്‍ ഭീകര വിഘടനവാദ സംഘടനയായ ഹിസ്ബുല്‍ മുജാഹിദ്ദിനും തമ്മില്‍ നടത്തിയ ചര്‍ച്ചകളെ പരാമര്‍ശിച്ചു കൊണ്ടാണ് വാംഗ് യീ ചൈനയുടെ നിര്‍ദ്ദേശം മുന്നോട്ടുവെച്ചത്.

കശ്മീര്‍ പ്രശ്നം പരിഹരിക്കുന്നതിന് പാകിസ്ഥാന്‍ ഉള്‍പ്പെടെ മറ്റൊരു മൂന്നാം കക്ഷിയെയും ഉള്‍പ്പെടുത്തില്ലെന്ന ഇന്ത്യയുടെ പ്രഖ്യാപിത നിലപാടിനു വിരുദ്ധമാണ് ചൈനയുടെ നിര്‍ദ്ദേശം.

പാകിസ്താനെ മാത്രമല്ല, അന്താരാഷ്ട്ര സമൂഹത്തെയും ഇക്കാര്യത്തില്‍ ഇടപെടുത്തണമെന്ന്് ചൈന അഭിപ്രായപ്പെടുന്നു. എന്നാല്‍ ചൈന ഇക്കാര്യത്തില്‍ മദ്ധ്യസ്തത വഹിക്കില്ലെന്നും വ്യക്തമാക്കിയിട്ടുണ്ട്.

ഏതു പ്രശ്നത്തെക്കുറിച്ചും ചര്‍ച്ചയാകാമെന്ന് പാകിസ്ഥാന്‍ വ്യക്തമാക്കിയിട്ടുണ്ടെന്നും അതിനാല്‍ കശ്മീര്‍ ചര്‍ച്ചകളില്‍ പാകിസ്ഥാനെയും ഉള്‍പ്പെടുത്താവുന്നതാണെന്നും ചൈന പറയുന്നു. പ്രശ്നപരിഹാരത്തിന് ഇരുരാജ്യങ്ങളുടെയും അയല്‍ക്കാര്‍ എന്ന നിലയില്‍ സഹായിക്കാന്‍ ചൈന തയ്യാറാണത്രേ.

അടുത്തകാലത്തായി കശ്മീര്‍ കാര്യത്തില്‍ ചൈനീസ് സര്‍ക്കാരും ഔദ്യോഗിക മാധ്യമങ്ങളും പ്രത്യേക താത്പര്യം പ്രകടിപ്പിച്ചു തുടങ്ങിയിട്ടുണ്ട്. കശ്മീര്‍ പ്രശ്നത്തില്‍ മൂന്ന് കക്ഷികള്‍ ഉള്‍പ്പെട്ടിട്ടുണ്ടെന്നാണ് ചൈനീസ് മാധ്യമങ്ങള്‍ പ്രചരിപ്പിക്കുന്നത്. ഇന്ത്യ, കശ്മീര്‍ ജനത, പാകിസ്താന്‍ എന്നിവരാണ് ഈ മൂന്നു കക്ഷികള്‍.