കണ്ണൂര്‍ പദ്ധതി : ആരോപണം തെറ്റെന്ന് മന്ത്രി

കൊച്ചി : സിപിഎമ്മിലെ ഗ്രൂപ്പ് വഴക്ക് കാരണമാണ് കണ്ണൂര്‍ വൈദ്യുതി പദ്ധതിയില്‍ സര്‍ക്കാര്‍ താല്‍പ്പര്യമെടുക്കാത്തതെന്ന പത്രറിപ്പോര്‍ട്ടുകള്‍ സപ്തംബര്‍ 17 ഞായറാഴ്ച വൈദ്യുതി മന്ത്രി എസ്.ശര്‍മ നിഷേധിച്ചു.

ബഹുരാഷ്ട്രകുത്തകയായ എന്‍റോണിന്റെ ധനസഹായമുള്ള പദ്ധതിയുമായി സഹകരിക്കേണ്ട എന്ന ഇടതുമുന്നണി സര്‍ക്കാരിന്റെ നയത്തിന്റെ ഭാഗമായാണ് കണ്ണൂര്‍ പദ്ധതിക്ക് സര്‍ക്കാര്‍ ശുപാര്‍ശ ചെയ്യാത്തതെന്ന് മന്ത്രി വ്യക്തമാക്കി.

കുറഞ്ഞ ചെലവില്‍ ജനങ്ങള്‍ക്ക് വൈദ്യുതി ലഭ്യമാക്കുന്ന ഏതൊരു പദ്ധതിക്കും സര്‍ക്കാര്‍ പിന്തുണ നല്‍കും. കണ്ണൂര്‍ പദ്ധതിക്കായി എല്‍പാസ്സിനോ എന്ന അമേരിക്കന്‍ കമ്പനി നല്‍കിയിരിക്കുന്ന ധനസഹായ വാഗ്ദാനം സര്‍ക്കാര്‍ പഠിച്ചുവരികയാണ്. ജനങ്ങള്‍ക്ക് കുറഞ്ഞ ചെലവില്‍ വൈദ്യുതി ലഭിക്കണമെന്നായിരിക്കും ഇതിന്റെയും മാനദണ്ഡമെന്ന് മന്ത്രി പറഞ്ഞു.

കണ്ണൂര്‍ പദ്ധതിക്കായുള്ള സാമ്പത്തിക സാങ്കേതികാനുമതി സംസ്ഥാന സര്‍ക്കാര്‍ നല്‍കിയിട്ടുണ്ടെന്ന് മന്ത്രി വ്യക്തമാക്കി. തമിഴ്നാട്ടിലെ എന്നൂര്‍ പദ്ധതിക്കായി കണ്ണൂര്‍ പദ്ധതിക്ക് താനോ സര്‍ക്കാരോ ഇടങ്കോലിട്ടിട്ടില്ലെന്നും ശര്‍മ വ്യക്തമാക്കി.