കൃഷ്ണന്‍ നമ്പൂതിരി ഗുരുവായൂര്‍ ക്ഷേത്രം മേല്‍ശാന്തി

ഗുരുവായൂര്‍: പി.എം. കൃഷ്ണന്‍ നമ്പൂതിരി ഗുരുവായൂര്‍ ക്ഷേത്രത്തിലെ മേല്‍ശാന്തിയാവും. സപ്തംബര്‍ 14 വ്യാഴാഴ്ച നമസ്കാരമണ്ഡപത്തില്‍ നടന്ന നറുക്കെടുപ്പിലൂടെയാണ് അദ്ദേഹത്തെ അടുത്ത മേല്‍ശാന്തിയായി തിരഞ്ഞെടുത്തത്.

ഒക്ടോബര്‍ ഒന്നു മുതലാണ് കൃഷ്ണന്‍ നമ്പൂതിരി മേല്‍ശാന്തിയായി ചുമതലയെടുക്കുക. ആറുമാസമാണ് മേല്‍ശാന്തിയുടെ കാലാവധി.

മേല്‍ശാന്തി സ്ഥാനത്തേക്ക് 24 അപേക്ഷകരാണ് ഉണ്ടായിരുന്നത്. ഇവരില്‍ യോഗ്യതയുള്ള 19 പേരില്‍ നിന്ന് നറുക്കെടുപ്പിലൂടെ കൃഷ്ണന്‍ നമ്പൂതിരിയെ തിരഞ്ഞെടുക്കുകയായിരുന്നു. ഇപ്പോഴത്തെ മേല്‍ശാന്തി കുറുശാരൂര്‍ പരമേശ്വരന്‍ നമ്പൂതിരിയാണ് നറുക്കെടുത്തത്.

നാല്പത്തൊന്നുകാരനായ കൃഷ്ണന്‍ നമ്പൂതിരി ആദ്യമായാണ് മേല്‍ശാന്തിയാവുന്നത്. പഴയത്ത് മനയിലെ പരേതനായ ആര്യന്‍ അടിതിരിപ്പാടിന്റെയും പരേതയായ പാര്‍വതി അന്തര്‍ജനത്തിന്റെയും മകനാണ്. കൃഷ്ണന്‍ നമ്പൂതിരിയുടെ ജ്യേഷ്ഠന്‍ സുബ്രഹ്മണ്യന്‍ നമ്പൂതിരി നേരത്തെ ഗുരുവായൂര്‍ ക്ഷേത്രത്തിലെ മേല്‍ശാന്തിക്കാരനായിരുന്നു.

19 വര്‍ഷങ്ങളായി കൃഷ്ണന്‍ നമ്പൂതിരി ഗുരുവായൂര്‍ ക്ഷേത്രത്തിലെ ശാന്തിക്കാരനാണ്.