വോട്ടെണ്ണല്‍ തുടങ്ങി

തിരുവനന്തപുരം: കേരളത്തിലെ തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ വോട്ടെണ്ണല്‍ സപ്തംബര്‍ 28 വ്യാഴാഴ്ച രാവിലെ എട്ട് മണിക്കാരംഭിച്ചു. രാവിലെ പതിനൊന്ന് മണിയോടെ ആദ്യഫലം പുറത്തുവരും. 226 കേന്ദ്രങ്ങളിലാണ് വോട്ടെണ്ണല്‍ നടക്കുന്നത്.

ഇലക്ട്രോണിക് വോട്ടിങ് യന്ത്രം ഉപയോഗിച്ച് വോട്ടെടുപ്പ് നടന്ന അഞ്ച് കോര്‍പറേഷനുകളിലെ ഫലമായിരിക്കും ആദ്യം അറിവാകുക. ഗ്രാമപഞ്ചായത്തുകളുടെ ഫലം ഉച്ചയോടെയും ബ്ലോക്ക് പഞ്ചായത്ത്, മുന്‍സിപ്പാലിറ്റി എന്നിവയുടെ ഫലം വൈകുന്നേരത്തോടെയും അറിയാനാവും. ജില്ലാ പഞ്ചായത്ത് ഫലം പുറത്തുവരാന്‍ രാത്രിയാകും. രാത്രി എട്ട് മണിയോടെ മുഴുവന്‍ ഫലങ്ങളും ലഭ്യമാകുമെന്നാണ് പ്രതീക്ഷിക്കപ്പെടുന്നത്.

കോര്‍പറേഷനുകളിലെയും മുന്‍സിപ്പാലിറ്റികളിലെയും വോട്ടെണ്ണല്‍ പ്രത്യേക കേന്ദ്രങ്ങളിലാണ് നടക്കുന്നത്. ഗ്രാമ പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവയുടെ വോട്ടെണ്ണല്‍ ബ്ലോക്ക് കേന്ദ്രങ്ങളില്‍ നടക്കുന്നു. ഗ്രാമ, ബ്ലോക്ക്, ജില്ലാ പഞ്ചായത്തുകളുടെ ബാലറ്റുകള്‍ തരംതിരിക്കുന്ന ജോലിയാണ് ഇപ്പോള്‍ നടക്കുന്നത്.

ബൂത്തടിസ്ഥാനത്തിലായിരിക്കും വോട്ടെണ്ണല്‍ നടക്കുക. ഗ്രാമ പഞ്ചായത്ത്, ബ്ലോക്ക് പഞ്ചായത്ത്, മുന്‍സിപ്പാലിറ്റി എന്നിവയുടെ ഫലം അതാത് വോട്ടെണ്ണല്‍ കേന്ദ്രങ്ങളില്‍ പ്രഖ്യാപിക്കും. ജില്ലാ പഞ്ചായത്ത് ഫലം വരണാധികാരിയായ കളക്ടറാണ് പ്രഖ്യാപിക്കുന്നത്.