ഛോട്ടാരാജന് കേസ് : വിരലടയാളങ്ങള് ഒന്നെന്ന്
മുംബൈ: സപ്തംബര് 15 വെള്ളിയാഴ്ച ബാങ്കോക്കിലുണ്ടായ വെടിവയ്പില് പരിക്കേറ്റ വിജയ് ദാമന് മുംബൈ അധോലോക നേതാവ് ഛോട്ടാരാജന് ആണെന്നതിന് വ്യക്തമായ തെളിവുകള് ലഭിച്ചതായി അറിയുന്നു.
സംഭവത്തെക്കുറിച്ച് കൂടുതല് അന്വേഷണങ്ങള്ക്കായി ബാങ്കോക്കില് എത്തിയിരിക്കുന്ന മുംബൈ പൊലീസ് അവിടെയെത്തിച്ച ഛോട്ടാരാജന്റെ വിരലടയാളങ്ങളും വിജയ് ദാമന് എന്ന പേരില് അജ്ഞാത കേന്ദ്രത്തില് ചികിത്സയില് കഴിയുന്ന ആളുടെ വിരലടയാളങ്ങളും ഒന്നാണെന്നു തെളിഞ്ഞതായി വിശ്വസനീയ കേന്ദ്രങ്ങള് സപ്തംബര് 24 ഞായറാഴ്ച വെളിപ്പെടുത്തി.
എന്നാല് ഇക്കാര്യത്തെക്കുറച്ച് തായ് പൊലീസ് അധികൃതരോ മുംബൈ പൊലീസ് അധികൃതരോ വ്യക്തമായ വിവരങ്ങള് പുറത്തു വിടുന്നില്ല. വിരലടയാളങ്ങളില് സാമ്യം കണ്ടെത്തിയെന്നോ വിജയ് ദാമന് തന്നെയാണ് ഛോട്ടാ രാജന് എന്നോ അവര് പുറത്തു പറഞ്ഞിട്ടില്ല. എന്നാല് സംഭവം സംബന്ധിച്ച അന്വേഷണങ്ങള് പരമരഹസ്യമായി നടക്കുന്നുണ്ടെന്നും എങ്ങിനെയും ഛോട്ടാ രാജനെ ഇന്ത്യയിലെത്തിക്കുന്നതിനുള്ള ശ്രമങ്ങള് നടക്കുന്നുണ്ടെന്നും അറിയുന്നു.
ഇന്ത്യയില് മാത്രമല്ല , ആസ്ത്രേലിയയിലും നിരവധി കേസുകളില് പ്രതിയാണ് ഛോട്ടാ രാജന് .
ദാവൂദ് ഇബ്രാഹിം സംഘത്തിന്റെ ഹിറ്റ്ലിസ്റ്റില് സ്ഥാനം നേടിയതിനെത്തുടര്ന്ന് മുംബൈയില് നിന്ന് താവളം മാറ്റിയ ഛോട്ടാരാജന് അടുത്തകാലം വരെ ആസ്ത്രേലിയയില് ആയിരുന്നു. എന്നാല് സിഡ്നി ഒളിംപിക്സ് ഇയാളെ വീണ്ടും താവളം മാറ്റാന് പ്രേരിപ്പിക്കുകയായിരുന്നു. ഒളിംപിക്സിന്റെ ഭാഗമായുള്ള സുരക്ഷാമുന്കരുതലുകള് ആസ്ത്രേലിയന് പൊലീസ് ശക്തമാക്കിയതിനെത്തുടര്ന്ന് രാജന് തായ്ലണ്ടിലേയ്ക്കു മാറുകയായിരുന്നു.
തായ്ലണ്ടില് ഇയാള് വിജയ് ദാമന് എന്ന പേരില് ആള്മാറാട്ടം നടത്തിയായിരുന്നു കഴിഞ്ഞിരുന്നത്.