ഛോട്ടാ രാജനെതിരെ തായ്ലന്റില്‍ കേസ്

ബാങ്കോക്ക് : തെറ്റായ വിവരം നല്‍കിയതിന് ഇന്ത്യന്‍ അധോലോക നായകന്‍ ഛോട്ടാ രാജനെതിരെ തായ് പൊലീസ് കേസെടുക്കും.

വിസ മാറുന്നതിന് രാജന്‍ നല്‍കിയ വിവരങ്ങള്‍ തെറ്റായിരുന്നുവെന്ന് കണ്ടുപിടിച്ചതായി ഇമിഗ്രേഷന്‍ പൊലീസ് വൃത്തങ്ങള്‍ അറിയിച്ചു. ഇക്കാരണത്താല്‍ രാജനെ തായ്ലന്റ് വിടാന്‍ അനുവദിക്കില്ലെന്ന് ഇമിഗ്രേഷന്‍ പൊലീസ് പറഞ്ഞു. കയറ്റിറക്കുമതി കമ്പനി തുടങ്ങുന്നതിന് തന്റെ ടൂറിസ്റ് വിസ ബിസിനസ് വിസയാക്കി മാറ്റണമെന്ന് രാജന്‍ അപേക്ഷിച്ചിരുന്നു.

എന്നാല്‍ രാജന് കമ്പനി തുടങ്ങാന്‍ ഉദ്ദേശ്യമില്ലാതിരുന്നതിനാല്‍ ഈ നിലക്ക് യാതൊരു നീക്കവും രാജന്‍ നടത്തിയില്ല.ഇതാണ് തെറ്റായ വിവരം രാജന്‍ നല്‍കിയതായി പൊലീസ് പറയുന്നത്. പൊലീസിന്റെ നോട്ടപ്പുള്ളിയായ രാജനെ തായ്ലന്റില്‍ തന്നെ നിര്‍ത്താന്‍ തായ് പൊലീസ് ശ്രമിക്കുകയായിരുന്നു. എന്നാല്‍ ക്രിമിനല്‍ കുറ്റമല്ലാത്തതിനാല്‍ രാജനെ തായ്ലന്റ് വിടുന്നതില്‍ നിന്നും പൊലീസിന് തടയാനാവില്ല. സപ്തംബര്‍ 21 വ്യാഴാഴ്ച തന്റെ സ്വകാര്യ വിമാനത്തില്‍ തായ്ലന്റ് വിടുമെന്ന് രാജന്‍ പറഞ്ഞിരുന്നു.