ഛോട്ടാരാജന്‍ 28-ന് ഇന്ത്യയിലേക്ക് തിരിക്കുമെന്ന്

ബാങ്കോക്ക്: ബാങ്കോക്കില്‍വെച്ച് വെടിയേറ്റ അധോലോക നേതാവ് ഛോട്ടാ രാജന്‍ സപ്തംബര്‍ 28 വ്യാഴാഴ്ച ഇന്ത്യയിലേക്ക് തിരിക്കുമെന്ന് ഒരു വിദേശപത്രം റിപ്പോര്‍ട്ടു ചെയ്തു.

തന്റെ സ്വന്തം വിമാനത്തിലാണ് ഛോട്ടാ രാജന്‍ ഇന്ത്യയിലേക്ക് തിരിക്കുകയെന്ന് പൊലീസ് വക്താക്കളെ ഉദ്ധരിച്ചുകൊണ്ട് ബാങ്കോക്കിലെ ദിനപത്രം ദി നേഷന്‍ റിപ്പോര്‍ട്ടു ചെയ്യുന്നു.

അനേകം കൊലപാതകക്കേസുകളില്‍ രാജന്‍ പ്രതിയാണെങ്കിലും തായ്ലാന്‍ഡില്‍ അദ്ദേഹത്തിനെതിരെ ഒരു കേസും രജിസ്റര്‍ ചെയ്തിട്ടില്ല. അതിനാല്‍തന്നെ രാജന്‍ ഇന്ത്യയിലേക്ക് തിരിക്കുന്നത് തടയാന്‍ തായ് പോലീസിനു കഴിയുകയുമില്ല. ഇക്കാര്യം തായ് പൊലീസും സമ്മതിക്കുന്നുണ്ട്.

തായ്ലാന്‍ഡില്‍ വെച്ചാണ് ഛോട്ടാ രാജന്‍ വിജയ് ദമാന്‍ എന്ന പേര് സ്വീകരിച്ചത് എന്നു കരുതുന്നു. സപ്തംബര്‍ 15-ന് വെള്ളിയാഴ്ചയാണ് ബാങ്കോക്ക് അപ്പാര്‍ട്ട്മെന്റില്‍ വെച്ച് രാജനെ അക്രമികള്‍ വെടിവെച്ചത്. അദ്ദേഹത്തിന്റെ കൂടെയുണ്ടായിരുന്ന രോഹിത് വര്‍മ്മ എന്ന സഹായി സംഭവസ്ഥലത്തു വച്ചുതന്നെ മരിച്ചിരുന്നു.