പുണ്യാഹം : തന്ത്രിക്കെതിരെ നടപടിയെടുക്കണമെന്ന് രവി
തിരുവനന്തപുരം: തന്റെ മകന്റെ വിവാഹം ഗുരുവായൂര് ക്ഷേത്രത്തില് വെച്ചു നടന്നതിനു ശേഷം അവിടം പുണ്യാഹം നടത്തിയ തന്ത്രിക്കെതിരെ നടപടിയെടുക്കണമെന്ന് കോണ്ഗ്രസ് നേതാവ് വയലാര് രവി ആവശ്യപ്പെട്ടു.
ഗുരുവായൂര് ദേവസ്വം ബോര്ഡ് പ്രസിഡന്റിന് എഴുതിയ കത്തിലാണ് പുണ്യാഹം നടത്തിയ തന്ത്രി വി.എച്ച്. ദിവാകരന് നമ്പൂതിരിപ്പാടിനെതിരെ നടപടി സ്വീകരിക്കണമെന്ന് വയലാര് രവി ആവശ്യപ്പെട്ടിരിക്കുന്നത്.
കോണ്ഗ്രസ് നേതാവും മുന് ദേവസ്വം ബോര്ഡ് ചെയര്മാനുമായ പി.ടി. മോഹനകൃഷ്ണനോട് പുണ്യാഹം നടത്തുന്നതിനായി 1500 രൂപ തന്ത്രി ആവശ്യപ്പെട്ടെന്ന് ഒരു പത്രത്തില് വായിച്ചതായി രവി പറഞ്ഞു. തന്റെ മകന് ഉണ്ണിയുടെയും നിഷയുടെയും വിവാഹചടങ്ങിനു ശേഷം ഇരുവരും ക്ഷേത്രത്തില് പ്രദക്ഷിണം നടത്തിയതിനെ തുടര്ന്നാണ് തന്ത്രി പുണ്യാഹത്തിനായി പണം ആവശ്യപ്പെട്ടത്. വധുവിന്റെ വീട്ടുകാര് പണം നല്കുകയും ചെയ്തു.
ഈഴവ പാരമ്പര്യമനുസരിച്ചാണ് വിവാഹചടങ്ങ് നടന്നത്. ഒരു ഹിന്ദു ക്ഷേത്രദര്ശനം നടത്തിയാല് പുണ്യാഹം തളിക്കുന്നതിനെന്തിനാണ്? എന്റെ മകന് ഈഴവനായതിനാല് തന്ത്രി തൊട്ടുകൂടായ്മ പാലിക്കുകയായിരുന്നുവെന്നാണോ ഇതില് നിന്ന് മനസിലാക്കേണ്ടത്? രവി ചോദിച്ചു.
തന്റെ മകന് ഹിന്ദുവാണോ എന്ന് തീരുമാനിക്കുന്നതിനുള്ള അധികാരം തന്ത്രിക്ക് ആരാണ് നല്കിയതെന്ന് രവി ചോദിച്ചു. തന്ത്രിക്കെതിരെ ഉചിതമായ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.ക്രിസ്ത്യന് സമുദായത്തില്പെട്ടവരാണ് രവിയുടെ ഭാര്യ മേഴ്സി .