രണ്ടാംഘട്ടത്തില്‍ 70 ശതമാനം പോളിംഗ്

തിരുവനന്തപുരം: സപ്തംബര്‍ 27 ബുധനാഴ്ച നടന്ന തദ്ദേശസ്വയംഭരണ സ്ഥാപനങ്ങളിലേക്കുള്ള രണ്ടാംഘട്ട വോട്ടെടുപ്പില്‍ 70 ശതമാനം പേര്‍ വോട്ട് ചെയ്തു.

രാവിലെ 11 വരെ ചില ജില്ലകളില്‍ കനത്ത മഴയുണ്ടായെങ്കിലും ഉച്ചക്കുശേഷം കനത്ത പോളിംഗാണുണ്ടായത്.

എറണാകുളം ജില്ലയില്‍ 70.9 ശതമാനം പേര്‍ വോട്ട് ചെയ്തു. ആലപ്പുഴയില്‍ 70 ശതമാനം പേര്‍ വോട്ട് ചെയ്തു. കണ്ണൂരില്‍ 70 ശതമാനത്തിലേറെ പോളിംഗുണ്ടായി.

മുഖ്യമന്ത്രി ഇ.കെ. നായനാര്‍ തിരുവനന്തപുരത്തെ നന്ദന്‍കോട് ചാരാച്ചിറ സ്കൂളിലും പ്രതിപക്ഷ നേതാവ് എ.കെ. ആന്റണി ജഗതി സ്കൂളിലും വോട്ട് ചെയ്തു.

ചിലയിടങ്ങളില്‍ കള്ളവോട്ട് സംബന്ധിച്ച് പരാതികളും വാക്കേറ്റങ്ങളുമുണ്ടായി. കള്ളവോട്ടിന് ശ്രമിച്ചവരെ വിവിധ കേന്ദ്രങ്ങളില്‍ പൊലീസ് അറസ്റ് ചെയ്തു. ആള്‍മാറാട്ടത്തെ പറ്റിയും വ്യാപകമായ പരാതികളുയര്‍ന്നു.

ഇലക്ട്രോണിക് വോട്ടിംഗ് യന്ത്രം ഉപയോഗിക്കുന്നതിനാല്‍ തിരുവനന്തപുരം, കൊച്ചി, കോഴിക്കോട് നഗരങ്ങളിലെ ബൂത്തുകളില്‍ വോട്ടര്‍മാരുടെ നീണ്ട നിരയുണ്ടായിരുന്നില്ല.

വ്യാഴാഴ്ചയാണ് വോട്ടെണ്ണുന്നത്. കോര്‍പ്പറേഷനുകളില്‍ ഉച്ചയ്ക്ക് 12 മണിയോടെ ഫലം അറിയാനാവും.വൈകുന്നേരത്തോടെ മുഴുവന്‍ ഫലങ്ങളും അറിയാനാകും.