മലയാളി യുവാവ് ജിദ്ദയില് ജയിലില് മരിച്ചു
പുല്പള്ളി: വയനാട്ടുകാരനായ യുവാവ് സൗദി അറേബ്യയിലെ ജിദ്ദയില് ജയിലില് മരിച്ചതായി സപ്തംബര് 23ശനിയാഴ്ച ബന്ധുക്കള്ക്കു വിവരം ലഭിച്ചു. മൂന്ന് മാസം മുമ്പ് നടന്ന ദുരന്തം നാട്ടില് അറിയുന്നതു തന്നെ കഴിഞ്ഞയാഴ്ചയാണ്. പുല്പള്ളിക്കടുത്ത് മരക്കടവ് മുണ്ടക്കൊടിയില് ജോസിന്റെ മകന് ജോമോന് ജോസ് (27) ആണ് മരിച്ചത്.
മൂന്ന് മാസം മുമ്പ് ജിദ്ദയിലെ സര് ഫത്ത് ജയിലില് ദുരൂഹ സാഹചര്യത്തില് മരിക്കുകയായിരുന്നു ജോമോന്. ഇയാളുടെ ജയിലില് വച്ചുള്ള പരിചയക്കാരന് നാട്ടിലെത്തിയപ്പോഴാണ് വീട്ടുകാര് വിവരം അറിഞ്ഞത്. മൃതദേഹം ജിദ്ദയിലെ കിംഗ് ഫാത്ത് ആശുപത്രിയില് മോര്ച്ചറിയിലാണ്. മാനസിക വിഭ്രാന്തി മൂലം ജോമോന് ജയിലിലെ ചുവരില് തലയിടിച്ചു മരിച്ചതാണെന്നാണ് അധികൃതരുടെ ഭാഷ്യം.
മതിയായ രേഖകളില്ലാതെ രാജ്യത്ത് തങ്ങിയതിനാണ് ജോസിനെ ജയിലിലടച്ചത്. മൂന്നു വര്ഷം മുമ്പാണ് ഇയാള് സൗദിയിലെ അബഹയില് എത്തിയത്. അവിടെ തയ്യല് ജോലി ചെയ്യുകയായിരുന്നു. ഒന്നര വര്ഷത്തിനു ശേഷം നാട്ടില് തിരിച്ചെത്തി വിവാഹം കഴിച്ചു. ജോലി സ്ഥലത്ത് പലതരത്തിലും പീഡിപ്പിക്കപ്പെട്ടിരുന്നതായി ജോമോന് മാതാപിതാക്കള്ക്കു കത്തെഴുതിയിരുന്നു. എന്നാല് വീട്ടുകാര് എഴുതിയ മറുപടികള് ജോസിന് കിട്ടിയിരുന്നില്ല.
പീഡനം സഹിക്കാനാവാതെ ജിദ്ദയിലേയ്ക്കു പോകുകയാണെന്ന് ഒരു സുഹൃത്ത് മുഖേന മൂന്ന് മാസം മുമ്പ് വീട്ടിലേയ്ക്കു കത്തയച്ചിരുന്നു. പിന്നീട് വീട്ടുകാര് അറിയുന്നത് ജോസിന്െറ മരണവാര്ത്തയാണ്. ജയിലില് വച്ച് പരിചയപ്പെട്ട മഞ്ചേരി സ്വദേശിയായ യൂസഫ് ആണ് ദാരുണവാര്ത്ത വീട്ടിലെത്തിച്ചത്. കഴിഞ്ഞ ആഴ്ചയാണ് യൂസഫ് നാട്ടിലെത്തിയത്. പൊതുമാപ്പ് പ്രഖ്യാപിക്കപ്പെട്ടപ്പോള് സ്വതന്ത്രനാകുകയായിരുന്നു ഇയാള്.
നൂല്പുഴ പാലക്കുന്നേല് കുട്ടപ്പന്റെ മകള് റീനയാണ് ജോമോന്റെ ഭാര്യ. ആറുമാസം പ്രായമുള്ള ജിജോ ആണ് ഏകമകന്.