സച്ചിദാനന്ദന് ആശാന്‍ പുരസ്കാരം

തിരുവനന്തപുരം: ആശാന്‍ മെമ്മോറിയല്‍ അസോസിയേഷന്‍െറ ഈ വര്‍ഷത്തെ ആശാന്‍ സ്മാരക കവിതാപുരസ്കാരം കെ.സച്ചിദാനന്ദന് .കഴിഞ്ഞ അഞ്ചുവര്‍ഷത്തെ സച്ചിദാനന്ദന്‍െറ കവിതകള്‍ പരിഗണിച്ചാണ് അവാര്‍ഡ്.

20,000 രൂപയും പ്രശസ്തിപത്രവും ശില്പവും അടങ്ങുന്ന പുരസ്കാരം ചെന്നൈ ആന്‍ഡേഴ്സണ്‍ റോഡിലെ ആശാന്‍ മെമ്മോറിയല്‍ സീനിയര്‍ സെക്കന്ററി സ്കൂളിലെ അമ്മു സ്വാമിനാഥന്‍ ഓഡിറ്റോറിയത്തില്‍ നടക്കുന്ന ചടങ്ങില്‍ സച്ചിദാനന്ദന് നല്കുമെന്ന് അസോസിയേഷന്‍ ജനറല്‍ സെക്രട്ടറി എ.കെ.ഗോപാലന്‍ അറിയിച്ചു.

ഡോ.കെ.എം.പ്രഭാകരവാര്യര്‍,ഡോ.സി.ജി.രാജേന്ദ്രബാബു,ഡോ.സി.വി.മോഹന്‍ബോസ് എന്നിവരടങ്ങിയ സമിതിയാണ് പുരസ്കാരജേതാവിനെ തിരഞ്ഞെടുത്തത്.

ആധുനിക മലയാള കവിതയുടെ പ്രാണേതാവായ സച്ചിദാനന്ദന്‍ 1946ല്‍ കൊടുങ്ങല്ലൂരില്‍ ജനിച്ചു.ഇരിങ്ങാലക്കുട ക്രൈസ്റ് കോളേജില്‍ പ്രൊഫസറായിരിക്കേ കേന്ദ്ര സാഹിത്യ അക്കാദമി സെക്രട്ടറിയായ ഇദ്ദേഹം ഇപ്പോള്‍ അക്കാദമി പ്രസിദ്ധീകരണമായ ഇന്ത്യന്‍ ലിറ്ററേച്ചറിന്റെ പത്രാധിപരുമാണ്.

കവിബുദ്ധന്‍, വീട്മാറ്റം, ഇവനെക്കൂടി, ദേശാടനം, മലയാളം, അപൂര്‍ണ്ണം എന്നിവ പ്രധാന കവിതാസമാഹാരങ്ങളാണ്.