മാരുതിയില്‍ തൊഴിലാളി സമരം

ദില്ലി: സ്റോക്കെടുപ്പിന്റെ ഭാഗമായി മാരുതി ഉദ്യോഗ് ലിമിറ്റഡ് രണ്ടു ദിവസത്തേക്ക് ഉല്പാദനം നിര്‍ത്തിവെക്കാന്‍ തീരുമാനിച്ചത് തൊഴിലാളികളുടെ ഇടയില്‍ അസ്വസ്ഥത വളര്‍ത്തുന്നു. കമ്പനിയില്‍ സമരം തുടങ്ങുമെന്നും കൂട്ടത്തോടെ കാഷ്വല്‍ ലീവെടുക്കുമെന്നും തൊഴിലാളി യൂണിയനുകള്‍ ഭീഷണിപ്പെടുത്തിയിട്ടുണ്ട്.

കമ്പനിയില്‍ നാലു ദിവസത്തെ സ്റോക്കാണ് സാധാരണ ഉണ്ടാവുക. എന്നാല്‍ ആവശ്യക്കാരുടെ എണ്ണത്തില്‍ നേരിയ കുറവു വന്നതിനാല്‍ ഇപ്പോള്‍ ആറേഴു ദിവസത്തെ സ്റോക്ക് ഉണ്ട്. അതിനാലാണ് രണ്ടു ദിവസം ഉത്പാദനം നിര്‍ത്തിവെക്കുന്നത്, കമ്പനി വക്താവ് പറഞ്ഞു.

എന്നാല്‍ ആനുകൂല്യങ്ങള്‍ അനുവദിക്കണമെന്നാവശ്യപ്പെട്ട് തൊഴിലാളികള്‍ തുടങ്ങിയ സമരം തകര്‍ക്കാനാണ് മാനേജ്മെന്റ് ശ്രമിക്കുന്നതെന്ന് മാരുതി ഉദ്യോഗ് എംപ്ലോയീസ് യൂണിയന്‍ ജനറല്‍ സെക്രട്ടറി മാത്യു എബ്രഹാം ആരോപിച്ചു. സപ്തംബര്‍ 18-ന് തിങ്കളാഴ്ച തൊഴിലാളികള്‍ നിരാഹാര സത്യാഗ്രഹം തുടങ്ങിയതിനു ശേഷമാണ് ഉത്പാദനം നിര്‍ത്തിവെക്കാന്‍ കമ്പനി തീരുമാനിച്ചതെന്ന് അദ്ദേഹം പറഞ്ഞു.

ആനുകൂല്യങ്ങളുടെ കാര്യത്തില്‍ പെട്ടെന്നുതന്നെ തീരുമാനമുണ്ടാവണമെന്നാവശ്യപ്പെട്ട് 3,000-ത്തോളം വരുന്ന തൊഴിലാളികളാണ് സമരം ആരംഭിച്ചത്. ഇക്കാര്യത്തില്‍ തൊഴിലാളി നേതാക്കളുമായി ചര്‍ച്ചയില്‍ ഏര്‍പ്പെട്ടിരുന്നുവെങ്കിലും അന്തിമ തീരുമാനമെടുക്കാന്‍ സാധിച്ചിട്ടില്ലെന്ന് മാനേജിംഗ് ഡയറക്ടര്‍ ജഗദീഷ് ഖത്തര്‍ പറഞ്ഞു.