കണ്ണൂര്‍ : ചെയര്‍മാന്റെ നിലപാടില്‍ വൈരുദ്ധ്യം

കൊച്ചി : വിവാദമായിരിക്കുന്ന കണ്ണൂര്‍-എന്നൂര്‍ പദ്ധതിയെക്കുറിച്ച് വൈദ്യുതി ബോര്‍ഡ് ചെയര്‍മാന്‍ സുകുമാര്‍.എന്‍. ഉമ്മന്റെ നിലപാടുകളില്‍ പ്രകടമായ വൈരുദ്ധ്യം.

എന്നൂരില്‍ നിന്ന് വൈദ്യുതി വാങ്ങുന്നതാണ് സംസ്ഥാനത്തിന്റെ താല്‍പര്യങ്ങള്‍ക്കുചിതം എന്ന് ജൂലായ് മാസത്തില്‍ ഉമ്മന്‍ ബോര്‍ഡിന് റിപ്പോര്‍ട്ട് നല്‍കിയിരുന്നു. എന്നാല്‍ കഴിഞ്ഞ ദിവസങ്ങളില്‍ അദ്ദേഹം കെ.പി.പി.നമ്പ്യാരുടെ വാദങ്ങളെ അനുകൂലിച്ച് വാര്‍ത്താലേഖകരുമായി സംസാരിച്ചു.

ആദ്യം നാഫ്ത ഉപയോഗിച്ച് പ്രവര്‍ത്തനമാരംഭിക്കുന്ന കണ്ണൂര്‍ പദ്ധതിയില്‍ 2005ല്‍ കൊച്ചി എല്‍.എന്‍.ജി ടെര്‍മിനല്‍ പ്രവര്‍ത്തനക്ഷമമാകുന്നതോടെ ദ്രവീകൃത പ്രകൃതിവാതകം ഇന്ധനമാക്കാമെന്നാണ് നമ്പ്യാരുടെ വാദം. എന്നാല്‍ എല്‍.എന്‍.ജി ടെര്‍മിനല്‍ 2005ല്‍ പൂര്‍ത്തിയാകുമോ എന്ന് ഉറപ്പുമില്ല.

എല്‍.എന്‍.ജി ടെര്‍മിനലില്‍ നിന്നും വാതകം ലഭിക്കുന്നതു വരെ നാഫ്ത ഉപയോഗിച്ച് ഉല്‍പ്പാദിപ്പിക്കുന്ന വിലയേറിയ വൈദ്യുതി വാങ്ങുന്ന കാര്യം ആലോചിക്കേണ്ടി വരുമെന്നാണ് വൈദ്യുതി മന്ത്രി ശര്‍മ്മയുടെ നിലപാട്. മന്ത്രിയുടെ ഈ നിലപാടിനെ ഫലത്തില്‍ ന്യായീകരിക്കുന്നതാണ് ഉമ്മന്‍ നേരത്തെ നല്‍കിയിട്ടുള്ള റിപ്പോര്‍ട്ടുകള്‍.

കായംകുളം പദ്ധതിയുടെ വികസനം പൂര്‍ത്തിയാകുന്നതു വരെ എന്നൂരില്‍ നിന്നും വൈദ്യുതി വാങ്ങാമെന്നും ജൂലായ് 20ന് സമര്‍പ്പിച്ച റിപ്പോര്‍ട്ടിലുണ്ട്. ഇതിന് കടകവിരുദ്ധമായാണ് ചെയര്‍മാന്‍ ഇപ്പോള്‍ സംസാരിക്കുന്നതെന്ന് മന്ത്രിയെ അനുകൂലിക്കുന്നവര്‍ ചൂണ്ടിക്കാട്ടുന്നു.